Rebecca Soni

Saka Wikipédia Jawa, bauwarna mardika basa Jawa
Menyang navigasi Menyang panggolèkan
Rebecca Soni
Rebecca Soni (6404090233).jpg
Rebecca Soni sadurungé nglekasi tetandhingan
Lair (1987-03-18) Maret 18, 1987 (umur 34)
Freehold, New Jersey  Amérika Sarékat
PatiIsih urip
Isih urip
Bangsa Amérika Sarékat
PakaryanAtlet
Dhuwur5 ft 8 in (1.73 m)
Bobot134 lb (61 kg)
Sana jaringanrebeccasoni.com

Rebecca Soni yaiku salah sawijining tilas atlét nglangi kang asalé saka Amérika Sarékat. Rebecca duwè dedeg piadeg 5,8 feet lan 140 pon lan saikiné manggo ing Plainsboro, New Jersey, Amérika Sarékat.[1] Dhèwèké mèlu ing nomer renang gaya dhadha lan wis naté tampil ing Olimpiadhe lan mikolèhi 6 medhali emas ing antarané telu medhali emas lan telu medhali pérak. Dhèwèké yaiku tilas atlét kang nyekel rékor cathethan gaya dhadha ing nomer 200 mèter sangisoré 2.20 m.d. Nanging dhèwèké isih dadi pribadhi kang nyekel rékor 4x100 mèter medley relay vèrsi jarak cendhèk lan jarak dawa. Rebecca Soni uga naté dadi nominasi olahragawan ing taun 2010 lan 2011 lan nampa pangaji-aji saka nagara ing nominasi atlét nglangi paling pinunjul taun 2009, 2010, lan 2011.[2]

Kauripan[besut | besut sumber]

Rebecca Soni yakuwi anak kaloro saka wong tuwa Petér lan Kinga Soni ing Freehold, New Jersey. Rebecca lair ing surya kaping 18 wulan Maret taun 1987, wong tuwané Rebecca yaiku mauné warga negara Hungaria lan Rumania kang alihan saka Cluj, Napoca sdurungé Rebecca lair.[2] Rebecca ngentekaké wektuné ing Plainsboro lan duwé mbakyu jenengé Rita kang uga dadi atlét nglangi ing pawiyatan luhuré yaiku Téxas A&M University. Mauné Rebecca yaiku atlét cawang gimnastik nanging ngalih menyang cawang nglangi nalika ngancik umur sepuluh taun lan mbacutaké nglangine kanthi gandhok ana klub Scarlèt Aquatic. Ing taun 2004 Rebecca jajal mèlu ing kuwalifikasi tim Olimpiadhe nglangi Amérika, dhèwèké urutan nomer 15 saka sakabèhé pasarta ing nomer 100 mèter gaya dhadha lan urutan 11 saka sakabèhé pasarta ing nomer 200 mèter gaya dhadha. Taun 2005 Rebecca lulus saka pawiyatan Wèst Windsor Plainsboro High School ing New Jersey minangka atlét kang nyekel rèkor wektu nglangi paling cepet ing negara bagéyan New Jersey nomer 100 lan 200 mèter gaya dhadha. Ing donya panglangèn Rebecca mapan ana urutan ka 25 sawisé mapanaké ana urutan enem kanthi cathethan wektu 1:9.80 m.d lan menangi kajuwaran nglangi Nasional Amérika ing nomer 200 mèter. Sawisé lulus, Rebecca mlebu ana pawiyatan luhur University of Southern California (USC) lan gandhok karo tim nglangi kang dibesut déning juru latih Dave Salo. Taun 2006 amung rong taun sadurungé dhèwèké tampil ing Olimpiadhe Bèijing 2008, Rebecca nemahi penyakit jantung kang jalari jantungé dredheg ora aturan lan kudu dioperasi, nanging bubar nglakoni operasi Rebecca wis bisa waras-wiris manèh.[2]

Pengalaman ing Olimpiadhe[besut | besut sumber]

