Surimi

Saka Wikipédia Jawa, bauwarna bébas abasa Jawa
Pasta surimi wonten ing mangkok

Surimi (擂り身) utawi mawi teges daging ingkang sampun dipundamel alus, punika bahan dedhaharan saking ulam ingkang dipunalusaken saéngga awujud kados pasta. Padatanipun bahan punika dipunwadahi wonten ing plastik mawi kahanan ingkang beku lajeng dipundamel leleh lan dipunolah dados dhaharan. Kanthi sipatipun ingkang fleksibel lan netral, surimi saged dipundamel dados manéka imitasi dedhaharan segara. Amargi dipundamel saking daging ulam, crab stick imitasi ingkang dipundamel saking surimi punika saged dados pilihan ingkang langkung mirah saking lobster utawi yuyu asli. Kejawi punika, surimi punika asilipun seragam saéngga langkung dipunremeni kanthi produk masal kamoboko dipuntandhingaken kalihan daging ulam asli.[1]

Bahan baku[besut | besut sumber]

Miturut teknis sadaya jinis ulam saged dipundamel surimi. Ananging padatanipun surimi dipundamel saking daging ulam mawi warni putih.[2] Kathahipun ulam ingkang padatanipun dipunagem punika Alaska pollock, ananging amargi penangkapan ingkag sarwa linuwih dados populasi ulam punika kathah kirangipun saengga wonten alternatif ulam sanes.[3]

Pangolahan surimi punika kalihan toya, sarem utawi polifosfat (gumantung jinis surimi ingkang badhé dipundamel), MSG, krioprotektan ingkang njagi protein saking denaturisasi lan gula. Kagem damel sae sipat ingkang boten elastis saperangan jinis ulam punika saged ugi dipuntambah kalihan protein nabati utawi jinis ulam sanèsipun kados nus. Déné kagem daging ulam mawi lemah utawi gajih ingkang inggil dipunkumbah rumiyin ngginakaken NaHCO3.[4]

Prosès damel surimi[besut | besut sumber]

Kanthi umum, prosès damel surimi punika ngumbah, nggiling, pangemasan, lajeng dipundamel beku. Anggènipun damel surimi kawiwitan kanthi misahaken antawisipun daging ulam kalihan balung lan kulit. Lajeng dipungiling lan dipunparingi ès watu supados njagi suhu adonan. Menawi sampun alus, adonan punika banjur dipunkumbah dumugi namung protein kemawon ingkang wonten. Bibar punika sukrosa, sarem utawi polifosfat (gumantung badhé damel surimi maawi sarem menapa boten) lajeng dipunwungkus lan dipundamel beku kanthi suhu dumugi -33 derajat Celcius. Bibar punika surimi dipunsimpen wonten ing papan mawi suhu 22 derajat Celcius.[4]. Menawi badhé damel produk salajengipun kados kamaboko punika wonten tambahan pati kados glepung tapioka.[4]

Raos surimi[besut | besut sumber]

Surimi mawi wujud pasta punika sejatosipun boten wonten raosipun, kanthi warna putih, kenthel lan kenyal. Surimi ingkang saé punika boten mambu sanget. Anggenipun ngolah surimi dados dhaharan segara tiruan kedah nambahaken pewarna, perasa lan aroma supados sami kalihan tiruanipun.[5]

Nutrisi[besut | besut sumber]

Surimi sejatosipun namung ngandhut 40 % dumugi 45 % daging ulam[6] saengga sanajan ngandhut kalori ingkang sejajar kalihan daging tuna, 99 kalori per 100 gram penyajian. Ananging langkung sekedhik protein inggih punika 15 % saking sadaya bobotipun, lemakipun sejajar kalihan 1 % saking bobotipun, lan karbohidrat langkung inggil, 7 % saking bobot.[7] Proteing ingkang wonten ing daging ulam kagem bahan utami surimi punika miofibril, sarkoplasma, lan protein stroma. Protein ing sajroning daging kathahipun protein miofibrol ingkang kapérang dadosmiosin, aktin lan aktomiosin. Ananging ingkang gadhah tanggel jawab dhateng sipat mirip gel ing kamaboko punika protein sarkoplasma. Déné langkungipun punika protein stroma ingkang damel jaringan iket ingkang kapérang dados kolagen lan elastin.[4]

Cathetan suku[besut | besut sumber]

Pirsani ugi[besut | besut sumber]

Sumber artikel punika saking kaca situs web: "https://jv.wikipedia.org/w/index.php?title=Surimi&oldid=1089764"