Willem Buiter

Saka Wikipédia Jawa, bauwarna mardika basa Jawa
Willem Buiter ing taun 1984

Willem Buiter (lair ing Den Haag, 26 September 1949) iku sawijining daksa utawa ahli ékonomi Amérika-Inggris kalairan lan katurunan Walanda.[1] Dhèwèké tau njabat dadi daksa ékonomi utama ing Citigroup.

Babad slira awal lan pawiyatané[besut | besut sumber]

Willem Buiter iku lair ing Den Haag, Walanda nalika surya 26 September 1949. Dhèwèké iku warga nagara Amérikah Sarékat lan Britania Raya.[2] Bapané Willem. Harm Buiter (1922–2011), iku uga sawijining daksa ékonomi Walanda, pagawé wigati padagangan internasional lan pulitikus Parté Buruh Walanda. Dhèwèké uga tau dadi walikutha Groningen.[3]

Willem Buiter sekolah ing European School ing Brussel, Bèlgi saka taun 1962 nganti 1967, nèng ngendi dhèwèké olèh gelar European Baccalaureate.[1] Sawisé kuliah Ngèlmu Pulitik lan Sosial sataun ing Universitas Amsterdam saka taun 1967 nganti 1968, Buiter lunga menyang Emmanuel College, Cambridge, kanggo kuliah ékonomi lan olèh gelar S1 B.A. mawa kurmat First-Class Honours ing taun 1971. Dhèwèké olèh gelar S2 M.A. ing ékonomi ing taun 1972 lan gelar M.Phil. ing Ékonomi taun 1973, spésialisasiné iku Ékonomi Internasional lan Pangrembakan Ékonomi.

Willem Buiter olèh gelar doktor PhD ing Ékonomi saka Universitas Yale ing New Haven, Connecticut, United States, taun 1975. Disertasiné iku nduwé sesirah "Temporary Equilibrium and Long-Run Equilibrium," banjur dibabar ing taun 1979.

Karir[besut | besut sumber]

Saka taun 1975 nganti 1976 lan 1977 nganti 1979, Buiter dadi asistèn profèsor Ékonomi lan Urusan Internasional ing Sekolah Woodrow Wilson saka Universitas Princeton University ing Princeton, New Jersey. Saka taun 1976 nganti 1977, dhèwèké dadi dosèn Ékonomi ing London School of Economics and Political Science. Saka taun 1980 nganti 1982, dhèwèké iku profèsor Ékonomi ing Universitas Bristol.

Saka 1977 nganti 2011, Buiter iku sawijining Research Associate prakara pasar dhuwit lan program ékonomi monetèr ing National Bureau of Economic Research.[4]

Ing surya 1 April 1982, Buiter ditunjuk dadi Cassel Professor ing ngèlmu ékonomi ing London School of Economics mawa rujukan kusus marang dhuwit lan sistem bank. Dhèwèké metu saka LSE ing 1985 kanggo ngajar Ékonomi ing Universitas Yale ing New Haven, Connecticut saka taun 1985 nganti 1994.[1] Ing taun 1989 Buiter dadi korèspondèn Akademi Karajan Walanda ing Seni lan Ngèlmu Kawruh (Koninklijke Nederlandse Akademie van Wetenschappen.[5]

Buiter ninggal Amérikah Sarékat ing taun 1994 nalika dhèwèké diangkat dadi Fellow ing Trinity College, Cambridge, lan profèsor Makro Ékonomi Internasional ing Universitas Cambridge. Jabatané iki diwengku nganti sasi Mèi 2000. Dhèwèké iku anggota njaba Komisi Kawicaksanan Monetèr Bank of England wiwit sasi Juni 1997 nganti Mèi 2000. Ing Juni 2000, dhèwèké dadi Daksa Ékonomi Utama lan parampara astamiwa (special advisor) kanggo Présidèn European Bank for Reconstruction and Development, kalungguhan iki diwengku nganti sasi Agustus 2005. Saka sasi September 2005 nganti Mèi 2009, Buiter iku profèsor Ékonomi Pulitik Éropa ing Institut Éropa sajeroning London School of Economics and Political Science. Saka taun 2005 nganti 2010, Buiter iku dadi parampara internasionalé Goldman Sachs International.[6]

Buiter iku kerep nyumbang tulisan marang Financial Times, ing ngendi nganti Dhésèmber 2009 dhèwèké nulis blog ajudhul "Maverecon".[7] Ing April 2008, dhèwèké nulis makalah prakara krisis finansial Èslan 2008-2012 kanggo Landsbanki, bebarengan karo bojoné Anne Sibert.[8] Ing satengahing Juli 2008, vèrsi mutakiré dicaosaké marang pamaréntah Èslan.[9] TWong-wong Èslan sing maca makalahé nduwé panemu manawa isiné sènsitif banget marang pasar lan kabèh sarujuk supaya makalah iki ora dibabar kanggo publik umum.[9]

