Gunoto Saparie
| Gunoto Saparie | |
|---|---|
 Gunoto Saparie |
Gunoto Saparie (lair ing Kendal, Jawa Tengah, 22 Dhésèmber 1955; umur 68 taun) inggih punika salah satunggalipun sastrawan saking Indonesia. Namanipun misuwur lumantar pakaryanipun awujud carita cekak, geguritan, lan éséi sastra ingkang dipunmot wonten sawenèh ariwarta. Kajawi nyerat karya sastra, piyambakipun ugi nglampahi kiprah organisasi antawisipun Dewan Kesenian Jawa Tengah, Ikatan Cendikiawan Muslim Indonesia Korwil Jawa Tengah, Persatuan Wartawan Indonesia Jawa Tengah, lan Musyawarah Kerja Gotong Royong Jawa Tengah. Gunoto naté dipunpracaya minangka redhaktur ariwarta sonten Wawasan, lan sapunika dados staf ahli ing ariwarta punika.[1][2]
Latar wingking[besut | besut sumber]
Gunoto Saparie lair ing Kabupatèn Kendal, Jawa Tengah. Pendhidhikan dhasar lan manengah dipunlampahi wonten ing Kendal. Salajengipun, mlebet pawiyatan luhur wonten Akademi Uang dan Bank Ngayojakarta lan Sekolah Tinggi Ilmu Komunikasi Kutha Semarang. Gunoto miwiti kiprahipun minangka panyerat nalika taksih ngangsu kawruh wonten sekolah manengah. Nalika samanten, pakaryanipun dipunmot wonten kalawarta minggon Sophia Weekly (Semarang) lan Adil (Surakarta). Awit saking karemenanipun dhumateng jagat kasusastran, arta sangunipun dipuncèlèngi kanggé tumbas kalawarta sastra Horison. Minangka pangagumipun Goenawan Mohamad, Sapardi Djoko Damono, Iwan Simatupang, Emily Dickinson (Amérikah Sarékat), lan Yasunari Kawabata (Jepang), Gunoto rumaos saget nyerat kanthi prayogi umpami sampun dalu, ing madyaning tidhem. Gunoto Saparie kalebet salah satunggalipun panggurit ingkang pakaryanipun karoncé wonten buku kempalan geguritan Dari Negeri Poci 3 taun 1996, Dari Negeri Poci 4 taun 2013, Dari Negeri Poci 5 taun 2014, Dari Negeri Poci 6 taun 2015, lan Dari Negeri Poci 7 taun 2017.
Kajawi nyerat karya sastra, piyambakipun ugi nyerat artikel babagan ékonomi, keuangan, pulitik, lan agama, ing sawenèh ariwarta. Awit saking kaprigelanipun ing jagat kasusastran, Gunoto Saparie asring dipunulemi maos pakaryanipun kalebet dados paiwcara seminar antawisipun ng Bangkok, Thailand (1987), Singapura (1991), Malaka, Malaysia (1991), Johor Bahru, Malaysia (1991), Kuala Lumpur, Malaysia (1991, 2009), Manila, Filipina (1992), lan Bandar Seri Begawan, Brunei Darussalam (2010).
Ing babagan organisasi, awit taun 2016 Gunoto Saparie dipunpracaya nglenggahi minangka Katuwa Dewan Kesenian Jawa Tengah. Wonten ing Dewan Pimpinan Wilayah Partai NasDem Jawa Tengah kadhapuk dados Sekretaris Biro Komunikasi Publik.[3][4][5]
Pedamelan[besut | besut sumber]
Gunoto Saparie naté dipunpracaya minangka redhaktur ariwarta sonten Wawasan Semarang. Sinaosa sampun mboten nglenggahi, piyambakipun taksih dipunpracaya minangka staf ahli wonten ariwarta punika. Salajengipun Gunata ugi pangarsa redhaksi Radio Gaya FM Semarang, redhaktur palaksana tabloid Otobursa Plus Semarang, pangarsa redhaksi Warta Pos Semarang, pangarsa redhaksi Tabloid Faktual Semarang, lan pangarsa redhaksi Kalawarta Kampus Indonesia.
Karya[besut | besut sumber]
- Antologi Puisi Kendal I (1976)
- Antologi Kendal II (1979)
- Kumpulan Puisi Putih! Putih! Putih! (sesarengan Korrie Layun Rampan, 1976)
- Melancholia (1979)
- Kempalan carita cekak Kendal-Semarang-Jakarta (sesarengan Noeng Runua, Abdul Karim Husain, Yetty Nuraini, lan Korrie Layun Rampan, 1980)
- Solitaire (1981)
- Malam Pertama (1996)
- Kumpulan Esai Islam dalam Kesusastraan Indonesia (1986)
- Dari Negeri Poci 3 (1996)
- Dari Negeri Poci 4 (2013)
- Dari Negeri Poci 5 (2014)
- Dari Negeri Poci 6 (2015)
- Dari Negeri Poci 7 (2017)
- Antologi Puisi Aku Bangga Jadi Orang Indonesia (2012)
Ugi pirsani[besut | besut sumber]
Rujukan[besut | besut sumber]
- ↑ Nasional Kompas: DKJT Siapkan sejumlah buku tentang kesenian, kapundhut 21 Fèbruari 2015
- ↑ Badan Bahasa Kemendikbud, kapundhut 21 Fèbruari 2015
- ↑ Kumpulan Karya Puisi: Gunoto Saparie, kapundhut 21 Fèbruari 2015
- ↑ Gunoto Saparie baca puisi di Kedubes Portugal, kapundhut 10 Mèi 2017
- ↑ Sala Pos: Gunoto Saparie baca puisi di Kedubes Portugal, kapundhut 10 Mèi 2017
 | Artikel biografi iki minangka artikel rintisan. Kowé bisa ngéwangi Wikipédia ngembangaké. |