Hifa

Saka Wikipédia Jawa, bauwarna bébas abasa Jawa
Sapérangan hifa Penicillium mawa badan woh

Hifa (basa Latin: hypha, jamak hyphae) iku struktur biologis arupa berkas-berkas alus sing arupa péranganing badan vegetatif manéka fungi ("karajan jamur"). Hifa bisa kanthi gampang dideleng nganggo mata yèn wis mbentuk massa sing rapet lan mbentuk koloni-koloni ing pérangan badan organisme inang utawa sisa-sisa organisme utawa panganan, ditepungi minangka miselium (mycelium, jamak mycelia). Bisa ditelakaké, hifa iku wujud badan jamur sing sabeneré. Struktur kanthi wangun mèmper payung sing biyasa ditepungi wong minangka jamur ora liya mung piranti réprodhuksi sing ditepungi minangka badan woh, sing muncul mung nalika-wektu.

Kanggo fungi, hifa duwé peran sing sithik okèh kaya oyot lan godhong ing tetanduran sisan. Hifa tuwuh nyebar sajeroning badan utawa kabèh pérangan organisme. Wangun hifa sing alus miyaraké lumah kontak karo substrat (obyèk panganané). Hifa banjur ngeculaké enzim utawa substansi liya (mliginé ing fungi sing urip ing jaringan urip) ing substrat supaya sabanjuré diasilaké senyawa-senyawa kimia tinentu (mligi karbohidrat). Hifa banjur nyerep manèh senyawa-senyawa kimia iki kanggo dimupangataké sajeroning metabolisme internal. Cara makarya kaya iki sing njalari fungi béda karo eukariota liyané, kaya tetanduran (autotrof) utawa kéwan (sapenuhé heterotrof). Fungi, kanthi cara makarya hifa kaya iki, ditepungi minangka saprotrof.

Saberkas hifa iku sèl tunggal. Siji koloni hifa sing bisa dianggep kumpulan sèl-sèl raseksa lumrahé wanguné bunderan kanthi dhiameter sapérangan sentimeter. Sanajan mangkono, sapérangan fungi/jamur alas duwé jaringan hifa nganti puluhan mèter dhiameteré.

Hifa biyèn dinggo mbédakaké kelas-kelas ing fungi. Fungi mawa hifa ora ana sekaté (Phycomycetes, "jamur ganggang") dibédakaké saka sing mawa sekat (Ascomycetes, Basidiomycetes, lan Deuteromycetes).