Potlot

Saka Wikipédia, Bauwarna Mardika abasa Jawa / Saking Wikipédia, Bauwarna Mardika abasa Jawi
Langsung menyang: pandhu arah, pados
Lead Pencils

Potlot yaiku piranti tulis lan nglukis.[1] Potlot kang sepisanan digawé saka grafit murni.[1] Carané nulis kanthi nggésék grafit ing média.[1] Ananging grafit murni gampang tugel, kalusen, lan ménéhi éfék reged nalika media gesekan karo tangan.[1] Saliyané iku uga nggawé reged lemah nalika dicekel.[1] Sawisé iku banjur digawé campuran grafit karo lemah lempung supaya komposisiné rada atos. [1]Campuran kang digawé saka grafit lan lemah lempung iki banjur dibungkus kertas utawa kayu.[1]

Sajarah[sunting | sunting sumber]

Pulas
Asahan potlot
Potlot Dermatograf

Timbal lan grafit wis dianggo wiwit jaman Yunani. Kekarone menehi efek goresan werna klawu, sanajan grafit wernane luwih ireng sithik. Grafit arang banget dianggo nganti ing taun 1564 ditemukake kandhutan grafit murni kang cacahe gedhe ing Borrowdale, lembah ing Lake District, Inggris bageyan lor. Sanajan arep kaya batu bara, mineral iku ora bisa dibakar, lan ana tipake werna ireng meling-meling, sarta gampang dibusak. Ing jaman iki maksud tembung grafit isih dipadhakake karo timah, timah ireng, lan plumbago, kang tegese "kaya timah" amarga sipate kang arep padha. Mula, tembung lead pencil (potlot timah) isih dianggo nganti tekan saiki. Amarga teksture ngandhut minyak, mula bongkahane dibungkus karo kulit wedhus utawa prethilan timah kang awujud tongkat ditaleni nganggo tali. Ora ana sing ngerti sapa sing pisanan nduweni pikiran nglebokake timah ireng ing sajroning kayu, nanging ing taun 1560-an, potlot kang primitif wis tekan ing benua Eropa.

Ora suwe banjur timah ireng ditambang lan diekspor kanggo njangkepi panjalukane para seniman. Ing abad kaping 17 timah ireng wis dianggo ing ngendi-endi. Nalika iku wong-wong sing nggawe potlot padha nyoba nganggo timah ireng nggawe piye carane bisa ngasilake piranti tulis kang apik. Amarga isih murni lan gampang diekstrak, timah ireng saka Borrowdale digoleki dening para maling. Pramila, Parlemen Inggris nggawe undang-undang ing taun 1752 kang isine maling timah ireng bisa dipenjara utawa dibuang menyang koloni narapidana.

Sasuwene pirang-pirang taun, grafit Inggris memonopoli industri panggaweyan potlot amarga cukup murni kanggo digawe tanpa perlu diproses maneh. Amarga grafit Ropa mutune kurang, mula pabrik-pabrik potlot ing kana nyoba nggawe piye carane kanggo ngasilake isi potlot kanthi apik. Insinyur Prancis Nicolas-Jacques Conté nyampurake bubuk grafit karo lempung, banjur campuran iku dibentuk dadi dawa-dawa, lan dibakar. Kanthi ngowah-owahi perbandingan grafit karo lempung, dheweke bisa nggawe isi potlot kang bisa ngasilake pirang-pirang campuran werna ireng. Proses kaya ngene iki isih dianggo nganti tekan saiki.

Nanging ing taun 1779, ahli kimia kang jenenge Carl W. Scheele nliti lan ngandharake asil panelitene yen grafit nduweni sipat kimiawi kang beda adoh karo timbal. Grafit yaiku komposisi molekul karbon murni kang empuk. Pungkasane, ing taun 1789 ahli geologi Jerman, Abraham G. Werner menehi jeneng grafit, kang asale saka tetembungan Yunani graphein kang tegese nulis.

Ing abad kaping-19, panggaweyan potlot dadi bisnis gedhe. Grafit ditemukake ing pirang-pirang panggonan, yaiku Siberia, Jerman, lan kang saiki diarani Republik Ceko. Banjur pabrik-pabrik potlot dibuka ing Jerman lan ing Amerika Serikat. Mekanisasi lan produksi massal ndadekake regane mudhun, ing awal abad kaping-20, bocah-bocah ing sekolah mulai migunakake potlot.

Ing pisanan potlot grafit dibuntel nganggo kertas kang wis disuwek. Banjur ditemokake cara kang luwih kepenak lan efisien kanthi mbuntel sakabehing gagang grafit nganggo kayu kang wis disigar lan digawe dhekok kanggo panggonan nyimpen gagang grafit mau banjur digabungake.

Grafit murni luwih disenengi para seniman amarga karakteristike kang luwih lugas. Nanging yen dianggo saben dina, dibutuhake grafit kang kualitase ora patiya apik suapaya fleksibel. Ing taun 1795, ahli kimia Perancis, Nicolas Jacques Conté, nemokake cara nyampur grafit karo lempung supaya ngasilase potlot kang luwih apik lan praktis. Salah siji prodhuk turunane yaiku potlot Konte.

