Pulo Satu

Saka Wikipédia Jawa, bauwarna mardika basa Jawa
Menyang navigasi Menyang panggolèkan
Pulo Satu
Géografi
Pulo Satu

Pulo Satu inggih kalebet ing salah satunggaling pratélan pulo paling jaba ing Indonésia ingkang mapan wonten ing samudra Hindia. Pulo Satu punika kalebet laladan watesaning Indonésia kaliyan nagara Australia. Pulo Satu punika mlebet péranganing wewengkon pamaréntahan kabupatèn Bengkulu Utara, provinsi Bengkulu. Pulo punika mapan wonten ing sisih kilèn saking kitha Bengkulu kanthi koordinat 05° 28′ 15″ LS, 102° 14′ 01″ BT. Ambanipun pulo satu inggih ± 1,5 Ha. Para kulawarga warigaluh ingkang kathah dumunung ing Pulo Satu. Pulo Satu kalebet pulo-pulo alit ing sakitering wewengkon Bengkulu ingkang boten wonten pendhudhukipun. Papan dumunungipun pulo Satu caket kaliyan Pulo Dua, Pulo Bangkai, Pulo Merbau, saha Pulo Enggano.[1] Pulo Satu namung gadhah amba kirang lankung 1,5 hèktar, lan boten kapanggih wontenipun yasan ingkang madeg ing pulo punika. Nanging, ingkang kapanggih namung sapérangan jinising tuwuhan, kados ta wit kambil, coklat, saha kayu merbabu ingkang dipuntandur déning warga Enggano.

Kaanan Sak Punika[besut | besut sumber]

Nanging sapunika Pulo Satu namung kantun namanipun kemawon amargi kawontenanipun pulo Satu punika sampun boten wonten. Pulo Satu ingkang mapan wonten ing sakitering Pulo Enggano, 90 mil saking itha bengkulu sapunika sampun boten wonten amargi sampun kelelep toya laut amargi wonten abrasi ingkang inggil ing perairan Enggano.[2] Kala rumiyin, ing pulo satu punika taksih wujud alas ingkang dipuntanduri wit kambil nanging ing wekdal sapunika sedaya jinisi tetanduranipun sampun ical lan ingkang wonten kantun gundukan pasir kemawon. Inggilipun abrasi laut ing Pulo Satu punika sampun kadadosan wiwit taun 1990-an, lan paling parah nalika abrasi ing taun 1997. Sadèrèngipun, ing Pulo Satu punika sampun naté dipundadosaken papan dalemipun suku Kaarubi. Nanging amargi kathah para warigaluh ingkang asring nebas wit kambil saha wit-witan sanès ing pulo punika, mila pulo satu punika rikat anggènipun ical. Kanthi icalipun Pulo Satu saha Pulo Bangkai punika dadosaken masarakat warga Enggano khawatir amargi prakawis punika saged ngganggu kawontenanipun gesang para warga ing pulo Enggano.

Cathetan suku[besut | besut sumber]

  1. [1] Kenali Pulau Terluar Bengkulu (dipunundhuh tanggal 6 Januari 2013)
  2. [2] Dua Pulau di Bengkulu Tenggelam (dipunundhuh tanggal 6 Januari 2013)