Varietas

Saka Wikipédia Jawa, bauwarna bébas abasa Jawa

Istilah varietas duwé rong teges. Teges pisanan ya iku teges sacara botani lan teges kapindho ya iku teges sacara agronomi.

Varietas (teges botani)[besut | besut sumber]

Sacara botani, varietas iku populasi tetanduran jroning sawijining spesies sing nuduhaké ciri béda sing cetha. Panulisan jenengé dicithak miring (utawa digaris ngisor yèn tulisan tangan) lan didhisiki mawa singkatan "var." Conto: Oryza sativa var. indica.

Jroning taksonomi tetanduran, spesies arupa unit paling cilik jroning hierarki klasifikasi. Kabèh anggota spesies sing padha bisa sacara alamiyah silih kawin lan ngasilaké keturunan. Senajan mangkono, kanggo sapérangan spesies tinentu ana variasi sing cetha banget ing njeroné. Mula digawé sapérangan takson infraspesies (sangisoré spesies). Aturan lan dhéfinisi ngenani taksonomi tetanduran ditemtokaké jroning "Aturan Internasional kanggo Tatajeneng Botani" (International Code of Botanical Nomenclature, ICBN)[1]. Pangertèn varietas kaya iki dinggo déning ahli taksonomi tetanduran supaya ora dadi ambiguitas jroning panglompokan sawijijing populasi sajenis. Taksonomi kéwan mung ngenal subspesies minangka takson sangisoré spesies.

Varietas (teges agronomi)[besut | besut sumber]

Jroning tetanèn, varietas iku sinonim kanggo kultivar, sing watesan lan panjenengané diatur jroning "Aturan Internasional kanggo Tatajeneng Tetanduran Budidaya" (International Code of Nomenclature for Cultivated Plants, ICNCP). Kultivar (Inggris cultivar, saka cultivated variety) arupa panglompokan dhasar ("culton", saka cultivated plant taxon) kanggo tetanduran budidaya, lan diciptakaké déning L.H. Bailey ing taun 1923. Kultivar ditegesaké minangka saklompok tetanduran sing duwé siji utawa luwih ciri sing bisa dibédakaké sacara cetha, lan tetep duwé ciri khas iki yèn diréprodhuksi (sacara seksual uga aseksual). Sing bisa disebut kultivar kanthi mangkono ya iku populasi kaselèksi, galur, klon, utawa hibrida. Conto panjenengan: Oryza sativa 'Cisadane'.

Sing dimaksud karo tetanduran budidaya iku tetanduran sing dibudidayakaké déning manungsa sing bisa dibédakaké kanthi cetha saka cikal-bakal liaré utawa, yèn dijupuk langsung saka alam liar kanggo dibudidayakaké, layak kanggo diwènèhi jeneng khusus sing béda karo populasi liar kanggo kapentingan hortikultura (W.T. Stearn, 1986).

Pirsani uga[besut | besut sumber]

Sumber artikel punika saking kaca situs web: "https://jv.wikipedia.org/w/index.php?title=Varietas&oldid=1053299"