Brie

Saka Wikipédia Jawa, bauwarna bébas abasa Jawa
Kèju Brie

Cithakan:Infobox Cheese

Brie inggih punika kèju mawi tèkstur ingkang lunak saking susu sapi ingkang dipunpasteurisasi ingkang asalipun saking Perancis. Brie punika dipunproduksi ing laladan Ile-de-France ingkang manggèn wonten ing sisih wétan kutha Paris. Sadèrèngipun transportasi ing Perancis mekar, kèju punika boten saged dipunkirim dhateng laladan sanès kejawi kutha Paris, saéngga tiyang-tiyang asring nyebat "kèju Paris". Kéju Brie Perancis asli ngginakaken susu sapi ingkang boten dipunpasteurisasi saéngga raosipun langkung komplèks.[1][2] Déné kèju Brie ingkang dipunekspor dhateng nagara sanès punika ngginakaken susu sapi ingkang dipunpasteurisasi saéngga saged tahan langkung dangu lan boten gampil kénging infeksi saking bakteri.[1][2]

Sajarah[besut | besut sumber]

Brie ingkang dipunsebat minangka "raja" utawi "ratu" keju punika sampun dipunmangertosi saking abad kaping 8.[1][2][3][4] Atusan taun kepengker, kèju Brie dipuncaosaken minangka upeti dhumateng raja-raja Perancis ing zaman kasebut.[1] Bukti sinerat ingkang paling tua babagan kèju punika kapanggihaken wonten ing taun 774 M.[5] Charlemagne, panguwaos Perancis kala punika nyobi kèju Brie lajeng paring dhawuh supados kalih tumpuk kèju kasebut dipunkirim marang piyambakipun saben taun.[5] Raja Louis XVI ugi remen kalihan kèju punika.[3][5] Miturut cariyosipun, nalika piyambakipun nembé sekarat punika nyuwun dipunsajèkaken kèju Brie minangka sajèan ingkang pungkasan.[3][5] Amargi kondhangipun ing kalangan kerajaan, kèju Brie pikantuk ajejuluk "Raja Kèju lan Kèju Raja-raja" (Roi de Fromages et Fromage de Rois) déning Androuet lan Chabot ing taun 1985.[6]

Wujud lan tèkstur[besut | besut sumber]

Keju punika gadhah wujud bunder kados kue mawi 25 cm dumugi 40 cm. Kèju mawi diameter 15 cm dumugi 22 cm ugi kénging kanggé sesadéan. Bobot saking kèju Brie punika kirang langkung antawisipun 1 kg dumugi 2 kg.[1] Kèju Brie saged dipunpanggihaken dipunsadé wonten ing wungkusan kotak kayu.[1]

Proses damel Kèju Brie[besut | besut sumber]

Kanggé damel kèju Brie punika dipunginakaken susu sapi ingkang dipunpanasaken dumugi boten langkung saking 37 °C lan rennet ugi dipuntambahaken.[5][6] Dadih lajeng dipuncithak kanthi ngginakaken séndhok ageng ingkang wonten bolonganipun ingkang dipunwastani pelle à brie.[5][7] Lajeng dadih kasebut dipunsukaken ing cithakan lan dipungaringaken setunggal dinten.[3][4] Lajeng dipuntambah malih kalihan sarem kanggé ngimbangi rasa legi saking susu ingkang dipunginakaken.[5] Sadèrèngipun dipunmatengaken, jamur Penicillium camemberti kaginakaken saéngga kadhapuk kulit kanthi werna putih ing bagéyan njawi kèju.[4][5][6] Proses ingkang pungkasan punika pematengan wonten ing gudhang ngandhaping lemah utawi gua ingkang nelasaken wekdal paling sekedhik sekawan minggu.[3][4][5]

Jinis[besut | besut sumber]

Keju Brie de Melun.

Wonten manéka variasi saking kèju Brie asli ingkang saged dipunpanggihaken, ananging naming kalih jinis kèju Brie ingkang pikantuk sertifikasi AOC.