Nalika 30 Maret 1858 Hymen Lipman saka Philadelphia, Pennsylvania, Amerika Serikat matenake potlot kang ana busake ing pucuke. Nanging paten iki banjur dibatalake amarga janjane ora panemonan kang anyar saka potlot iku. Asahan potlot mekanik ditemokake ing taun 1880 lan dadi misuwur kanthi cepet.

Ing jaman modern, potlot digawé kanthi ngejur grafit lan lemah lempung dadi bentuk bubuk.[1] Campuran iki banjur diwénéhi banyu, lan diangin-anginké lan dibakar kurang luwih telung dina.[1] Sawisé iku potlot banjur dicithak dadi bentuk kang dawa lan tipis.[1] Potlot kang wis dicithak banjur dibungkus kayu kang teksturé alus.[1]

Sepisanan potlot luwih akéh digawé kanthi wujud kothak.[1] Iki disebabaké amarga mesin prodhuksi kang isih durung maju.[1] Sawisé ditemokaké mesin prodhuksi kang luwih canggih, potlot banjur bisa dicithak kanthi bentuk bunder saengga gampang lan kepénak nalika dicekel.[1] Sanajan ngono ana uga kang seneng nganggo potlot kang bentuké kothak awit gampang dicekel lan luwih kuwat nalika dicekel.[1]

Potlot Modern[sunting | sunting sumber]

Potlot saiki mujudake piranti tulis lan gambar kang canggih sarta serbaguna, kang saben taune diproduksi ing sakabehing donya cacahe nganti tekan milliaran-iji. Potlot biasa bisa nggawe garis kang dawane 60 kilometer lan bisa kanggo nulis nganti tekan 45.000 tembung. Isi potlot mekanis, kang gagange saka bahan logam utawa plastik, ora usah diasah. Minangka gantine grafit, pulas diisi saka bahan pewarna lan pigmen kang cacahe nganti tekan puluhan werna.

Karakteristik[sunting | sunting sumber]

Béda karo polpèn, potlot nduwéni werna abu-abu kang pecah yèn dibandingaké karo polpen kang wernané padhet lan katon landhep. [2]Potlot uga luwih gampang dibusek tinimbang polpèn.[2] Ana uga potlot kang digawé kanthi setip ing dhuwuré.[2] Supaya nalika salah bisa nggunakaké setip ing dhuwuré.[2] Potlot kanthi bentuk iki biyasané luwih disenengi bocah sekolah.[2] Ananging seniman kang profesional luwih mentingaké mutu potlot.[2] Seniman luwih seneng nggunakaké potlot kang ora ana setipé.[2] Awit potlot kang ana setipé biyasané nduwéni ukuran setip kang cilik saéngga nalika mbusak akéh bakal cepet enték lan isih durung resik anggoné mbusak.[2]

Identitas[sunting | sunting sumber]

Pensil dibedakake miturut komposisine. Aksara B nguduhake kandel tipise (boldness), kang tegese kandhutan grafite luwih akeh. Dene aksara H nguduhake atos orane komposisi lead, kang tegese kandhutan lempunge luwih akeh. Potlot kanthi aksara F tegese komposisine mathuk benget yen diasah kanthi pucuk kang maksimal. Dene angka ing sangarepe aksara nguduhake tingkat kandel utawa atos komposisi potlot. Kayadene 2H iku luwih atos tinimbang H, utawa 2B iku luwih empuk lan luwih kandel tinimbang B. HB tegese potlot iku nduweni sipat kang atos lan kandel.

Werna potlot nguduhake area produksine. Pabrik-pabrik ing Amerika Utara menehi werna kuning, Jerman lan Brasil menehi werna ijo. India lan pirang-pirang panggonan ing Asia menehi werna ireng lan abang. Swiss menehi werna abang. Dene Inggris menehi werna kuning lan ireng.

Jinising Potlot[sunting | sunting sumber]

180pxPotlot mekanik

Anane kemajuan teknologi material lan manufaktur ndadekake akehe jinis potlot kang bisa katemokake ing pasar miturut kaprigelane, kayata:

  • Potlot timah
  • Potlot grafit murni
  • Potlot mekanik
  • Pulas (Potlot warna)
  • Potlot Konte
  • Potlot awujud pastel
  • Potlot dermatograf

Isu Kesehatan[sunting | sunting sumber]

Akeh banget wong kang nganggo ptolot kapusan karo tetembungan lead pencil lan nyana yen jinis potlot iki ngandhut bahan kimia kang ana racune. Kasunyatane potlot timbal ngandhut grafit lan lempung, bahan alami kang isih kalebu senyawa karbon kang ora mbebayani kanggo awak. Nanging ana pirang-pirang kasus amarga tipak potlot kang ditujesake menyang kulit ndadekake tipak kang wernane semu ireng lan ora bisa ilang.

Chatetan suku[sunting | sunting sumber]

  1. ^ a b c d e f g h i j k l m n o (en)Pencils and Pencil Lead pubs.acs.org(dipunundhuh tanggal 28 Juni 2011)
  2. ^ a b c d e f g h (en)History of the Lead Pencil officemuseum.com(dipunundhuh tanggal 28 Juni 2011)

Artikel punika taksih tulisan rintisan (stub). Sinten kémawon ingkang kersa mbenakaken, sumangga kémawon.

Sumber artikel punika saking kaca situs web: "http://jv.wikipedia.org/w/index.php?title=Potlot&oldid=837216"