Lambang Wrocław

Saka Wikipédia, Bauwarna Mardika abasa Jawa / Saking Wikipédia, Bauwarna Mardika abasa Jawi
Langsung menyang: pandhu arah, pados
Lambang kutha Wrocław ing ngarepé gedhong Arsenal

Lambang kutha Wrocław iku wis ditrapaké wiwit taun 1530. Sanadyan kutha iki wiwit taun iku dikuwasani bangsa sing séjé-séjé, nanging lambangé tetep padha. Mung antara taun 1938 lan 1945 lambangé diowahi déning para panguwasa Nazi. Banjur antara sawisé Perang Donya II, kutha iki diserahaké marang Republik Rakyat Polandia lan pamaréntah komunis nganggo lambang anyar nganti taun 1990. Ing taun iki, lambang sing asalé saka taun 1530 iki dienggo manèh.

Lambang taun 1530[sunting | Sunting sumber]

1530-1938
1990

Lambang sing dirancang ing taun 1530 iku arupa tamèng sing dibagi dadi papat. Ing bagéyan tengen dhuwur ana gambaré elang Silesia sing asalé saka simbul wangsa Piast Silesia. Elang iki awerna ireng lan ing tengahé ana wulan sabit. Ing tengah wulan sabit iki ana pahésan salib cilik. Banjur bagéyan kiwa dhuwur ana gambaré singa nganggo makutha sing simbul Karaton Bohemia (Ceko). Amarga kutha Wrocław wiwit taun 1336 dikuwasani Bohemia. Banjur ing tengahé ana bundheran lan ing jeroné ana gambaré sirah Santo Yohanes Pambaptis sing nglambangaké santo pangraksa kutha iki. Banjur ing bagéyan kiwa ngisor ana tulisan huruf W sing nglambangaké jeneng kutha Wrocław ing basa Latin Wratislavia lan jenengé Wrocislaw, sing miturut legéndha ngedegaké kutha iki. Banjur ing bagéyan tengen ngisor ana gambaré Santo Yohanes sang Panginjil.

Lambang iki wis dienggo wiwit tanggal 12 Februari 1530 lan panrapané ditetepaké déning Kaisar Quintus ing tanggal 10 Juli.

Lambang kutha nalika taun 1938-1945[sunting | Sunting sumber]

Lambang Breslau Nazi

Kutha Wrocław iku nduwé sajarah sing makantar-kantar lan dikuwasani bangsa sing béda-béda. Kutha iki tau dikuwasani Austria, banjur Prusia lan Jerman. Ing basa Jerman jenengé Breslau. Ing taun 1933 kaum Nazi dadi kuwasa ing Jerman. Ing 19 Oktober 1938 sang Gauleiter (panguwasa Gau utawa provinsi dadi Gubernur) Silesia, Josef Wagner awèh paréntah ngganti lambang amarga dhèwèké ora seneng lambang kutha iki. Utamané sing ora disenengi aksara W sing ana ing lambang iki. Dianggepé aksara W iki sifaté Slavia banget amarga iki cekakan saka asma Wratysław, ratu Ceko sing ngedegaké kutha iki. Sing ngripta lambang sing anyar iku sawijining guru saka Berlin; Schweitzer-Mjoelnir. Lambangé diowahi supaya sifaté 'luwih Jerman' lan ngilangi simbul-simbul Kristen. Lambang sing anyar wujudé arupa tamèng sing dibagi dadi rong bagéyan; dhuwur lan ngisor. Bagéyan dhuwur ana gambaré elang Silesia ireng mawa wulan sabit, nanging tanpa salib. Banjur bagéyan ngisor ana gambar palang wesi Jerman (das Eiserne Kreuz) mawa aksara FW lan taun 1813. Aksara iki cekakan saka asma ratu Prusia, Friedrich Wilhelm III sing ngrintis medhali palang Jerman sawisé menang perang nglawan Kaisar Napoleon Bonaparte.

Lambang Wrocław nalika jaman komunis[sunting | Sunting sumber]

Lambang nalika jaman komunis

Kutha Wrocław dibedhah Tentara Abang Uni Sovyèt ing taun 1945 lan kutha iki diserahaké marang Republik Rakyat Polandia. Pamaréntahan komunis Polandia banjur ngowahi lambang iki sing dirancang déning Karol Maleczyński. Lambang sing anyar iki arupa tamèng sing dibagi dadi bagéyan kiwa lan tengen. Ing paro kiwa ana gambaré elang, lambang negara Polandia lan ing paro tengen ana gambaré elang Silesia tanpa salib.

Lèngsèré pamaréntah komunis[sunting | Sunting sumber]

Ing 19 Juni 1990, sawisé pamaréntahan komunis lèngsèr, lambang kutha iki sing asalé saka taun 1530 dienggo manèh.

Sumber artikel punika saking kaca situs web: "https://jv.wikipedia.org/w/index.php?title=Lambang_Wrocław&oldid=807478"