Kashiwamochi

Saka Wikipédia Jawa, bauwarna mardika basa Jawa
Kashiwamochi
Kashiwamochi mawi bungkus kotak kanggé angsal-angsal.

Kashiwamochi (柏餅?) inggih punika satunggaling kué Jepang ingkang dipundamel saking glepung beras kanthi isi selai kacang abrit. Kué punika kalebet ing salah satunggal jinis mochi lan dipunsebat kashiwamochi amargi dipunbungkus ing godhong jinising wit ek (Quercus dentata, nama Jepang: kashiwa). Godhong ingkang dipuginakaken kanggé bungkus punika boten dipundhahar [1].

Kashiwamochi kalebet dhaharan ingkang istimewa nalika ngrayakaken Dinten Laré-laré nalika tanggal 5 Mèi wonten ing Jepang. Godhong-godhong tuwa saking wit kashiwa boten saged luruh sadèrèngipun wit mau saged nuwuhaken tunas dados gondhong ingkang énggal.[2] Awit saking punika, kué Kashiwamochi punika dipunpitados saged mbeta nasib ingkang saé ugi kaginakaken minangka simbol garis keturunan kulawarga ingkang boten pedhot (tiyang sepuh boten kénging tilar donya sadèrèngipun laré-laré lair).[2] Adonan kue Kashiwamochi punika dipundamel saking glepung beras lan toya. Adonan mau dipundamel wujud bunder-bunder lajeng dipunisi selai kacang abrit ing pérangan tengah kué mau. Adonan mau lajeng dipuntekuk dados kalih saéngga awujud separoning bunderan. Bibar punika adonan mau dipunolah kanthi cara dipun-dang (dipunkukus). Manawi sampun mateng, kue Kashiwamochi mau dipunbungkus satunggal-satunggal ngginakaken godhong kashiwa ingkang saged damel kue Kashiwamochi gadhah aroma ingkang khas.

Sajarah[besut | besut sumber]

Kashiwamochi wiwitanipun kalebet budaya Jepang pérangan wétan. Kue Kashiwamochi punika nembé dipunmangertosi kanthi wiyar ing Jepang kirang langkung nalika masa pamaréntahanipun shogun Tokugawa ingkang kaping 9 Tokugawa Ieshige lan shogun Tokugawa ingkang kaping 10 Tokugawa Ieharu.[2] Wonten ing buku kempalan kigo (tetembungan mangsa kanggé haiku) kanthi irah-irahan Haikai Shogaku-shō saking taun 1641 déning Saitō Tokugen, kashiwamochi dèrèng dipunsebat minangka dhaharan khas wulan 5.[2] Cathetan babagan kashiwamochi minangka dhaharan ingkang khas wulan 5 punika kapanggih salajengipun ing buku kanthi irah-irahan Shubeiron terbitan taun 1661-1673.[2] Kue Kashiwamochi punika kalebet salah satunggaling kué asli Jepang amarhi boten wonten ing tradisi karaméan Tango no Sekku ingkang asalipun saking Cina.[2]

Keshogunan Tokugawa gadhah usaha kanggé njagi daimyo saking manéka tlatah ing Jepang kanthi ngawontenaken kuwajiban nyambut damel ing kutha krajan (sankin kōtai). Kashiwamochi wiwit dipuntepangi ing Jepang bibar daimyo lan rombongan ingkang makarya ing Edo kondur kanthi mbeta kawruh babagan dhaharan khas saking kutha krajan dhateng tlatah asal piyambakipun. Wit kashiwa ingkang godhongipun kanggé mbungkus kué punika boten tuwuh kanthi waton ing Shikoku utawi ing sisih kilèn wewengkon Kansai. IngJepang pérangan kilèn ingkang boten dipuntuwuhi déning wit kashiwa tiyang-tiyang ugi ngrayak chimaki (jinising bakcang ingkang dipunbungkus godhong pring) utawi kashiwamochi ingkang dipunbungkus déning godhong sankirai (Smilax glabra).

Cathetan suku[besut | besut sumber]

  1. Jajanan Tradisional Jepang Archived 2019-07-15 at the Wayback Machine., (dipunakses tanggal 24 Fèbruari 2013)
  2. a b c d e f "端午の節句". 料理レシピ検索しゅふしゅふーず. Diarsip saka sing asli ing 2010-01-31. Dibukak ing 2013-02-24.

Pranala njawi[besut | besut sumber]