NICA

Saka Wikipédia Jawa, bauwarna mardika basa Jawa
Loncat ke navigasi Loncat ke pencarian

NICA utawa Nederlandsch Indië Civil Administratie utawa Netherlands-Indies Civil Administration (lit. "Pamaréntahan Sipil Hindhia Walanda") ya iku bala sekuthu kang duwé tugas ngontrol laladan jajahan Hindhia-Walanda sawisé Jepang nyerah tanpa syarat marang Sakuthu nalika Perang Donya II ing tanggal 14 Agustus 1945. Laladan Hindhia-Walanda saiki ana ing nagara Indonésia. NICA numpang Sakuthu nalika teka ing Indonésia sawisé rampung Perang Donya II.

Sajarah[besut | besut sumber]

Sawisé kasil ngalahaké Jepang, Komando sekuthu Asia Kidul-Wétan ing Singapura ngutus pitu perwira Inggris pimpinan mayor A.G. Greenhalgh lunga menyang Indonésia. Para perwira mau teka ing ing Indonésia tanggal 8 September 1945 kanthi tugas nyinaoni lan nglapuraké kaanan ing Indonésia ngadhepi pandharatan rombongan Sakuthu.

Ing tanggal 16 September 1945 rombongan perwakilan Sakuthu ndharat ing plabuhan Tanjung Priok Jakarta nganggo kapal Cumberland. Rombongan iki kabawah Laksamana Muda W.R. Petterson. sajeroning rombongan iki mèlu uga C.H.O. Van Der Plas makili Dr. H.J. Van Mook, Kepala Nica. Sakuthu nugasaké komando mligi kanggo ngurus Indonésia kanthi jeneng Allied Forces Neherlands East Indies (AFNEI). Komando mligi kang dibawahi Letnan jenderal Sir Philip Christison iki duwé tugas:

  1. Nampa panyerahan kakuwasan.
  2. Mbébasaké para tawanan perang lan interniran sekuthu
  3. Nglucuti lan ngulihaké bala jepang
  4. Mulihaké kaamanan lan katertiban
  5. Nggolèki lan ngadili para penjahat perang.

AFNEI wiwit ndharataké pasukané ing Jakarta tanggal 29 September 1945. Pasukan iki mung ing Sumatra lan Jawa, déné ing laladan Indonésia liyané dipasrahaké marang angkatan perang Australia. Tekané sekuthu ing Indonésia sakawit olèh atur sapala apik saka rakyat Indonésia, kaya déné tekané Jepang biyèn. Aanging sawisé diweruhi yèn tekané dikanthèni wong-wong NICA, sikap rakyat Indonésia owah dadi curiga lan malah memungsuhan. Bangsa Indonésia meruhi yèn NICA niyat arep ngadegaké manèh kakuwasané. Situasi owah dadi luwih kisruh nalika NICA maringi gaman marang tilas anggota Koninklijk Nederlands Indies Leger (KNIL). Ékan – ékan KNIL kang wis dibébasaké déning Jepang banjur gabung karo bala NICA. Ing sawetara laladan, NICA lan KNIL kang dijurung Inggris/Sakuthu nglancaraké provokasi lan téror marang para pemimpin nasional saéngga pecah pertempuran ing laladan-laladan kaya Surabaya, Sukabumi, Medan, Ambarawa, Menado lan Bandung.