Olimpiadhe Bèijing 2008[besut | besut sumber]

Olimpiadhe 2008, Rebecca kasil gawa bali medhali emas ing nomer 200 mèter gaya dhadha lan medhali pérak ing nomer 100 mèter gaya dhadha lan 4x100 mèter medley.[1] Sadurungé bisa ngolèhaké medhali emas Rebecca kudu nglakoni kuwalifikasi lan kasil nyathethaké wektu 2:22.60 m.d dadèkaké dhèwèké atlét nglangi paling cepet nomer telu kang naté ana banjur Rebecca dijaluk supaya mèlu nomer 100 lan 200 mèter gaya dhadha sawisé mitraé Jèssica Hardy dicorèk saka tim nasional nglangi Amèrika sarèkat jalaran dianggep ora duwé fisik kang rosa senadyan Hardy mauné wis dilebokaké kanggo mèlu ing nomer 100 lan 200 mèter. Tara Kirk kang ana urutan nomer telu ing kuwalifikasi uga ora dikatutaké ana tim kang digawa menyang Bèijing, lan Rebecca isa dikatutaké menyang Cina.[2] Nalika tandhing ing 100 mèter gaya dhadha Rebecca menang medhali pérak kanthi wektu 1:06.37 m.d saburiné Léisel Jones kanthi wektu 1:05.17 m.d, nanging ana sangarepé atlét Ostenrik Mirna Jukic kanthi wektu 1:07.34 m.d.

Olimpiadhe London 2012[besut | besut sumber]

Sadurungé kapilih ana tim nglangi kanggo Olimpiadhe London 2012, ing Omaha, Nebraska Rebecca Soni nglakoni kuwalifikasi kanthi ana urutan ing nomer loro nomer 100 mèter gaya dhadha lan nomer sepisan ing nomer 200 mèter gaya dhadha, kanthi asil kasebut mesthèkaké papané ana ing tim nglangi Amèrika Sarékat kanggo Olimpiadhe 2012 lan bakal ditampilaké ana ing nomer 4x100 mèter médléy rélay. Ing tetandhingan sepisané Rebecca ana ing urutan kaloro saburiné Breeja Larson 1:05.52 m.d ing kajuwaran nglangi Texas A&M Swimmer Rebecca nyathethaké wektu 1:05.99 m.d. Ing nomer 200 mèter gaya dhadha Rebecca anèng urutan kepisan kanthi wektu 2;21.13, menang kanthi mèh ninggal mungsuhé rong dhetik saburiné yaiku atlét Micah Lawrèncè saka Auburn University.[2]

Ing Olimpiadhe London 2012, Inggris Rebecca balèni pikollèhan medhali péraké ing nomer 100 mèter gaya dhadha kanthi cathethan wektu 1:05.47 m.d, urutan kapindho saburiné atlét 15 taun saka Litowen yaiku Ruta Meilutyte kanthi wektu 1:05.39 m.d. Sawisé mimpin babak gugur lan semifinal nomer 200 mèter gaya dhadha, Rebecca nyathethaké rékor anyar kanthi wektu 2:19.59, mecahaké rékoré dhéwé lan dadi atlét nglangi wanita sepisan kang bisa nembus wektu 2 menit 20 dhetik ing Olimpiadhe. Kanthi kamenangané Rebecca, dhèwèké uga dadi atlét kang bisa mertahanaké gelaré ing Olimpiadhe. Ing Olimpiadhe pungkasané, Rebecca kasil gondhol emas bareng Missy Franklin, Dana Vollmer and Allison Schmitt ing nomer 4x100 mèter medley relay.[2]

Rékor Pribadhi[besut | besut sumber]

