Tahu kecing
Tahu kecing ꦠꦲꦸꦏꦺꦕꦶꦁ utawa stinky tofu (basa Inggris) ing basa Cina dijenengaké “chou dou fu“, 臭豆腐.[1] Stinky tofu yaiku tahu fermentasi, sing duwe ambu kecing utawa ora énak, tajem, kayadené ambu kaos kaki sing ora tau diumbah utawa kèju biru. Tahu iki dijengaké tahu mambu utawa tahu bosok amarga ambuné, malah amarga saking mambuné, ana sing nyebut tahu iki baby poo utawa eek bayi. Stinky tofu duwe tèkstur sing enteng lan dadi nyamikan, ing jero tahu iki rasané alus lan njabane garing kempripik, uga warnané luwih peteng saka tahu gorèng biasané. Nanging panganan iki dadi panganan sing disenengi wong akèh ing negara kayadéné Hong Kong, Taiwan lan Cina.[2] Saya mambu tahuné saya énak rasané. Tahu iki biasané didadèkaké jajanan sing didol ing toko pinggir dalan. Tahu kecing iki ora bisa didol ana ing restoran amarga mambu banget lan mung kalebu jajanan dudu panganan sing biasané dipangan karo sega utawa panganan pokok padinan. Tahu mambu iki wis kaya jajanan khas Taiwan kang ora bisa adoh saka masyarakaté.
Panggonan sing Dodol Tahu Kecing[besut | besut sumber]
Jajanan tahu iku bisa ditemukaké ana ing pasar malem lan pasar tradisional Taiwan, akèh papan panggoan kang biasané dadi tujuané para turis yaiku toko pinggir dalan lan dalan-dalan sing wis tuwa utawa sithik penduduké (lao jie, 老街) mesti énèk sing dodol tahu iki. Sing paling penting, ngolèki tahu iki gampang banget, awakédhéwé bisa ngambu ambuné tahu kecing kui kanthi gampang amarga saking mambuné ora karuan. Shenkend Old Street ing Shenkeng (深坑) sing cedhak karo kebun binatang Taipei nyediaaké tahu iki wong-wong biasané padha nyebut tahu iki tahu dalan (street tofu). Tahu iki dadi jajanan paling laris lan misuwur ana ing kalangané turis-turis Asia.
Chou doufu iki uga didol ing Cina lan Hong Kong kang akeh wong padha jajan. Uga ana sing adol ing Singapore lan Malaysia sing akeh wong Cinané kaya ta Malaka lan Penang. Nanging tahu kecing iki paling akeh ditemukaké ana ing Taiwan kang akèh didol ana ing Liang Popo (梁婆婆臭豆腐) Taichung. Ana rong panggonan sing adol tahu kecing iki, yaiku :312 Meitsun Rd, Sect. 1, West District 187, Section 3, Dongxing Rd, Nantun District
Cara Ngawé Tahu Kecing[besut | besut sumber]
Dasaré tahu mau ora ana rasané lan ora mambu babar blas. Kanggo ngawé stinky tofu, tahu difermentasiaké kanggo banyu uyah lan campuran bahan liané, banjur dilebokaké ana ing njero kwali. Tahu mau dikum enem wulan suwéné ana ing njero kwali kui mau. Sabaré tahu dibilas lan dinengaké sawengi ing njero lemari és sadurungé diolah nganggo manèka warna cara. Saliyané cara kui mau, uga ana sing ngandharaké menawa tahu kecing iki, digawé nganggo cara dikum banyu susu. Tahu sing ijik anyar dikum ana ing banyu susu, lan ditambahi daging utawa sayur-sayuran (akeh jenisé lan biasané dirahasiaaké karo sing ngawé) tahu sing kaya megkono mau karo masyarakat dijenengake tahu kèju biru. Tahu iki bisa disajèkaké kanthi cara dibakar, digodhog, digorèng, dikukus utawa digorèng garing. Saben sacara ngolah duwé ambu, rasa, bentuk lan warna sing béda-béda. Tahu sing diolah nganggo cara dibakar, tahu kui mau dilebokaké ana ing njero pring sing njeroné diwènèhi sunduk. Jajanan iki ambuné nyegrak banget nanging yèn dicakot, tahuné empuk lan kaya ana rasa susu ing tengahé lan saos thokolan pedes ing sanduwuré tahu pas banget rasané kanggo nambah énaké tahu.[3]
Cara Mangan Tahu Kecing[besut | besut sumber]
Stinky tofu (Tahu kecing) biasané disajikaké kaya jajanan biasané sing diwadahi adah cilik (box/ kothak), box/ kothak sing biasané bisa digawa mulih utawa uga bisa dipangan ing warungé. Tahu sing digoreng garing biasané diwènèhi saos sing isinè timun, thakolan, lan loncan sing diwènèhaké ana ing nduwuré utawa ing sakabéhing tahu. Rata-rata padha mangan nganggo sunduk, dadi tahu sing bentuké kothak dijupuk nganggo sunduk banjur dicakot. Nanging uga ana sing mangan nganggo sendok utawa garpu.
Regané Tahu Kecing[besut | besut sumber]
Rega tahu iki murah banget box (pakètan sakothak) sing isine 5 utawa 6 tahu diregani 35 nganti 50NT$ utawa Rp.16.177 nganti Rp.23.111 saben sabox. Nanging, tahu sing digodhog diregani 60 nganti 70NT$ utawa yèn dirupiahké dadi Rp.27.733 nganti Rp. 32.355 sak mangkoké.
Jenis-Jenis Tahu Kecing[besut | besut sumber]
Ana akèh jenisé tahu kecing iku, yaiku dimasak, dibakar, diasepi, digodhog lan digorèng garing. Tahu iki bisa krasa banget ambuné nalika digorèng garing uga paling akèh ditemuaké. Saliané iku, ana tahu kang rasané kaldu pedes sing disebut mala stinky tofu (麻辣臭豆腐) tahu iki dadi tahu paling laris nomer loro sabaré tahu sing digorèng garing.
Apik Ora Kanggo Kasehatan?[besut | besut sumber]
Tahu mambu kecing sing digorèng garing iku ora pati séhat menawa dipangan sabendinané. Amarga akeh minyak sing nyerep ing jero tahu, sing bisa nambah lemak jenuh ing awak. Nanging, tahu kecing sing diolah kanthi cara liyané kayadéné digodhog, bakal luwih apik kanggo kesehatan awak lan ora kena-napa yèn dipangan saben dina. Kudu dimangertèni menawa sehat orané panganan iku gumantung saka kepiyé anggoné ngolah. Amarga tahu kecing iki kalebu jenis jajanan sing didol ana ing pinggir dalan lan pasar-pasar tradisional, luwih becik menawa anggone mangan ora kekerepen supaya ora gawé lara ing awak utawa nganggu kaséhatan awak kita.
Rujukan[besut | besut sumber]
- ↑ "Taiwan Stinky Tofu, The ultimate street food to challenge your taste buds!". Taiwanese Secrets Travel dan Living Guide.com. Dibukak ing 2019-05-12.
- ↑ Odi (2012-01-23). "Chou Doufu, Menyengat Baunya dan Lezat!". Detik Food.com. Dibukak ing 2019-05-14.
- ↑ Kelly, Robert (2013-01-24). "A Taiwanese Stingky Tofu Tour". BBC.com. Dibukak ing 2019-05-12.