Sujeo

Saka Wikipédia, Bauwarna Mardika abasa Jawa / Saking Wikipédia, Bauwarna Mardika abasa Jawi
Jujug: pandhu arah, pados
Sujeo
Satunggal set sujeo
Jeneng Koréa
Hangul 수저
Alihaksara sing Disampurnakaké Sujeo
McCune–Reischauer Sujŏ

Sujeo inggih punika setunggal sèt piranti kanggé dhahar ingkang wonten ing tradisi kulinèr Korea. Sujeo punika wonten séndhok lan sumpit. Tembung sujeo punika asalipun saking tembung sutgarak (숟가락, séndhok) lan jeotgarak (젓가락, sumpit). Ananging sujeo asring ateges séndhok kemawon tanpa mawi sumpit. Nalika dhahar, sendhok lan sumpit punika boten dipunginaken kanthi sareng lan ugi boten dipuncekel kaliyan kalih asta, ananging séndhok lan sumpit punika dipunginakaken kanggé gantosan. Nalika boten dipunginakaken sumpit dipunsukakaken ing sanginggilipun meja.

Sujeo punika dipunsadé kanthi dipunkemas ngginakaken karton utawi kanthong gombal mawi bordiran khas Korea ingkang gadhah motif simbol-simbol umur ingkang dawa.[1] Minangka piranti kangge dhahar, sujeo dipunwastani minangka piranti ingkang paling wigati wonten ing pagesangan. Kejawi punika sujeo dados lambang pagesangan ingkang makmur. Awit saking punika, sujeo asring dipuncaosaken minangka bebungah, mliginipun kangge ulang taun bayi lan ugi adicara mantenan. Sapunika, sujeo ugi dipunsade minangka cenderamata.

Panggunaan sumpit lan sendhok nalika dhahar punika kalebet budaya Korea ingkang unik, amargi boten kapanggihaken wonten ing budaya kuliner ing Asia Wétan sanèsipun kados ing nagara Cina lan Jepang.[2]

Menawi dipunteliti saking kasilipun pangedhukan (penggalian) wonten ing situs arkéologi, séndhok punika sampun langkung rumiyin dipunginakaken déning tiyang Korea tinimbang sumpit.[3] Séndhok sampun dipunginakaken déning tiyang Korea wiwit saking Zaman Perunggu. Lajeng sumpit punika dipunpanggihaken saking artefak asalipun saking zaman Tiga Kerajaan Korea.[3] Dhaharan utama tiyang Korea inggih punika sekul kaliyan sup ingkang dipunwastani jjigae utawi ugi guk. Awit saking punika, rumaos sisah sanget bilih tiyang Korea kasebut dhahar tanpa ngginakaken séndhok. Bènten kalihan sumpit Jepang utawi sumpit Cina ingkang padatanipun dipundamel saking bahan kayu. Amargi sendhok lan sumpit tiyang Korea punika dipundamel saking logam kadosta kuningan, perunggu, perak, utawi baja ingkang tahan marang karat. Wonten ing kabudayan Korea ngginakaken séndhok lan sumpit kanthi wekdal ingkang sami punika dipunanggep boten sopan, mliginipun nalika nembé dhahar kaliyan tiyang sepuh. Padatanipun sumpit namung dipunsukaken ing sanginggilipun meja lan boten dipunlebetaken wonten ing sajroning dhaharan amargi mitosipun punika saged damel sial amargi kados persembahan dhaharan kanggé kuburan para leluhur [4].

Cathetan suku[sunting | besut sumber]

  1. ^ "수저집". The National Folk Museum. 
  2. ^ 주영하. "음식으로 본 한중일 문화인류학 ‘마지막회’] 효과적인 식사도구 숟가락 한국인만 사용하는 이유는?". 신동아 2008 (9): p. 586–697. 
  3. ^ a b "スジョ(수저)". Korean Cultural Center. 
  4. ^ (id) Sujeo, (dipunakses tanggal 8 Maret 2013)
Sumber artikel punika saking kaca situs web: "https://jv.wikipedia.org/w/index.php?title=Sujeo&oldid=1048738"