Per 2 Agustus 2012.
Jarak Adoh
Nomer Wektu Kajuwaran Tanggal Cathethan
50 m gaya dhadha 30.11 2009 World Aquatics Championships 2 Agustus , 2009
100 m gaya dhadha 1:04.84 2009 World Aquatics Championships 27 Juli , 2009
200 m gaya dhadha 2:19.59 2012 Summer Olympics 2 Agustus , 2012
Jarak cendhèk
Nomer Wektu Kajuwaran Tanggal Cathethan
50 m gaya dhadha 29.83 2010 Short Course Worlds 16 Dhesember , 2010
100 m gaya dhadha 1:02.70 2009 Duel in the Pool 19 Dhesember , 2009
200 m gaya dhadha 2:14.57 2009 Duel in the Pool 18 Dhesember , 2009

Pènsiun[besut | besut sumber]

Kawit Olimpiadhé London 2012 Rebecca wis ora mèlu tandhing ana kajuwara manèh lan dhèwèké mutusaké kanggo pènsiun kamangka umuré lagi ngancik 26 taun wektu semana. Rebeca kang ngéntukaké enem medhali sajroning rong olimpiadhe yaiku Olimpiadhe Bèijing 2008 lan Olimpiadhe London 2012 ing nomer 200 mèter gaya dhadha lan kang mecahaké rèkor ing tingkat final lan dadi atlét nglangi wadon sepisan kang nyathethaké wektu paling cepet sadonya.[3] Minangka tilas atlét uripé kulina sénggol gepok kalawan rékor lan angka-angka, saiki sawisé ora mèlu kajuwaran manèh dhèwèké isih rumangsa atlét nanging atlét ing urip kang sanyatané. Apa kang ilang saka kagiyatan-kagiyatan sadurungé yaiku gegladhi saben dina, ngasah kaprigelan lan kakuwatan. dadi Rebecca jupuk kabèh mau kanggo gegladhi ing kauripané sawisé pènsiun lan saiki dhèwèké wis mapan ana ing California, uripe rumangsa dikiteri sakabèhing kabegjan.[4]

Témbok Kondhang Kaloka (Hall of Fame)[besut | besut sumber]

Minangka atlét rénang mligi kanggo nomer gaya dhadha lan menang enem medhali ing Olimpiadhe, dhèwèké uga tilas atlét kang nyekel rékor wektu ing nomer 100 mèter (jarak cendhèk lan adoh) lan gaya dhadha nomer 200 mèter (jarak cendhèk lan adoh) Rebecca dadi atlét nglangi wadon sepisan kang nyathethaké wektu sangisoré 2 menit 20 dhetik. Gunggung medhali kang kasil diolèhaké déning Rebecca yaiku 22 medhali ing kajuwaran internasional, 14 medhali emas, pitung medhali pérak, lan siji perunggu nglangi ing kajuwaran ing antarané Olimpiadhe, Donya, Universiadé, lan kajuwaran Pan Pasifik. Taun iki atlét-atlét kang dilebokaké ing témbok kondhang kaloka yaiku Brendan Hansen, Michaèl Klim, Jon Sieben, Rebecca Soni (Amèrika Sarèkat), lan Daichi Suzuki (Jepang).[5]

Rujukan[besut | besut sumber]

  1. a b Team USA, Admin. "Atlét Nglangi Amérika Sarékat Rebecca Soni (Saka Basa Inggris)". Team USA. Dibukak ing 2020-01-29.
  2. a b c d e f Lennox, Doug. "Biografi Rebecca Soni (Saka Basa Inggris)". Swimswam. Dibukak ing 2020-01-29.
  3. Zaccardi, Nick (2014-01-30). "Tandha Rebecca Soni (Saka Basa Inggris)". NBC Sports. Dibukak ing 2020-01-29.
  4. Rebecca Soni, Admin. "Babagan Dhèwèké (Saka Basa Inggris)". Rebecca Soni. Dibukak ing 2020-01-30.
  5. Keller-Marvin, Meg (2019-12-01). "Atlét Nglangi Amérika Sarékat Rebecca Soni Dilebokaké ana Témbok Kondhang Kaloka Internasional (Saka Basa Inggris)". Swimming World Magazine. Dibukak ing 2020-01-30.