Lambang Wrocław

Lambang kutha Wrocław ing ngarepé gedhong Arsenal

Lambang kutha Wrocław iku wis ditrapaké wiwit taun 1530. Sanadyan kutha iki wiwit taun iku dikuwasani bangsa kang séjé-séjé, nanging lambangé tetep padha. Mung antara taun 1938 lan 1945 lambangé diowahi déning para panguwasa Nazi. Banjur antara sawisé Perang Donya II, kutha iki diserahaké marang Républik Rakyat Polen lan pamaréntah kuminis nganggo lambang anyar nganti taun 1990. Ing taun iki, lambang kang asalé saka taun 1530 iki dienggo manèh.

Lambang taun 1530

Lambang kang dirancang ing taun 1530 iku wujud tamèng kang dibagi dadi papat. Ing pérangan tengen dhuwur ana gambaré garudha Silesia kang asalé saka simbul wangsa Piast Silesia. Garudha iki awerna ireng lan ing tengahé ana wulan sabit. Ing tengah wulan sabit iki ana pahésan salib cilik. Banjur pérangan kiwa dhuwur ana gambaré singa nganggo makutha kang simbul Karaton Bohemia (Ceko). Amarga kutha Wrocław wiwit taun 1336 dikuwasani Bohemia. Banjur ing tengahé ana bundheran lan ing jeroné ana gambaré sirah Santo Yohanes Pambaptis kang nglambangaké santo pangraksa kutha iki. Banjur ing pérangan kiwa ngisor ana tulisan huruf W kang nglambangaké jeneng kutha Wrocław ing basa Latin Wratislavia lan jenengé Wrocislaw, kang miturut legéndha ngedegaké kutha iki. Banjur ing pérangan tengen ngisor ana gambaré Santo Yohanes sang Panginjil.

Lambang iki wis dienggo wiwit tanggal 12 Fèbruari 1530 lan panrapané dikukuhaké déning Kaisar Quintus ing tanggal 10 Juli.

Lambang kutha nalika taun 1938-1945

Kutha Wrocław iku nduwé sajarah kang makantar-kantar lan dikuwasani bangsa kang béda-béda. Kutha iki tau dikuwasani Ostenrik, banjur Prusia lan Jerman. Ing basa Jerman jenengé Breslau. Ing taun 1933 kaum Nazi dadi kuwasa ing Jerman. Ing 19 Oktober 1938 sang Gauleiter (panguwasa Gau utawa provinsi dadi Gubernur) Silesia, Josef Wagner awèh paréntah ngganti lambang amarga dhèwèké ora seneng lambang kutha iki. Mliginé kang ora disenengi aksara W kang ana ing lambang iki. Dianggepé aksara W iki sifaté Slavia banget amarga iki cekakan saka asma Wratysław, ratu Ceko kang ngedegaké kutha iki. Sing ngripta lambang kang anyar iku guru saka Berlin; Schweitzer-Mjoelnir. Lambangé diowahi supaya sifaté 'luwih Jerman' lan ngilangi simbul-simbul Kristen. Lambang kang anyar wujudé wujud tamèng kang dibagi dadi rong pérangan; dhuwur lan ngisor. Pérangan dhuwur ana gambaré garudha Silesia ireng mawa wulan sabit, nanging tanpa salib. Banjur pérangan ngisor ana gambar palang wesi Jerman (das Eiserne Kreuz) mawa aksara FW lan taun 1813. Aksara iki cekakan saka asma ratu Prusia, Friedrich Wilhelm III kang ngrintis medhali palang Jerman sawisé menang perang nglawan Kaisar Napoleon Bonaparte.

Lambang Wrocław nalika jaman kuminis

Kutha Wrocław dibedhah Tentara Abang Uni Sovyèt ing taun 1945 lan kutha iki diserahaké marang Républik Rakyat Polen. Papréntahan kuminis Polen banjur ngowahi lambang iki kang dirancang déning Karol Maleczyński. Lambang kang anyar iki wujud tamèng kang dibagi dadi pérangan kiwa lan tengen. Ing paro kiwa ana gambaré garudha, lambang nagara Polen lan ing paro tengen ana gambaré garudha Silesia tanpa salib.

Lèngsèré pamaréntah kuminis

Ing 19 Juni 1990, sawisé papréntahan kuminis lèngsèr, lambang kutha iki kang asalé saka taun 1530 dienggo manèh.