Gimbap

Saka Wikipédia, bauwarna bébas basa Jawa
Gimbap
Jeneng Koréa
Hangul 김밥
Alihaksara sing Disampurnakaké gimbap
McCune–Reischauer kimbap
Chungmu Gimbap

Gimbap punika jinising tetedhan Koréa ingkang arupi sekul dipunbungkus nori (suket segara), kados sushi.[1] Gimbap kondhang minangka tetedhan ingkang dipunbekta nalika plesiran, minggah redi, utawi kridha sanèsipun ing njawi ruangan.[1]

Sajarah[besut | besut sumber]

Boten dipunngertosi asal-usuling gimbap. Wonten ingkang ngandharaken bilih wewenganing tetedhan punika saking sushi Jepang. Ananging mangkono, kasunyatanipun gimbap punika tetedhan kawula ingkang mirah lan dipundamel saking bahan ingkang gampil. Adhedhasar serat Dongguk Sesigi ingkang dipunserat nalika mangsaning Dinasti Joséon, wonten tetedhan ingkang dipunwastani bokssam (wungkusan kabegjan) ingkang dipundamel saking sekul gulung ingkang dipunbungkus kim (suket segara garing). Bokssam punika tetedhan kanggé dipuntedha nalika wisata utawi minangka sangu kanggé lelampahan. Ing tengahing werni-werni enggal gimbap ingkang sapunika medal, wonten gimbap ingkang dipunanggep asli saking Koréa, inggih punika gimbap chungmu ingkang asalipun saking Chungmu ing pasisir kidul Ujung Koréa. Gimbap chungmu boten wonten isinipun ananging namung arupi sekul gulung suket segara ingkang dipuntedha kalih kimchi lan nus.

Bahan[besut | besut sumber]

Bahan kanggé ndamel gimbap inggih punika sekul, daging, lan janganan. Sekul pethak dipunparingi bumbu sarem lan minyak wijèn utawi minyak perilla. Isènipun ugi manéka warni wiwit saking ulam, daging yuyu, tigan, daging iga sapi, kimchi, kéju, ulam tuna lan sanèsipun. Déné bahan ingkang arupi janganan punika timun, bayem, wortel, lan danmuji (acar lobak). Sedanten isènipun lajeng dipungulung, tumuli padatanipun dipunirisi[2].

Werni-werni ing nagari manca[besut | besut sumber]

Gimbap dipunpilih minangka tetedhan paling dipunremeni saking 100 tetedhan Koréa déning tiyang njawi. Kalawarti minggon paling ageng ing Kanada, Straight nyerat artikel babagan kondhangipun gimbap ingkang nandhingi sushi kanthi irah-irahan Korean kimbap rolls out of sushi's shadow.[3] Ing antawisipun manéka werni gimbap, medal werni kondhang saking kathah nagara, kadosta Gimbap Prancis lan Gimbap California (Amerika). Gimbap Prancis dipundamel bènten saking gimbap sanèsipun amargi lembaraning suket segara garingipun dipungulung ing sekul miturut karemenanipun tiyang Prancis ingkang kirang remen aroma suket segara garing. Gimbap California dipundamel kanthi isèn woh-wohan kados apokat.

Cathetan suku[besut | besut sumber]

  1. ^ a b (en)Passport to Korean Culture. Korean Culture and Information Service - Ministry of Culture, Sports and Tourism , Seoul, Republic of Korea. 2010. pp. 43–44. ISBN 978-89-7375-153-2 03910.  line feed character in |publisher= at position 81 (help)
  2. ^ (id) Gimbap, (dipunaksès tanggal 24 Februari 2013)
  3. ^ (en)Korean kimbap rolls out of sushi's shadow", Straight.com.

Pranala njawi[besut | besut sumber]

Logo Wikimedia Commons
Pirsani galeri bab Gimbap ing Wikimedia Commons.


Sumber artikel punika saking kaca situs web: "https://jv.wikipedia.org/w/index.php?title=Gimbap&oldid=981639"