Subronto Kusumo Atmodjo

Subronto Kusumo Atmodjo

Subronto Kusumo Atmodjo ingkang misuwur kanthi asma Subronto K. Atmodjo (lair ing Tayu, Pati, Hindia Belanda, 12 Oktober 1929 – pati ing Bekasi, Jawa Barat, 12 Novèmber 1982 ing umur 53 taun) inggih punika salah satunggalipun seniman saking Indonésia. Namanipun misuwur minangka komponis, pemimpin koor, lan pangripta lagu ing mangsa perjuangan Republik Indonesia. Pakaryanipun antawisipun Kantata Bintang Betlehem. Wonten kiprahipun ing jagat seni musik, Subronto K. Atmodjo sampun ngripta kalih dasa lagu kanthi iringan piano, gangsal welas lagu koor, selangkung lagu gréja, 3 lagu kantata lan oratoria, satunggal iringan kanggé beksan sendratari, puluhan aransemèn musik, kalebet pakaryan lagu awujud mars. Salah satunggalipun lagu anggitanipun dipunmot wonten Sing! A New Creation, buku kidung pujian wujud pakaryan sesarengan antawisipun Institute of Christian Worship, Faith Alive Christian Resources, lan The Worship Commision of the Reformed Church in America.

Latar wingking

Subronto lair ing Désa Margotuhu, Kacamatan Tayu, Kabupatèn Pati, Hindia Belanda, 12 Oktober 1929 lan séda ing Bekasi, Jawa Barat, surya 12 November 1982. Piyambakipun naté dipunkunjara minangka tahanan pulitik ingkang dipunlebetaken wonten Pulau Buru jalaran dipunanggep ndhèrèk Gerakan 30.S/PKI kanthi ngripta lagu Nasakom Bersatu. Komponis ingkang lembah manah lan teguh punika pungkasané pasrah dhumateng Kang Maha Kuwaos, séda wonten griyanipun, ing tlatah Pondok Gede, Bekasi, dinten Jumat surya 12 November 1982, awit saking ketaman gerah paru-paru.

Ing mangsa rejanipun, lagu anggitanipun Subronto Kusumo Atmodjo sesirah Nasakom Bersatu tansah dipunpirengaken lumantar stasiyun Radio Republik Indonesia. Dasawarsa 1950-an Subronto kalebet salah satunggalipun komponis ingkang tuhu prigel. Suburlah Tanah Airku, pakaryanipun rikala samanten, dipunanggep déning para juru kritik lan musikus minangka pakaryan ingkang saé lan awèt nglangkungi jaman. Sadèrèngipun séda, satunggalipun kelompok koor nampilaken lelagon punika wonten Televisi Republik Indonesia stasiyun Jakarta kanthi katrangan bilih ing dasawarsa 1950-an namanipun kawentar minangka pangripta lagu, pemimpin kelompok koor, lan komponis. Kajawi nggulawenthah Koor Suara Merdeka, Subronto Kusumo Atmodjo ugi nggulawenthah Koor Suara Gembira ingkang asring nggelar pakaryanipun wonten RRI rikala samanten.

Ing taun 1962 piyambakipun dhumateng Jerman Wétan saperlu ngangsu kawruh, sinau babagan kor lan pranata lagu ing Sekolah Musik Hanns Eisler. Nanging sawangsulipun wonten Indonésia, sasampunipun lulus kanthi sebatan cum laude, 1968, Subronto dumadakan dipunkunjara, dados tahanan pulitik amargi kacathet minangka anggota Lekra (Lembaga Kebudayaan Rakyat) ingkang indhukipun wonten Partai Kuminis Indonesia. Kalih taun salajengipun, 1970, Subronto Kusumo Atmodjo dipunkintun wonten Inrehab, Pulau Buru. Wonten ing mriku, piyambakipun ngadegaken kelompok musik Wai Apu Nada lan nampilaken lelagon Kudaku Lari, Come Back to Sorrento lan La Paloma. Ing wulan Désèmber 1977, Subronto saweg saget wangsul dhateng Jakarta. Nanging sumangatipun minangka seniman mboten naté kendho. Awit saking sesrawungan kaliyan Alfred Simanjuntak, Direktur Utama PT. BPK Gunung Mulia, Subronto pikantuk kapracayan dados redhaktur musik wonten ing mriku.

Ugi pirsani

• Lekra
• Partai Kuminis Indonesia

Pranala njawi

• Tentang Subronto Kusumo Atmodjo