Hakama

Saka Wikipédia Jawa, bauwarna bébas abasa Jawa
Miko ngagem hakama
Mahasiswi ngagem furisode lan hakama nalika wisuda

Hakama (?) inggih punika busana utawi rasukan njawi tradisional Jepang [1]. Rasukan punika ingkang dipunagem kanggé nutupi pinggang dumugi mata suku (mata kaki). Hakama kaginakaken minangka busana andhapan lan kalebet busana resmi tiyang jaler nalika dugi ing adicara formal kados upacara ngunjuk teh, pista nikahan, lan seijin shiki. Laré jaler ngginakaken Hakama nalika ngrayakaken Shichi-Go-San. Montsuki ingkang dipunagem sareng kaliyan hakama lan haori kalebet setelan busana pengantèn priya tradisional. Wonten ing kalangan ulah raga béla dhiri tradisional kados kendo, aikido, lan kyūdō[2], hakama dipunagem déning tiyang jaler lan wanita. Nalika nembé boten gulat, pesumo ngginakaken kimono lan hakama nalika medal ing umum. Ing kalangan Shinto, setelan kimono lan hakama punika busana resmi kannushi lan miko.

Wujud Hakama[besut | besut sumber]

Hakama kadamel saking kalih lembar kain polos awujud trapesium. Pérangan ngajeng diploi, 3 saking sisih kiwa, lan 3 saking sisih kanan. Pérangan wingking boten diploi, ananging dipunperang dados pérangan kiwa lan tengen. Kain pérangan ngajeng lan wingking saking pinggang dumugi dengkul boten dipunjait lan ingkang dipunjait namung saking pérangan dengkul mangandhap. Ing kain pérangan wingking wonten koshi-ita ingkang awujud trapesium saking papan utawi kain ingkang atos kalapis kain malih. Ing ngandhapipun koshi-ita kajangkepi kaliyan sendok sepatu mawi ukuran ingkang alit ingkang dipunsebat hera. Ginanipun kagem dipunselipaken ing obi supados hakama boten mlorot. Kanggé damel supados Hakaman dados kenceng ngginakaken sekawan tali, kalih tali ingkang langkung dawa mapan wonten ing pérangan ngajeng kiwa lan tengen. Lajeng kalih tali ingkang langkung cendhak wonten ing pérangan wingking kiwa lan tengen.

Jinis Hakama[besut | besut sumber]

  • Umanoribakama (馬乗袴?)
  • Andonbakama (行灯袴?)
  • Machiaribakama (襠有袴?)
  • Nobakama (襠有袴?)

Sajarah[besut | besut sumber]

Sanajan sapunika dipun-ginakaken déning tiyang jaler lan èstri, hakama dumugi jaman edo namung dipunagem déning tiyang jaler [3]. Tiyang jaler jaman Yayoi ngagem busana pérangan ngandhap kados kathok dawa. Saking situs arkéologi kapanggih haniwa ingkang ngagem busana kados kathok. Hakama ingkang dipunmangertosi tiyang sapunika asalipun saking kathok ingkang dipun-ginakaken samurai nalika jaman Kamakura. kala punika wonten manéka modhèl hakama, ing antawisipun punika umanoribakana kagem nitih turangga, nobakama, lan hakama kagem kendo.

Tradisi mahasiswi ngagem koburisode lan hakama nalika nglampahi wisuda punika kalebet tilaranjaman Meiji.[4] Kala punika, tiyang èstri wiwit pikantuk sekolah lan ngagem kimono nalika tindak dhateng sekolah. Nalika lenggah ing kursi, pérangan ngandhap kimono dados boten tumata rapi. Kementerian Pendidikan Jepang nalika damel sekolah wanita damel ketetapan setelan kimono lan hakama ingkang rumiyin namung dipunagem tiyang jaler, sapunika ugi kagem tiyang èstri lan guru minangka sragam.[4]

Cathetan suku[besut | besut sumber]

  1. ^ Hakama, (dipunakses tanggal 9 Fèbruari 2013)
  2. ^ Memahami makna hakama dalam latihan kita, (dipunakses tanggal 9 Fèbruari 2013)
  3. ^ Hakama, (dipunakses tanggal 9 Fèbruari 2013)
  4. ^ a b "袴 (Hakama)". 日本文化いろは事典. 

Pranala njawi[besut | besut sumber]

Gakuin)