Taman Kali Mudal
| Taman Kali Mudal | |
|---|---|
 | |
| Jinis | Wimban |
| Papan | Kalurahan Jatimulya, Kapanewon Girimulya, DIY |
| Kang ngrumat | Bumdhes Jatimulya |
| Status | Dibukak (Senen-Minggu tabuh 09.00-16.00) |
| Sarana | Warung, Cakruk, Langgar, Pekiwan |
Taman Kali Mudal yaiku salah siji papan wisata kang ana ing Dhukuh Banyunganti, Kalurahan Jatimulya, Kapanéwon Girimulya, Kabupatèn Kulon Praga, Dhaérah Istimewa Ngayogyakarta. Taman Kali Mudal wis katetepaké dadi ékowisata kang tinemu ing sikilé Gunung Menorèh. Papan wisata iki diresmèkaké ing taun 2015. Mudal minangka sumber banyu kang mili saben taun lan digunakaké minangka sumber banyu resik déning warga lokal. Jeneng mudal dhéwé asalé saka basa Jawa sing tegesé "metu".[1] Tuk banyu Kali Mudal asalé saka guwa, mula anané Taman Kali Mudal ngilangaké kesan wingit saka guwa, kajaba iku tinambah karo panyengkuyung fasilitas kang ndadèkaké wisatawan ngrasa betah nalika ana ing kana. Taman Kali Mudal mujudaké salah sawijiné papan wisata Kulon Praga kang tansah dadi jujugan utama nalika teka prèinan. Salah sawijining sebab utama yaiku amarga Taman Kali Mudal bisa dadi jujugan wisata kulawarga kang nyenengaké.[2] Ing sabrang sumber tuk banyu Mudal ana trowongan kang diarani saluran irigasi kang banyuné bisa mili kanggo sawah ing sakiwa tengené utawa diarani Klenthing. Nyatané, sumber banyu iki isih nyukupi lan dadi sumber banyu resik kanggo warga lokal amarga mili ora tepung mangsa. Saliyané sumber banyu Mudal, watara 95 mèter ana Grojogan Mudal. Sawisé grojogan ana jeram lan luwengan antarané Bendung Pulé, Kedhung Wong, Kedhung Luweng, Kedhung Dawa, Kedhung Rempelas, Kedhung Awar-awar lan Kedhung Kedoya.[3]
Sujarah
[besut | besut sumber]Anané ékowisata Taman Kali Mudal diwiwiti saka keprihatinan paguyuban masyarakat lokal kang péngin sumber banyu Kali Mudal tetep dijaga lan bisa nuwuhaké papan wisata. Kanthi makarya bebarengan karo warga, dalan lumantar menyang Kali Mudal dibuka sanajan wragad kang sarwa winates. Sapérangan fasilitas uga dibangun ing kiwa tengené kali. Ana bolongan kang wis diowahi dadi blumbang kanggo adus lan dolanan ing ngisor sumber banyu. Uga ana grojogan kang diarani Grojogan Mudal lan sawetara kreteg empring. Ing taun kang padha, PT PLN melu ngréwangi dhaérah iki lumantar program Pembangunan Lingkungan. Wewengkon Kali Mudal dirembakakaké kanggo ékowisata. PLN lan warga ngrembakakaké 1.000 tanduran pala lan jangkepi kabèh fasilitas panjurung kang luwih temata. PLN uga nindakaké program banyu resik kanggo 135 kulawarga lan mbangun papan ngibadah ing laladan kono.[4]
Rega Tiket lan Jam Buka
[besut | besut sumber]Yèn arep dolan menyang Ékowisata Taman Kali Mudal, papan wisata iki buka saben Senèn nganti Minggu, jam 09.00 - 16.00 WIB. Déné tiket mlebu saben wong Rp 10.000. Wisatawan bisa nggunakaké biaya iki kanggo nglangi kaya kang dikarepaké. Senajan pengunjung bebas nglangi ing ngendi waé, saben pos ana jagabaya kang gatiné ngawasi wilayah tartamtu. Kanggo kang ora bisa nglangi ora usah kuwatir pangemunah wisata bakal nyilihi ban, lan saben titik bakal ana petugasé, mula yèn ana kedadéyan kang ora dikepénginake bisa diawékani.[5]
Rujukan
[besut | besut sumber]- ↑ Dispar Kulon Progo, Admin (2021-07-11). "Ekowisata Kali Mudal (saka Basa Indonesia)". Dinas Pariwisata Kulon progo. Dibukak ing 2023-10-13.
- ↑ Sukmah, Fenti (2022-06-05). "Taman Kali Mudal". Native Indonesia. Dibukak ing 2023-10-13.
- ↑ Agung, Agung (2017-02-27). "Daya Tarik Tuk Banyu Abadi ing Taman Kali Mudal (saka Basa Indonesia)". KR Jogja. Dibukak ing 2023-10-13.
- ↑ Indonesia, CNN (2017-05-09). "Taman Kali Mudal Laladan Ekowisata kang Dikemunah PLN (saka Basa Indonesia)". CNN Indonesia. Dibukak ing 2023-10-13.
- ↑ Itsnaini, Tashandra, Faqihah Muharroroh, Nabilla (2022-06-20). "Rega Tiket lan Jam Buka Ekowisata Kali Mudal ing Kulon Praga (saka Basa Indonesia)". Kompas Travel. Dibukak ing 2023-10-13.