Avianti Armand
Avianti Armand (lair ing Jakarta, 12 Juli 1969; umur 55 taun) inggih punika seniman saking Indonésia. Namanipun sampun misuwur lumantar sawenèh karyanipun awujud geguritan ingkang dipunmot wonten ariwarta lan kalawarta. Kajawi nyerat, piyambakipun ugi nelateni pedamelan minangka juru gambar yasan (arsitek) lan dhosèn tamu ing Jurusan Arsitektur Universitas Indonesia lan Disain Interior, Fakultas Disain Interior Universitas Pelita Harapan. Avianti Armand punika salah satunggalipun panampi pangaji Kusala Sastra Khatulistiwa ing kategori geguritan lumantar pakaryanipun kanthi sesirah Perempuan yang Dihapus Namanya, ing taun 2011.[1][2][3][4][5]
Latar wingking
[besut | besut sumber]Avianti Armand miyos ing Jakarta, tanggal 12 Juli 1969. Wiwit taksih remaja, piyambakipun sampun raket dhumateng donyaning kasusastran mliginipun geguritan. Karyanipun kasil dipunmot ing sawenèh ariwarta lan kalawarta. Kajawi nyerat, Avianti Armand ugi nelateni pedamelan minangka juru gambar yasan (arsitèk) awit taun 1992. Rancangan gambar griyanipun kepara menangi pangaji saking IAI (Ikatan Arsitek Indonesia), ing taun 2008. Taun 2010 piyambakipun nggagas ngyasa bengkel kerja lan pagelaran arsitèktur lan kutha kanthi tajuk Ruang Tinggal Dalam Kota ingkang ditindakaken ing Komunitas Salihara. Taun punika ugi, Avianti Armand dipundhapuk minangka kurator Pameran Arsitek Muda Indonesia. Ing taun 2015, Avianti Armand dipundhapuk dados katua Komite Desain ing Pameran Buku Internasional Frankfurt, Jerman.
Awit taun, 2008, karyanipun ing kancah kasusastran sansaya inggil lumantar panyeratan fiksi, geguritan, lan artikel babagan arsitèktur. Buku carita cekak kaping pisan anggitanipun, dipunbabar taun 1999 kanthi sesirah Negeri Para Peri. Salah satunggalipun cariyos ing buku punika kasil mlebet ing Cerpen Terbaik Kompas taun 2009. Buku geguritan kanthi latar kitab suci Prajanjian Lami sesirah Perempuan yang Dihapus Namanya, ingkang dipunbabar taun 2010 kasil nglantaraken piyambakipun nampi pangaji Kusala Sastra Khatulistiwa ing kategori Puisi, sesarengan Arafat Nur lumantar karyanipun ingkang sesirah Lampuki (fiksi) lan Nirwan Dewanto lumantar karyanipun ingkang sesirah Buli-Buli Lima Kaki (geguritan), ing taun 2011.
Ugi pirsani
[besut | besut sumber]Rujukan
[besut | besut sumber]- ↑ "Kusala Sastra Khatulistiwa". Diarsip saka sing asli ing 2015-02-23. Dibukak ing 2017-04-30.
- ↑ "Hot Detik: Perempuan yang Dihapus Namanya' Didiskusikan". Diarsip saka sing asli ing 2015-07-15. Dibukak ing 2017-04-30.
- ↑ Cerpen Pilihan Kompas: Avianti Armand
- ↑ Google Books: Avianti Armand
- ↑ "News-Indonesia Kreatif: Venice Architecture Biennale 2014". Diarsip saka sing asli ing 2016-03-07. Dibukak ing 2017-04-30.