Saka sasi Juni 2009 nganti Agustus 2011, dhèwèké dadi profèsor Ékonomi Pulitik ing Punjer Kinerja Ékonomi ing LSE. Ing sasi Januari 2010, Buiter nggabung karo Citigroup minangka daksa ékonomi utama, nggantèni Lewis Alexander sing mundhur supaya bisa nyambut gawé kanggo Bètamal Amérikah Sarékat (United States Treasury) wolung sasi sadurungé. Kamangka ing sawijining postingan blog sasi April 2009, Buiter nulis manawa Citigroup iku "sawijining konglomerat tumrapan praktèk sing ala dhéwé saka saindhenging jagat finansial" (a conglomeration of worst practice from across the financial spectrum).[10]

Grexit[besut | besut sumber]

Wacananen artikel Grexit

Willem Buiter minangka wewengkon jabatané ing Citigroup nggawé tembung Grexit sing sajatiné cekakan saka Greek Exit utawa wetuné Yunani saka Zona Euro. Tembung iki dadi tembung padinan (Word of the Day) ing surya 7 Fèbruari 2012.[11]

Panemuné prakara agama Islam lan ékonomi[besut | besut sumber]

Perkara hipoték (KPR), Willem Buiter uga ngwedhar. Dhèwèké nduwé panemu manawa sawijining rumah tangga kuwi beciké ora nduwé utang gedhé. Sing apik iku hipoték gagrag Islam. Sebab Islam iku nglarang riba. Dadi carané iku si bank sing ngehaki omah. Banjur wong sing nyilih dhuwit kanggo tuku omah iku, mbayar béya sing bisa dipara loro. 50% iku kanggo séwa lan 50% liyané iku kanggo nyicil omah.[12]

Urip pribadi[besut | besut sumber]

Ing taun 1973 Buiter omah-omah karo Jean Archer. Nanging banjur pegatan ing taun 1997. Dhèwèké pinaringan anak loro, David Michael Alejandro, sing lair 22 Fèbruari 1991 ing Callao, Peru, lan Elizabeth Lorca, lair ing 6 Agustus 1993 ing Cochabamba, Bolivia.

Wiwit 5 Juni 1998[1] Willem Buiter omah-omah karo Anne Sibert, profèsor Ékonomi ing Birkbeck, Universitas London, sing uga Anggota Njaba Komisi Kawicaksanan Monetèr Bank Sentral Èslan saka taun 2009 nganti 2012.

Sibert iku tokoh sing ora bisa dilirwakaké déné kritik sistem bank lan kadhuwitan Éropa kanggo Punjer Riset Kawicaksanan Ékonomi (Centre for Economic Policy Research).[1][13][14]

Réferènsi[besut | besut sumber]

  1. a b c d e "Willem Hendrik Buiter". Willembuiter.com. Dibukak ing 2014-04-18.
  2. http://www.nber.org/~wbuiter/personal.htm
  3. "Oud-burgemeester Groningen Harm Buiter overleden ("Manten walikutha Groningen, Harm Buiter, tilar donya")" . Elsevier.nl. 23 February 2011.
  4. LSE Magazine, November 1982, No 42, p.4
  5. "Willem Buiter". Royal Netherlands Academy of Arts and Sciences. Diarsip saka sing asli ing 4 March 2016. Dibukak ing 4 August 2015.
  6. "Willem Buiter". EconoMonitor. 26 April 2010. Dibukak ing 4 October 2013.
  7. "willem buiter's maverecon". Blogs.ft.com. Dibukak ing 2014-04-18.
  8. "All in the family | willem buiter's maverecon". Blogs.ft.com. 2009-03-08. Dibukak ing 2014-04-18.
  9. a b Cithakan:Wayback
  10. Craig Stirling and Bradley Keoun (30 November 2009). "Willem Buiter Will Join Citigroup as Chief Economist". Bloomberg L.P. Dibukak ing 27 January 2011.{{cite news}}: CS1 maint: uses authors parameter (link)
  11. The Guardian Greek impasse raise fears of 'Grexit' , Katie Allen, 7-2-2012, diaksès 19-7-2016
  12. John Shapiro ing Financial Review 'Citi's Willem Buiter says Islam's ancient solution could solve household debt', 15-6-2016, diaksès 19-7-2016
  13. "The damaged ECB legitimacy | vox". Voxeu.org. Dibukak ing 2014-04-18.
  14. Smith, Yves (2011-09-15). "Anne Sibert: The damaged ECB legitimacy". naked capitalism. Dibukak ing 2014-04-18.

Pratélan tetembungan[besut | besut sumber]

Basa Jawa Bahasa Indonesia English Nederlands
bétamal perbendaharaan, khazanah treasury schatkist
daksa, ahli pakar, ahli expert deskundige
parampara penasehat advisor adviseur

Pranala njaba[besut | besut sumber]