Kabayaki

Saka Wikipédia, Bauwarna Mardika abasa Jawa / Saking Wikipédia, Bauwarna Mardika abasa Jawi
Langsung menyang: pandhu arah, pados
Unadon kabayaki

Kabayaki (蒲焼、蒲焼き、かばやき?) yaiku sawijining cara masak iwak ing masakan Jepang. Sawise disigar lan dibuwang isi weteng lan balung, iwak disundhuk nganggo sundhukan wesi utawa sujèn (sundhukan sate saka pring), lan diwenehi saus kang digawe saka campuran kecap asin, mirin, gula pasir, lan sake.

Kabayaki dumadi saka tembung kaba atau gama (?), jeneng Jepang kanggo tanduran banyu kang diarani stok (Typha latifolia), lan yaki (?). Kembang Typha latifolia wujude gilig, wernane coklat semu emas kaya unagi kang disundhuk lan dibakar.[1]

Iwak kang padatan digawe kabayaki, tuladhane sidat Jepang (jeneng Jepang:unagi), Conger myriaster (anago), sauri pasifik (sanma), lan sarden (iwashi). Senajan kaya mangkono, iwak kang paling kerep digawe kabayaki yaiku sidat jepang lan Conger myriaster. Kang diarani kabayaki yaiku unagi kabayaki. Sauri pasifik lan sarden kang dimasak cara kabayaki luwih kerep didol minangka panganan kaleng.

Ana rong teknik masak kanthi cara kabayaki, yaiku kanthi cara Kanto lan cara Kansai. Ing tlatah Kanto, iwak dikukus dhisik nganti mateng, banjur dipanggang. Dene ing tlatah Kansai, iwak dipanggang tanpa dikukus.[2] Nalika dikukus, gajih ing unagi kalong. Awit saka iku, gajih unagi kabayaki cara Kanto luwih sithik tinimbang unagi kabayaki cara Kansai.[2]


Cathetan suku[sunting | sunting sumber]

  1. ^ Meikyo Kokugo Jiten, Kitahara Yasuo, ed. Tokyo: Taishukan, 2002. ISBN 4-469-02106-7
  2. ^ a b "東西のうなぎの蒲焼き". Tokyo Gas. http://home.tokyo-gas.co.jp/shoku110/unchiku/414.html. Retrieved 2010-07-26.
Sumber artikel punika saking kaca situs web: "http://jv.wikipedia.org/w/index.php?title=Kabayaki&oldid=832225"