Lènong
Lènong (basa Batawi: لينوڠ lènong) inggih punika seni téater tradhisional utawa lakon rakyat Betawi kang dipentasaké nganggo basa Betawi ingkan asalipun saking Jakarta, Indonésia.[1] Kasenian tradhisional puniki dikanthèni musik gambang kromong kanthi piranti musik kadosta gambang, kromong, gong, kendang, kèmpor, suling, lan kècrèk, uga piranti musik unsur Cina kadosta tèhyan, kongahyan, lan sukong. Lakon utawi skénario lènong limrahipun awrat pesen moral, inggih punika nulungi tiyang-tiyang ingkang ringkih, sengit dhateng srakah lan tumindak ingkang nistha. Basa ingkang diginakaké ing lènong inggih punika basa Batawi.
Wonten kalih jinis kasenian lènong, inggih punika lènong dènes lan lènong préman. Lènong dènes punika nyariosaké carios-carios "dhines", inggih punika carios-carios ingkang nyariosaké koripanipun tiyang-tiyang rasmi, kadosta ratu-ratu lan priyayi. Basa ingkang diginakaké ing lènong dènes punika basa Malayu Inggil ingkang kacampuran kaliyan basa Batawi. Déné lènong préman, saking asmanipun sampun "préman", artosipun lènong jinis puniki nyariosaké koripanipun tiyang-tiyang limrah, kadosta cariosipun si Pitung, ingkang kaswara dados "Robin Hood"-ipun tiyang Batawi. Basa ingkang digunakaké ing lènong préman inggih basa limrah Batawi.