Fauzie As’ad
Fauzie As’ad (lair ing Bekasi, 1 September 1968) iku jlagra (tukang gawé patung) uga juru lukis. Dhèwèké sinau seni wiwit saka Akademi Desain dan Interior Jakarta (1987-1988). Banjur nerusaké anggoné sinau bab seni ing Fakultas Seni Rupa Institut Seni Indonesia (ISI) Yogyakarta (1989-1994). Sawisé kuwi, dhèwèké nyambut gawé uga sinau ing Laboratorium Seni Patung, Luigi Corsanini, Carrara, Italia.[1]
Anak katelu saka nem sedulur iki nggagas, yèn seni kuwi minangka basa universal kang tanpa wates. Kanthi karyané, dhèwèké bisa nuduhaké apa waé kang dirasakaké lumantar seni kontèmporèr. Miturut Fauzi, kanggo nuduhaké jati dhiri, para seniman ora olèh mandheg ing siji kaprigelan. Amarga bakal ngendhegaké anggoné gawé karya. Seniman kudu njajal nyinau kawruh seni rupa lumantar pakumpulan-pakumpulan seni, satemah ora mung ngripta dhèwèkan waé kareben jati dhiriné diakoni.[1]
Kiprah
[besut | besut sumber]Fauzi pikantuk beasiswa saka Pamaréntah Kerajaan Liechtenstein kanggo nyinau babagan seni rupa saha budaya ing Berlin, Paris, lan London (2000-2001). Saliyané kuwi, dhèwèké uga pikantuk beasiswa Pertama “VP-Bank Kultursipendum” saka VP-Bank ing Vaduz, Liechtenstein (1987). Pamèran tunggal Fauzi, uga tau kagelar ing sadhengah negara antarané : Indonesia, Amérikah Sarékat, Jerman, Liechtenstein, Switserlan, Prancis, Sénégal, Italia, lan Cina.[1]
Ing babagan seni, Fauzi gumun marang Cina. Nalika nyengkuyung Symposium Seni Patung Internasional VII ing Changchung Cina (2004), dhèwèke njlentrèhké manéka panalitèn saha pangalamané ing bab kabudayan, mliginé ing jagad seni rupa Cina kang nganti dadi sing paling apik ing dunya. Ing symposium kuwi Fauzi gawa karyané kanthi irah-irahan The World Altar for Peace and Friendship.[1]
Fauzi duwéni pangajab marang Pamaréntah Indonésia supaya nyengkuyung tumrap uripé seni rupa ing Indonésia. Salah siji carané yaiku nggathukaké antarané seniman, bebrayan agung (masarakat), lan pamaréntah.[1]