Plastida

Plastida iku organel sajeroning sèl tetuwuhan (sajeroning makna kang jembar, Viridoplantae). Organel iki paling dikenal ing wanguné kang paling umum, kloroplas, minangka papan lumakuné fotosintesis. Sajeroning kasunyatan, plastida dikenal ing manéka wangun:

• proplastida, wangun durung "diwasa"
• leukoplas, wangun diwasa tanpa ngandhut pigmèn, tinemu mligi ing oyod
• kloroplas, wangun aktif kang ngandhut pigmèn klorofil, tinemu ing godhong, kembang, lan pérangan-pérangan mawa warna ijo godhong liyané
• kromoplas, wangun aktif kang ngandhut pigmèn karotena, tinemu mligi ing kembang lan pérangan liya mawa warna jingga.
• amiloplas, wangun semi-aktif kang ngandhut butir-butir tepung, tinemu ing pérangan tetuwuhan kang nyimpen cadhangan ènergi sajeroning wangun tepung, kaya oyod, rimpang, lan wit (umbi) sarta wiji.
• elaioplas, wangun semi-aktif kang ngandhut tètès-tètès lenga/lemak ing sawatara jaringan panyimpan lenga, kaya endospermium (ing wiji)
• etioplas, wangun semi-aktif kang wangun adhaptasi kloroplas marang lingkungan kurang cahya; etioplas bisa énggal aktif kanthi ambangun klorofil mung sajeroning sawatara jam sawisé nampa cukup cahya.

Plastida iku organel vital ing tetuwuhan. Fungsiné minangka papan fotosintesis, sintesis asem-asem lemak, sarta sawatara fungsi sadina-dina sèl.

Sacara evolusi plastida dianggep prokariota kang simbiosis sajeroning sèl eukariota lan banjur kélangan sipat otonomi penuh-é. Téyori endosimbiosis iki mèmper karo kang kadadéan ing mitokondria nanging introduksi plastida dianggep dumadi luwih mburi.