Marwah

Saka Wikipédia Jawa, bauwarna bébas abasa Jawa

Shafa lan Marwah (Arab: الصفا As-Shofā ; المروة Al-Marwah) iku loro bukit sing dunungé ana ing saubengé (saiki sajeroning) Masjid Al Haram ing Mekkah, Arab Saudi, papan kanggo para Muslim ngayahi Sa'i, bolak-balik kaping pitu sajeroning ritual ngibadah kaji lan umrah.

Sajarah[besut | besut sumber]

Sajeroning tradhisi Islam, Ibrahim diprintah déning Allah supaya ninggal garwané Siti Hajar ing ara-ara karo putrané Ismail sing isih bayi minangka ujian tumrap kaimanané. Wektu pasadyan (panganan lan banyu) entèk, Siti Hajar golèk bantuan kanthi ninggal bayiné ing lemah sing saiki dadi sumur Zamzam. Ngarep supaya antuk banyu Siti Hajar munggah bukit sing paling cedhak, Shofa, kangggo ndeleng mbokmanawa ana pitulung utawa banyu ing sacedhaké panggonan mau. Banjur pindhah menyang bukit liyané, Marwah, supaya bisa ndeleng panggonan sing luwih amba nanging tetep ora katon apa sing digoleki mula nganti bola-bali mlayu-mlayu nganti kaping pitu. Nalika bali menyang panggonané Ismail, Siti Hajar ndeleng ana banyu wis mancur saka lemah ing cedhak sikilé bayi Ismail sing lagi nangis.

Umat Islam percaya yèn wektu iku Allah wis ngutus malaikat Jibril supaya ngetokaké banyu ing kana. Wektu mirsani banyu sing muncrat mau Siti Hajar banjur nampung sajeroning pasir lan watu. Jeneng Zamzam sing maknané "mandhega mili", iku ungkapan sing diucapaké makaping kaping déning Siti Hajar wektu ngupayakaké nampung banyu mau. Laladan ing saubengé munculé banyu mau, sing sabanjuré owah dadi sumur, didadèkaké papan panggonan istirahat tumrap para kafilah, lan sabanjuré tuwuh dadi kutha Mekkah papan kelairan Muhammad.