Sea Life Scheveningen

Saka Wikipédia Jawa, bauwarna mardika basa Jawa
Loncat ke navigasi Loncat ke pencarian
Gedhong Sea Life Scheveningen saka jaba

Sea Life Scheveningen kuwi siji akuarium sagara gedhé ing Scheveningen, Den Haag, Walanda.

Sea Life Scheveningen iku pérangan saka waralaba internasional Sea Life, badan usaha gedhé dhéwé sadonya sing bisnis urusan akuarium lan duwé cabang ing Belgi, Dènmark, Jerman, Inggris, Prancis, Irlandia, Italia, lan Spanyol. Saliyané iku uga ana cabang ing Amérikah Sarékat, Asia, lan Oséania. Sea Life iku bagéan saka Merlin Entertainments Group.

Gedhongé iki dunungé ana ing bulevar, ing pasisir pinggir sagara, manten papané blumbang nglangi umbak. Ing kana kerep ana paméran sawatara irah-irahan, kayata iwak tropis, lobster, kepithing, uwur-uwur, lan bintang laut.

Ing kana uga ana akèh jinising iwak, kayata hiyu lan pari, nanging uga penyu sagara lan asu sagara. Kéwan-kéwan iki dipakani kanthi périodik.

Ing kana uga ana trowongan kaca gedhé sangisoré akuarium, dadi para tamu bisa ngrasakaké saksat mlaku ing antaraning iwak-iwak. Trowongan iki sing lawas dhéwé ing Walanda.

Gedhong iki dirénovasi ing taun 2011.

Crabzilla[besut | besut sumber]

Crabzilla

Ing tanggal 3 Agustus 2010 Sea Life olèh padunung samantara anyar, siji kepithing raksesa Jepang sing diarani Crabzilla. Crabzilla iki dicekel ing Samodra Pasifik cedhak Jepang ing taun 2009. Umuré sakiwa-tengené 40 taun lan aboté 15 kilo saha ambané 3,5 mèter. Dhèwèké bisa dadi luwih gedhé manèh. Sadurungé Crabzilla tau manggon ing Sea Life Birmingham lan Sea Life Blankenberge.

Lumrahé kéwan iki urip ing samodra ing jero 200 nganti 300 mèter, ing ngendi banyu ora bisa dadi luwih panas saka 10 drajat. Kèwan iki pangané bathang, ya iku iwak mati, bintang laut, lan ganggang sagara. Ing Scheveningen awaké dipakani, kerang, cumi-cumi, lan iwak Merlangius merlangus. Dhèwèké bisa nganti wulanan tahan tanpa pangan.

Crabzilla dilih tanggal 8 Maret 2011 menyang Sea Life Paris awit ana rénovasi Sea Life Scheveningen ing taun 2011. Déné kepithing iki bisa kebribèn wong nyambut gawé, kayata wong ngebur utawa aktivitas liyané. Kéwan liya bisa didokok ing kwarantina, nanging kepithing iki kegedhèn.

Pranala njaba[besut | besut sumber]