Menara Seoul N

Saka Wikipédia, Bauwarna Mardika abasa Jawa / Saking Wikipédia, Bauwarna Mardika abasa Jawi
Jujug: pandhu arah, pados

Menara Seoul N punika namaning pemancar radio ingkang wonten ing Gunung Namsan, Seoul, Korea Selatan. Gedung punika dipunbangun nalika taun 1969 lan dipunbikak kanggé masyarakat umum nalika taun 1980 Menara punika dipunbangun kanthi beaya $2.5 juta lan dados simboling kutha Seoul [1]. Menara ingkang kawéntar kaliyan nama Menara Namsan utawi Menara Seoul punika dipungantos dados Menara Seoul N awit saking ingkang gadhah punika kerjasama kaliyan CJ Corporation lajeng menara punika dipunparingi nama Menara Seoul N inggih punika nama resmi Menara Seoul CJ. Miturut info saking KBS World menara punika gantos nama énggal saksampunipun dipun-renovasi [2].

Fasilitas[sunting | besut sumber]

Menara Seoul N kanthi dhuwur dumugi 236.7 m (777 kaki) saking dasar lan wonten ing ketinggian 479.7 m (1,574 kaki) ing nginggiling permukaan laut. Kathahipun para rawuh nitih kereta gantung Namsan kanggé manginggil, lajeng mlampah saksampunipun dumugi menara. Menawi tindak dhateng tingkat paling inggil punika saged ngginakaken lift kanthi kacepetan inggil. Ing mriku saged ningali éndahing kutha Seoul kanthi wiyar lan jelas saking balkon observasi. Mliginipun wonten ing balkon observasi punika saged ningali papan-papan ingkang kawéntar ing kutha Seoul kanthi piranti teleskop digital sesarengan kaliyan andharan babagan sajarahing kutha Seoul kanthi jangkep, media art digital, lan sanèsipun [3].

Menawi wanci dalu swasana ing Menara Seoul N katon langkung éndah amargi hiasan lampu-lampu saking bangunan, kendaraan lan sanèsipun ingkang madhangi Kutha Seoul. Ing mriku ugi wonten restoran ingkang nyameptakaken dedhaharan Korea lam Italia ugi restoran mubeng kanthi nama N Grill. Ingkang langkung menarik malih restoran kasebut saged mubeng pisan ing jangka wekdal 120 menit saéngga damel para rawuh saged nedhi dedhaharan sinambi ningali 4 arah Kutha Seoul saking meja makan punika.

Kejawi pemandangan wonten ugi macem-macem karya seni, teknologi cahya, lan manéka warna kegiatan ingkang saé. Wonten ing menara punika wonten toko angsal-angsal lan griya dhahar utawi restoran wonten ing lantai ngandhap. Ing celakipun Menara Seoul N punika wonten ugi Menara Transmisi.

Tradisi Masang Gembok Cinta[sunting | besut sumber]

Gembok Cinta

Gembok cinta utawi love lock punika gembok biasa ingkang dipunpasang ing papan-papan ingkang sampun kasiapaken wonten ing Menara Seoul N. Gembok punika dipunpitadosi minangka lambang cinta pasangan kekasih. Miturut Korea Times, tradisi punika kawiwitan nalika satunggaling pasangan ingkang kagungan inspirasi bab ingkang sami ing Menara Tokyo. Kejawi punika wonten pasangan selebriti ingkang damel janji ing papan punika kanthi cara masang gembok lajeng kuncinipun dipunguwang tebih saking nginggiling menara. Miturut mitosipun, menawi sampun pasang gembok pasangan punika bakal langgeng [4] .

Cathetan suku[sunting | besut sumber]

  1. ^ [1], (id)http://www.koreanmaniac.com (dipun-akses tanggal 30 November 2012).
  2. ^ [2], (id) http://rki.kbs.co.kr (dipun-akses tanggal 22 Oktober 2012).
  3. ^ [3], (id)http://www.innikorea.com (dipun-akses tanggal 30 November 2012).
  4. ^ [4], (id) http://wolipop.detik.com (dipun-akses tanggal 30 November 2012).
Sumber artikel punika saking kaca situs web: "https://jv.wikipedia.org/w/index.php?title=Menara_Seoul_N&oldid=980323"