Kalpataru

Saka Wikipédia, bauwarna bébas basa Jawa
Relièf wit Kalpataru ing Candhi Pawon (abad kaping-8), Magelang, Jawa Tengah.

Kalpataru (utawa Kalpawreksa, Kalpadruma, Kalpapāda)(basa Sangskreta: कल्पवृक्ष, Kalpavṛkṣa) inggih punika pralambang pangayoman. Dumadi saking tembung kalpa ingkang ateges urip/gesang saha tembung taru ingkang ateges wit. Dados Kalpataru punika tegesipun wit panguripan.

Déning pamaréntah Indonésia, Kalpataru punika dipundadosaken replika ingkang salajengipun dados awujud tropi ingkang dipunaturaken kanggé tiyang ingkang ndhèrèk manyengkuyung saha ngupakarti lingkungan utawi alam.

Wonten ing sapérangan candhi Hindhu ing Indonésia, wonten relief ingkang nggambaraken Kalpataru, ingkang dipunpitadosi dados lambang panguripan. Ugi dados lambang pangayoman amargi Kalpataru punika awujud Wit Ringin ingkang ronipun ijo ngrembuyung, ngayomi, ngadhemi, saha ngayemi sadaya ing sakiwa tengenipun. Saged dados patuladhan mliginipun kangge pra pangarsa ingkang kedah saged ngayomi, ngadhemi, saha ngayemi rakyatipun.


Sumber artikel punika saking kaca situs web: "https://jv.wikipedia.org/w/index.php?title=Kalpataru&oldid=1058261"