Kèju Brie AOC[besut | besut sumber]

Brie de Meaux[besut | besut sumber]

Kèju kanthi bobot 2.5 - 3 kilogram punika wiwitanipun dipundamel wonten ing Meaux, ing laladan Brie.[8] Brie de Meaux dipundamel saking susu sapi mentah nalika wulan Juli dumugi Maret.[8] Tèkstur saking kèju punika lembut kanthi werna ingkang éwah dados kuning pucet nalika mateng.[8] Permukaan saking kèju punika werninipun putih mawi bintik-bintik werna jingga.[8]

Brie de Melun[besut | besut sumber]

Brie de Melun punika gadhah raos ingkang langkung landhep lan ugi langkung asin tinimbang Brie de Meaux. Saking ukuranipun, Brie de Melun gadhah diameter ingkang langkung alit saengga dipunwastani minangka "adhi" saking Brie de Meaux. Benten kalihan Brie de Meaux, Brie de Melun boten ngginakaken rennet nalika proses koagulasi wonten ing susu ananging ngginakaken bakteria asam laktat lan mbetahaken wekdal ingkang langkung dangu. Wekdal paling sekedhik ingkang dipunbetahaken nalika proses koagulasi wonten ing Brie de Melun punika 18 jam, dene wonten ing Brie de Meaux namung 30 menit.

Keju Brie sanèsipun[besut | besut sumber]

Coulommiers[besut | besut sumber]

Asalipun punika saking kutha ingkang sami kaliyan kèju kasebut inggih punika Coulommiers ing Ile-de-France. Kèju punika ngginakaken prosès pematengan kalih minggu. Ukuran saking kèju punika 1/3 saking ukuran kèju Brie paling ageng mawi rasa ingkang alus. Amargi dipunproduksi déning industri lajeng kèju punika saged dipunpanggihaken wonten ing pundi kemawon lan wayah menapa kemawon.

Fougeru[besut | besut sumber]

Kèju punika sekedhik bènten kaliyan kèju Brie sanèsipun amargi ing permukaan kèju punika dipuncaosi godhong pakis. Rasa lan metode anggènipun damel kèju punika wonten miripipun kalihan Coulommiers.

Brie Jerman[besut | besut sumber]

Brie Jerman punika kalebet tiruan saking Brie Perancis. Bobot saking Brie Jerman punika kirang langkung 1 kg dumugi 3 kg ingkang dipunmatengaken kanthi maksimal 4 minggu. Kèju punika ugi wonten ingkang dipuncaosi rempah-rempah ingkang dipuntambahaken dhateng kèju sadèrèngipun dipunmatengaken.

Brie saking susu menda[besut | besut sumber]

Kèju punika boten ngginakaken susu sapi, ananging susu menda. Werna saking kèju punika langkung enem tinimbang kèju Brie ingkang kadamel saking susu sapi.

Pirsani ugi[besut | besut sumber]

Cathetan suku[besut | besut sumber]

  1. ^ a b c d e f (en) Brie, Cheese.com. Diakses tanggal 27 Maret 2013.
  2. ^ a b c (en) What is Brie Cheese?, About.com. Diakses tanggal 27 Maret 2013.
  3. ^ a b c d e (en) Brie, Ile de France. Diakses tanggal 27 Maret 2013.
  4. ^ a b c d (en) What is Brie?, Wise Geek. Diakses tanggal 27 Maret 2013.
  5. ^ a b c d e f g h i (en) The History of Brie Cheese, World Village. Diakses tanggal 27 Maret 2013.
  6. ^ a b c (en) Davidson, Alan (2006). The Oxford Companion to Food. Oxford University Press. ISBN 978-0-19-280681-9.  Page 106,161.
  7. ^ (en) Brie, Cheese-France. Dipunakses tanggal 27 Maret 2013
  8. ^ a b c d (en) Brie de Meaux, The World Wide Gourmet. Dipunakses tanggal 27 Maret 2013.

Pranala njawi[besut | besut sumber]

Sumber artikel punika saking kaca situs web: "https://jv.wikipedia.org/w/index.php?title=Brie&oldid=1015725"