Rustriningsih
Rustriningsih (lair ing Kebumen, Jawa Tengah, 3 Juli 1967; umur 56 taun) inggih punika Wakil Gubernur Jawa Tengah periodhé 2008-2013.[1] Sadèrèngipun dados wakil gubernur, panjenenganipun dados Bupati Kebumen periodhé 2000-2005 lan 2005-2010, nanging boten saged purna amargi panjenenganipun kapilih dados wakil gubernur minangka wakilipun Bibit Waluyo wonten ing pamilian Gubernur lan Wakil Gubernur Jawa Tengah.[1]
Rustriningsih kawentar minangka pamimpin tlatah ingkang suksés.[2] Awit kapilih minangka Bupati Kebumen, panjenenganipun tansah konsistén kaliyan tekadipun mbrasta korupsi, kolusi, lan népotisme.[2] Panjenenganipun sarwa prasaja lan tansah nengenaken éfisiensi.[2] Panjenenganipun kalebet lulusan Master ngèlmu pulitik saking Universitas Gadjah Mada, Yogyakarta.[2]
Pendidikan[besut | besut sumber]
Rustriningsih lulus saking SD Negeri Wonokriyo I Gombong, Kebumen ing taun 1979. Salajengipun nglajengaken dhateng SMP Negeri 2 Gombong lan lulus taun 1982.[3] Panjenenganipun nglajengaken sekolahipun ing SMA Negeri Gombong lan lulus taun 1985.[3] Sasampunipun lulus SMA, panjenenganipun kuliyah mendhet Ilmu Administrasi, Fisipol ing Universitas Jenderal Soedirman Purwokerto lan lulus taun 1991.[3] Panjenenganipun lajeng mendhet kuliyah S2 Ilmu Administrasi Nagara, Fisipol ing Universitas Gadjah Mada lan lulus taun 2002.[3]
Bebingah[besut | besut sumber]
Rustriningsih sampun kathah nampi bebingah, ing antawisipun inggih punika “Certificate of Out Standing Women in Local Government lan Recognition United Nations Economic and Social Commission for Asia and The Pacific” saking lembaga internasional ingkang nggatékaken bab papréntahan tlatah.[2] Panjenenganipun ugi naté pikantuk bebingah saking KWARNAS, Prèsidhén Républik Indonésia, mantri kelautan lan perikanan, MURI, mantri nagara pemberdayaan perempuan, pamaréntah Swèdhen, Koran Suara Merdeka, lan AJI (Aliansi Jurnalistik Independen).[1]
Cathetan suku[besut | besut sumber]
- ↑ a b c Rustriningsih dipunundhuh tanggal 18 September 2011)
- ↑ a b c d e Rustriningsih dipunundhuh tanggal 18 September 2011)
- ↑ a b c d Profil Rustriningsih Archived 2011-08-20 at the Wayback Machine. dipunundhuh tanggal 18 September 2011)
Pranala njawi[besut | besut sumber]
| Artikel iki minangka artikel rintisan. Kowé bisa ngéwangi Wikipédia ngembangaké. |