Rinding Gumbeng

Rinding Gumbeng inggih punika pirantos musik tradhisional ingkang asalipun saking Kabupatèn Gunungkidul, Daérah Istiméwa Ngayogyakarta. Rinding punika anggènipun ngungelaken sarana kapèpètaken ing lathi, kapadalaken ing waja, lajeng katarik-tarik ngagem tangsul, wondéné Gumbeng punika anggènipun ngungelaken sarana kathuthuk. Rinding Gumbeng namung kamainaken nalika mangsa panèn kémawon.

Wedharan

Rinding punika kadamel saking sawilah deling mawi panjang 25 sèntimèter kaliyan kandel 2 milimèter. Ing sawilah punika dipun bolongi bagéan tengahipun kados dom mawi panjang 20 sèntimèter. Ing pucuking deling kaparingan tangsul kagem narik ing sisih sanèsipun minangka cekelan. Cara ngungelaken sarana kapèpètaken ing lathi, kapadalaken ing waja, lajeng katarik-tarik ngagem tangsul. Wujud ingkang mèmper dom ing bagéan tengah bakal kedher kaliyan ngasilaken ungel lumantar swantun ingkang medal saking krongkongan. Wondéné Gumbeng kadamel saking deling wutuh ingkang dipun bolongi sawetawis bolongan.

Pirantos punika namung kamainaken nalika mangsa panèn kémawon dalah upacara ruwahan. Juru main Rinding Gumbeng cacahipun 4–5 tiyang, kadhangkala ugi wonten ingkang nembang supados regeng anggènipun main. Bebrayan ing Kapanéwon Ngawèn, Gunungkidul mitadosi menawi Déwi Sri badhé rawuh tur kalipur mirengaken musikipun, sarta mbekta kasuburan kaliyan asil panèn ingkang kathah dhumateng sabinipun.