Nyadran
Nyadran yaiku salah siji upacara adat Jawa sing ditindhakake setaun sapisan ana ing sasi Ruwah. Upacara iki diwiwiti kanthi reresik saréane para leluhur, mangsak panganan kang mligi kaya déné apem, ketan, kolak, banjur nganakake slametan utawa kenduri. Aran nyadran nduwéni surasa tembung sraddha, nyraddha, nyraddhan, banjur dadi nyadran. Miturut PJ Zoetmulder ana ing buku Kalangwan, upacara sraddha kuwi asale kanggo mèngeti sédané Ratu Tribhuwana Tungga Déwi ana ing taun 1350 , kejaba kuwi upacara sraddha sarana pèngetan raja-raja síng wís pada puput yuswa sing disebut aneng kidung Banawa Sekar, nganggo uba rampé wujud baita (prau) síng digawé saka kembang. Tradhisi nyadran pranyata wís lumaku wiwít jaman Majapahit nganti saiki. Pakurmatan kanggo leluhur isih lestari lan dipepetri déning masarakat, mligi ing tlatah padésan. Nyekar ing sasi Ruwah duwé surasa utawa wulangan marang anak putu supaya padha tresna lan élíng marang leluhur.[1]
Prosesi Upacara Nyadran
[besut | besut sumber]Tradhisi nyadran kabangun saka mapinten-pinten kagiyatan, yaiku kang pisanan nglakoni besik, yaiku ngresiki pasaréyan leluhur saka regedan lan suketan. Jero kagiyatan iki masarakat lan para kulawarga padha-padha nyambut gawé bareng-bareng, gotong-royong kanggo ngresiki pasaréyan leluhur. Sawise iku banjur ana kirab, yaiku arak-arakan pasarta nyadran pinuju papan upacara adat dianakaké. Sawisé tekan papan banjur dianakaké ujub utawa surasa saka rantamaning upacara adat nyadran déning pemangku adat. Banjur donga, pemangku adat mimpin kagiyatan donga bareng kang ditujukaké marang roh leluhur kang wis pralaya. Ing pungkasan banjur ana kembul bujono lan tasyukuran, sawisé ditindakaké donga bareng banjur diterusaké karo mangan bareng. masarakat nggelar kembul bujono utawa mangan bareng karo saben kulawarga kang numuti kenduri kudu nggawa panganan dhéwé. panganan kang digawa arupa panganan tradhisional, kaya pitik ingkung, sambel gorèng ati, urap sayur karo lawuh rempah, prekedèl, témpé lan tahu bacem, lan sapanunggalané. Sawisé masarakat wis kumpul lan nggawa kendurine piyambak-piyambak, banjur panganan kang digawa didèlèhaké ing ngarep kanggo didongakaké déning pamuka agama saenggon kanggo ngolehaké berkah lan banjur ijol-ijolan panganan kang mau digawa déning masarakat, kanggo mungkasi adicara banjur masarakat nglakoni mangan bareng karo padha-padha guyon kanggo padha-padha bebungah dhiri.[2]
Rujukan
[besut | besut sumber]- ↑ Ki Demang.com Nyadran lan leluhur
- ↑ authorlink, authorlink (2024-02-26). "Ritual/ Tradisi Nyadran, Sejarah Makna Dan Prosesi Kegiatannya". Peron Kec. Limbangan, Kab. Kendal. Dibukak ing 2025-05-27.