Mohamed Boudiaf

Mohamed Boudiaf
محمد بوضياف
Mohamed Boudiaf; محمد بوضياف
Présidhèn Aljazair angka 4
	Linggih; 14 Januari 1992 – 29 Juni 1992
Kang sadurungé	Chadli Bendjedid
Kang sawisé	Ali Kafi
Rerincèn dhiri
Lair	23 Juni 1919; Ouled Madhi, Aljazair
Pati	29 Juni 1992 (umur 73); Annaba, Aljazair
Parté pulitik	Front de Libération Nationale
Sisihan	Fatiha Boudiaf
Agama	Islam

Mohamed Boudiaf (Arab: محمد بوضياف‎‎, utawa misuwur uga kanthi jeneng sesinglon Si Tayeb El-Watani (سي الطيب الوطني) (lair ing Ouled Madhi, Aljazair, 23 Juni 1919 – pati ing Annaba, Aljazair, 29 Juni 1992 ing umur 73 taun), iku pamimpin pulitik Aljazair lan salah sijining pangadeg parté revolusionèr Front de Libération Nationale (FLN), kang nduwé peran wigati sajeroning Perang Kamardikan Aljazair (1954–1962).

Ing mangsa kolonial Prancis, dhéwèké mèlu golongan paramilitèr rahasia anama Organisation Spéciale (OS). Boudiaf nduwé tanggung-jawab ngatur jaringan organisasi iki ing wewengkon Sétif, nimbun senjata, ngumpulaké béaya lan nyiapaké wadyabala gerilya. Amerga iku dhéwèké diukum in absentia 10 taun kunjara déning pamaréntah kolonial Prancis, nanging dhéwèké lunga minggat. Ing tanggal 1 November 1954, Front de Libération Nationale (FLN) molai nglancaraké serangan militèr gedhé-gedhéan marang Prancis. Boudiaf sing saiku wis dadi sawijining pamimpin utama parté iku, banjur nerusaké nyambut gawé saking Kairo lan nagara-nagara tanggané Aljazair. Ing taun 1956, dhéwèké karo Ahmed Ben Bella lan liya-liya pamimpin FLN ketangkep bala Prancis nalika aksi kontrovèrsial pambajakan montor mabur. Boudiaf banjur dikunjara ing nagara Prancis. Sanadyan mangkono, dhéwèké tau diusung FLN dadi mantri papréntahan ing pangasingan, lan tetep njabat posisi iku nganti taun 1961. Boudiaf ora diuculaké saking pakunjaran nganti mèh waé Aljazair mardhika ing taun 1962.

FLN tibaké kapisah dadi fraksi-fraksi sing pada saingan nalika wadyabala kolonial Prancis mundur saka tlatah Aljazair. Boudiaf sempet ngadegaké parté oposisi 'ngisor lemah', Parti de la Révolution Socialiste (PRS), sing ndèrèk ngraman marang papréntahan FLN sing saiku wis dadi parté panguwasa tunggal ing nagara iku. Boudiaf kapeksa urip sajeroning pangasingan ing Maroko. Ing awal taun 1992, sawisé 27 taun pangasingané, golongan militèr ngundang dhéwèké tampil dadi kepala Dhéwan Dhuwur Nagara Aljazair (Haut Comité d'État). Dhéwèké nrima lan dadi tokoh simbul sing ngwakili junta militèr, nurutaké pambatalan asil pamilian umum sing mèh menangaké parté Islamis, Front Islamique du Salut (FIS).

Ing tanggal 29 Juni 1992, mangsa kalungguhan Boudiaf sebagé kepala Dhéwan Dhuwur Nagara kandheg amarga dhéwèké diperjaya déning pengawal pribadhiné dhéwé, nalika pidhato ing televisi sajeroning acara paresmian pusat kabudayan kutha Annaba. Prastawa iku kadadèn ing kunjungan kanagaraan pisanané ing luwar kutha Aljir sawisé dhéwèké njabat kepala nagara Aljazair. Kedadéan pépaten iku nggawé rasa kagèt sanget kanggo kabèh masarakat Aljazair, lan dadi prakara wigati sing tansah kélingan ing sajarahé nagara iku.

Wacanan

Achour Cheurfi, La classe politique algérienne, de 1900 à nos jours. Dictionnaire biographique (Casbah Editions, 2nd edition, Algiers 2006)

Kang sadurungé Chadli Bendjedid	Kepala Dhéwan Dhuwur Nagara 1992	Kang sawisé Ali Kafi