Suminto A. Sayuti

Prof. Dr. Suminto A. Sayuti (lair ing Kabupatèn Purbalingga, Jawa Tengah, 26 Oktober 1956; umur 68 taun) ya iku salah sawijiné seniman saka Indonésia. Jenengé misuwur lumantar sawenèh karyané awujud buku ajar lan sing dimot ing ariwarta lan kalawarta. Suminto ya salah sawijiné guru besar ing Fakultas Basa lan Seni, Program Pascasarjana Universitas Negeri Yogyakarta (UNY).

Latar wuri

Suminto A. Sayuti lair ing Kabupatèn Purbalingga, Jawa Tengah, tanggal 26 Oktober, 1956. Ing dasawarsa 1970-an nalika nyawiji ing Komunitas Persada Studi Klub Yogyakarta, dhèwèké ora naté absen ing forum-forum wawanrembug sastra lan pagelaran-pagelaran geguritan lan téater. Ing saindhengé seniman Yogyakarta, Suminto misuwur minangka "nom-noman bengal" sing ora naté gelem mandeg sinau bab apa waé. Kiprah lan prosès kreatifé kawiwitan saka kasenengané maca lan nulis awit ésih remaja. Sansaya kesengsem déning donyané kasusastran nalika ngidak tlatah Yogyakarta taun 1974. Rikala nyawiji lumebu ing Komunitas Malioboro, dhèwèké teteg nelateni lan ngrembakaké kasusastran Indonésia. Suminto dipracaya dadi salah sawijiné guru besar ing Fakultas Basa lan Seni, Program Pascasarjana Universitas Negeri Yogyakarta (UNY). Sinambi nguri-uri Masarakat Karawitan Jawa sing naté diyasa, Suminta uga nglairaké karya awujud makalah, diktat, buku, kumpulan geguritan, carita cekak, esai sastra, lsp..

Karya

• Kumpulan Sajak Malam Tamansari
• Resepsi Sastra
• Intertekstualitas: Pemandu Pengkajian Sastra
• Ensiklopedia Sastra Indonesia
• Evaluasi Teks Sastra (2000, pertalan The Evaluation of Literary Texts karya Rien T. Segers)
• Semerbak Sajak (2000)
• Berkenalan dengan Prosa Fiksi (2000)
• Berkenalan dengan Puisi (Gama Media, 2002)

Pangaji

• Kedaulatan Rakyat Award, Babagan Kebudayaan (2005)
• Anugerah Sastra Yayasan Sastra Yogyakarta (2014)