KMSWT

Kelompok Musik Sastra Warung Tegal (dicekak KMSWT) ya iku salah sijiné kelompok musik rakyat kang asalé saka Kutha Tegal, Jawa Tengah. Kelompok iki diyasa tanggal 11 September 1996 déning Nurngudiono, salah sijiné tokoh seniman ing kutha kuwi. Mula bukané, KMSWT mung kelompok musik cilik tur pinggiran kang asring ngumpul-ngumpul ing Kalurahan Panggung, Kutha Tegal. Anggoné gawé gelaran mung ana ing kampung-kampung waé. Sing mbédakaké kelompok iki karo kelompok liyané, ya iku laguné sing nganggo basa Jawa dhialèk Tegalan.

Anggotané KMSWT asalé ya saka bebrayan umum. Ana sing pagawéyané dadi kuli yasan, buruh, punggawa cilikan liyané, bocah sing pedhot sekolah, lan ibu rumah tangga. Para anggotané ora naté sekolah musik, nanging namung nganggo bakat alam aliyas sinau dhéwé (autodidak), lan ngendelaké naluri musik jalaran saking sregepé gladhèn dhéwé.

Lelakon

KMSWT ngadeg ing Kutha Tegal tanggal 11 Sèptember 1996. Juru yasa KMSWT ya iku Nurngudiono, salah sijiné tokoh seniman saka kutha kuwi. Sasuwéné patang taun awit diyasa, KMSWT durung bisa nyembadani lan durung maju. KMSWT wiwitané mung awujud kelompok musik kampungan biyasa. Lan ing mangsa-mangsa abot kuwi, lair pakaryan lagu kaya ta Dolanan Rakyat, Kembang Geni, Negri Compang-camping, lan liya-liyané. Nanging tujuné KMSWT kedayohan Richard Curtis, guru ing North Teritory University Darwin, Australia. Richard Curtis ndilalahé nembé nganakaké sawijining panalitèn suwéné sawulan. Dhèwèké nemoni KMSWT, ndeleng gladhèné, lan nakoni saben anggota karo pimpinané. Panelitèn iku dumadakan ndadèkaké KMSWT kawentar. Kasilé panelitèn mau kamot ing kalawarta Cost Line, Ostrali. Sabanjuré KMSWT éntuk sengkuyungan saka Wali Kutha Tegal, Adi Winarso.

KMSWT banjur ditawani gawéan déning wali kutha kanggo ngisi adicara Malam Tasyakuran minangka pèngetan dina kamardikané Republik Indonésia taun 2001 ing Pendhapa Ki Gedhe Sebayu. Awit saka iku, KMSWT kawentar jenengé. Ajakan pentas ing kutha-kutha liya padha tekar, kaya jamur ing mangsa udan. Salawasé rolas taun, KMSWT kacathet naté mentaské pakaryan ping 74, 33 antarané kagelar ing Kutha Tegal. Sing liyané, ping papat ing Taman Budaya Jawa Tengah, Surakarta, ping telu mèlu Festival Musik Puisi Tingkat Nasional ing Ngayojakarta, kang sepisanan kagelar ing TVRI Jawa Tengah, kang kaping pindho dibyawarakaké ing Program Horison stasiyun télévisi Indosiar, uga tau pentas minangka duta kagunan Kutha Tegal ing Anjungan Jawa Tengah, Taman Mini Indonésia Indah (TMII), kagelar ing Warung Apresiasi (Wapres) Bulungan, Jakarta Kidul, kagelar ing Rumentang Siang Bandung, kagelar ing Sekolah Tinggi Manajemen lan Ilmu Komputer (STMIK) Tegal, kagelar ing Universitas Diponegoro (Undip), ing Universitas Pancasakti (UPS) Tegal, ing Universitas Indonésia, dikontrak déning KPU Kabupatèn Brebes kanggo sosialisasi Pemilu taun 2004, lan puluhan pagelaran ing pangaji liyané.

Taun 2006, minangka sosialisasi kanggo resik-resik tumrap warga Kutha Tegal, Pamaréntah Kutha Tegal menèhi kapracayan tumrap KMSWT kanggo nyengkuyung program mau, kanthi lagu Tegal Keminclong Moncer Kotane. Lagu kuwi karipta déning Yono Daryono lan Nurngudiono, diputer saben dina ing radhio-radhio ing Kutha Tegal.

Karya-karyané

• Dolanan Rakyat
• Kembang Geni
• Babon Oyok Oyok Jago
• Iwak Nangis Gulung Kuming
• Kedanan Nomor
• Aja Kadiran
• Negri Compang Camping
• Tsunami
• Negri Gemah Ripah Loh Jinawi
• Suradadi Kotane Sing Dadi Nyatane
• Sorak Hore
• Melangkah Lagi
• Tukang-tukang
• Wulan Bunder Nang Nduwur Laut Muara Reja
• Ura-ura Ngluku
• Kowen Donge Sapa
• Godhong Rogrog
• jaman Kala Bendu
• Mbangun Tegal
• Tegal Keminclong Moncer Kotane
• Tukang-tukang Kemoncer