Menyang kontèn

Dadar gulung

Saka Wikipédia Jawa, bauwarna mardika basa Jawa
Dadar gulung
Kuwe dadar gulung
Jeneng liyanéDarlung
AjanganNyamikan
Hawa ajanganAdhem
Woworan pokokGlepung, Gula, Parutan klapa
VariasiWerna lan rasa
Katerangan liyanéKalebu jajanan pasar
Buku masakan: Dadar gulung  Médhia: Dadar gulung

Dadar gulung inggih punika sawijining olahan kuwé ingkang dipun damel mawi dipundadar banjur digulung kanthi isèn-isèn entèn-entèn (parutan klapa kaliyan gendhis jawi). Menawi dipuntingali setiti, kulit punika memper kalihan kulit sosis Sala. Bentenipun dadar gulung punika rasanipun manis. Kulit dadar gulung warni ijem amargi ngagem sari ron pandhan. Jaman sakniki kulit punika wonten ingkang dipungantos werna soklat, jambon, pethak ngantos polkadot miturut kasenengan piyambak-piyambak. Wosipun ugi saged dipunmodhifikasi kadosta pisang, soklat, keju, ngantos daging duren. Tekstur kuwe punika empuk sakengga dipunremeni lare-lare. Sesuguh niki dipunsade wonten warung, bakul kuwe ngantos restoran. Kuwe punika kalebet jinis kuwe basah sakengga awetipun boten dangu, kinten-kinten amung sak dina kémawon. Pramila kedah dipundhahar.

Cara damel[besut | besut sumber]

Damel dadar gulung inggih punika:

Woworan kulit[besut | besut sumber]

  • Glepung 250 gram
  • Endhog 2
  • Santen 100 ml
  • Gula 3 sendhok pangan
  • Mertega 1 sendhok pangan
  • Uyah sethithik
  • Sari ron padhan utawa pawerna miturut kasenengan

Isèn-isèn[besut | besut sumber]

  • Parutan klapa
  • Gula Jawa
  • Ron pandhan
  • Kayu legi
Dadar gulung ing piring

Cara ngolah[besut | besut sumber]

  1. Campur kabèh woworan kulit ing wadhah utawa manci.
  2. Udhak nganti rata.
  3. Saring ing saringan amrih ora nggrenjel.
  4. Panasaké teplon nganti panas.
  5. Sok sak irus adhonan mau lan diratakaké.
  6. Enteni nganti mateng entas.
  7. Campur woworan isèn-isèn nganti rata
  8. Dèleh 1 sendhok pangan isèn-isèn menyang tengah kulit dadar gulung.
  9. Lempit dadar gulung kaya déné nglempit kulit sosis Sala.
  10. Kuwé wis sedya dipangan.

Deleng uga[besut | besut sumber]

Kuwé cubit

Roti baya

Sosis sala