Wikipédia:Artikel pilihan/2015 11
Franz Kafka (3 Juli 1883 - 3 Juni 1924) punika salah satunggling panyerat basa Jerman ingkang wigatos. Kafka lair ing satunggaling kulawarga Yahudi kelas manengah ing Praha, Austria-Hongaria (sapunika ing Céko). Karya-karya wigatosipun kalebet Die Verwandlung ("Métamorfosis" 1915), Der Process ("Prosès Pangadilan" 1925) lan Das Schloss ("Kastil" 1926).
Nalika piyambakipun gesang, pedunung Praha kathahipun mituturaken basa Céko lan pamilahan antawis para pedunung ingkang nganggé basa Céko utawi basa Jerman punika dados kanyatan. Amargi kalih kelompok punika sami-sami ndhedhesaken jatidiri nasionalipun piyambak-piyambak. Komunitas Yahudi asringipun posisinipun antawis komunitas Céko lan komunitas panutur basa Jerman. Prakawis punika temtunipun ndadoskaken Tiyang Yahudi lan utaminipun Kafka dados asring mikiraken posisi badanipun piyambakipun. Kafka piyambak saged baud dhumateng basa Jerman kaliyan basa Céko, nanging basa Jerman dipunanggep minangka basa ibunipun.
Kafka kuliah minangka pangacara. Sasampunipun lulus studi kukum, piyambakipun angsal padamelan ing satunggalipun perusahaan asuransi. Lajeng piyambakipun nyerat cariyos-cariyos cekak.
Kafka remenipun nggegayut kaliyan sanak sadhèrèkipun kaliyan réncang-réncangipun mawi nyerat serat. Piyambakipun nyerat atusan serat dhateng para sadhèrèk kaliyan réncang-réncang èstrinipun ingkat raket. Ingkang naté sami nampi seratipun, inggih punika bapakipun, tunanganipun Felice Bauer saha rayinipun èstri ingkang bontot, Ottla Kafka.
Gegayutanipun kaliyan bapakipun radi njlimet lan prakawis punika saged dipuntuwèni ing karya seratanipun. Piyambakipun ugi ngalami kasangsaran batin déné idèntitas Yahudinipun. Piyambakipun rumaos menawi punika mboten wonten gandhèng-cènèngipun kaliyan badanipun piyambak. Senadyan mekaten, para kritikus sami débat punapa latar wingkingipun minangka Tiyang Yahudi mangaribawani karya seratanipun.