Ibnu Wahyudi
Ibnu Wahyudi inggih punika alah satunggaling sastrawan Indonésia ingkang miyos wonten ing Ampel, Boyolali, Jawa Tengah, tanggal 24 Juni 1958; kanthi yuswa sapunika 55 taun.[1]
Biografi[besut | besut sumber]
Ibnu Wahyudi ngrampungaken pendhidhikan S1 wonten ing babagan Sastra Indonesia Modern ingkang dipunlampahaken ing Fakultas Sastra ing Universitas Indonesia ing taun 1984. Lajeng, ing antawisipun taun 1991-1993, Ibnu Wahyudi ndhèrèk kuliah ing Center for Comparative Literature and Culture Studies, wonten ing Monash University, Melbourne, Australia lan pikantuk gelar MA. Piyambakipun lajeng nerasaken sekolah kanggé ngudi pendhidhikan dhoktor ing babagan Ilmu Susatra ing Program Pascasarjana UI. Lan ing dangunipun 3 taun saking taun 1997 dumugi taun 2000, piyambakipun dados dhosèn tamu ing Hankuk University of Foreign Studies Seoul, Koréa Kidul. Ibnu Wahyudi sapunika dados dhosèn ing almamateripun inggih punika ing Fakultas Ilmu Budaya (kala rumiyin dipunsebat Fakultas Sastra) Universitas Indonesia.[2] Kajawi punika, piyambakipun ugi dados pengajar para tamu ing Jakarta International Korean School wiwit taun 2001, lajeng ugi mucal wonten ing Prasetiya Mulya Business School wiwit taun 2005, ugi dados dhosèn ing Universitas Multimedia Nusantara wiwit taun 2009, saha dados dhosèn ugi ing SIM University Singapura.
Asiling Karya[besut | besut sumber]
Kempalan puisinipun Ibnu Wahyudi ingkang sampun dipuncithak lan dipunwedalaken inggih punika wonten Masih Bersama Mangsa (dipunwedalaken déning penerbit Kutu Buku, ing taun 2005), Haikuku (dipunwedalaken déning penerbit Artiseni, ing taun 2009), saha Ketika Cinta (dipunwedalaken déning penerbit Buku Pop, ing taun 2009); déné kempalan prosa mininipun kanthi irah-irahan Nama yang Mendera (dipunwedalaken déning penerbit Citra Aji Parama, ing taun 2010). Buku puisinipun ingkang kanthi irah-irahan Masih Bersama Mangsa mlebet ing 10 karya ingkang saé piyambak ing penghargaan Khatulistiwa Literary Award ing taun 2005. Lan buku-buku ingkang sampun naté dipunsusun saha dipunsunting déning Ibnu Wahyudi ing antawisipun inggih punika Lembar-lembar Sajak Lama (wonten ing kempalan sajak P. Sengodjo), ingkang dipunwedalaken déning Balai Pustaka (ing taun 1982), Pahlawan dan Kucing (wonten ing kempalan carkak Suripman) ingkang dipunwedalaken déning Balai Pustaka (ing taun 1984), Konstelasi Sastra (dipunwedalaken déning Hiski, ing taun 1990), Erotisme dalam sastra (ing taun 1994), Menyoal Sastra Marginal (ing taun 2004), "Toilet Lantai 13" (dipunwedalaken déning penerbit Aksara 13, ing taun 2008), "Ode Kebangkitan" (ing taun 2008), Membaca Sastra (ingkang dipunwedalaken déning penerbit Indonesia Tera, ing taun 2008]], ingkang dipunserat sesarengan kaliya Melani Budianta, Ida Sundari Husen, lan Manneke Budiman),[3] lan taksih kathah malih asiling karyanipun.