Hastomo Arbi

Hastomo Arbi (jeneng Tionghoa: Ang Tjong Hauw) yaiku salah sawijining atlet badminton kalairan 5 Agustus 1958 ing Kudus, Jawa Tengah. Bapaké yaiku Agus Susanto (jeneng Tionghoa: Ang Tjik Bik) punggawa ing pabrik rokok Djarum, ngakon dhèwèké nggamblok ing klub Djarum kanthi guru badmintoné yaiku bapaké dhéwé lan Anwari. Dhèwèké nyekel rakèt wiwit nalika isih umur 7 taun.

Riwayating Urip

Ing kelas 5 SD, dhèwèké kasil nggayuh juara 1 badminton Pekan Olahraga Pelajar Seluruh Indonesia (POPSI) ing Solo taun 1974, banjur dadi juara Surya Cup II lan Surya Naga Cup ing Surabaya taun 1977. Dhèwèké dadi langganan juara ing kompetisi-kompetisi badminton, kayata juara Munardi Cup ing Semarang taun 1978, Sea Games Jakarta taun 1979, runner up Sea Games Manila taun 1981, runner up Piala Alba ing Kuala Lumpur taun 1983, runner up Kejuaraan Belanda Terbuka, runner up Taiwan Terbuka lan dadi anggota Tim Piala Thomas ing taun 1982.

Ing final Piala Thomas taun 1984 kepungkur ing Kuala Lumpur, dhèwèké ngalahaké Han Jian atlèt badminton saka Cina, kang nggawe Indonésia kasil menang 3-2. Dhèwèké uga nduwèni paraban "Hanoman" amarga dianggep nylametake regu Indonesia. Mulih ing Indonesia, dhèwèké disubya-subya lan dadi kembang lambéné bebrayan. Bebungahé padha mili. Dhèwèké nampa akèh layang saka pandhemen nganti aboté nyandhak 15 kg.

Ing taun 1985 dhèwèké dadi runner up ing Pekan Olahraga Nasional (PON) IX. Sawisé kuwi dhèwèké pènsiyun lan kerja ing pabrik rokok Djarum. Adhiké yaiku Eddy Hartono Arbi lan Haryanto Arbi, mbacutaké gegayuhané kanggo ngrengkuh juara ing All England.

Ringkesan Pawiyatan

• SD Masehi Kudus taun 1972
• SMP Katolik Kudus (ora lulus)