Pasang Tuwuhan

Saka Wikipédia Jawa, bauwarna mardika basa Jawa

Pasang tuwuhan (ꦥꦱꦁꦠꦸꦮꦸꦃꦲꦤ꧀) awujud maneka werni tetuwuhan ingkang kapasang ing gapura pawiwahan saha ing pasirahaman calon temanten. Ancasipun pasang tuwuhan inggih menika pangajab murih temanten benjangipun saged nuwuhaken gesang bebrayan ingkang utami saha mulya. Wondene jinising tuwuhan saha maknanipun inggih menika.

  1. Pisang Raja suluhan setandhan jangkep kalihan saperangan witipun lajeng kapasang ing gapura pawiwahan. Maknanipun mugi temanten saged nggadhahi watak saha sipat kados raja.
  2. Cengkir gadhing utawi klapa werni jene. Maknanipun mugi tresnanipun calon temanten linambaran tresna ingkang suci kados toya ing salebeting klapa.
  3. Tebu wulung watangan maknanipun mugi pamilihing garwa kanthi anteping kalbu saha teteging iman.
  4. Ron kluwih, mugi anggenipun mantu tansah kaparingan kaluwihan ugi gesangipun calon temanten.
  5. Ron alang-alang, ing pangajab anggenipun mantu kalihan gesanging temanten tebih saking salwiring alangan utawi pepalang.
  6. Ron apa-apa utawi ron dhadhap serep murih anggenipun mantu boten wonten apa-apa kalis saking samukawis alangan manggih karaharjan ngantos pungkasing gati.
  7. Pari sawuli, mugya gesangipun calon temanten saged kados pari tansaya isi tansaya tumungkul ugi saged gesang ngrembaka murih murakabi.
  8. Sekar saha wohing kapas pangajabipun murih calon temanten gesang cekap sandhang pangan.
  9. Ron waringin sarencekipun kanthi ancas mugi calon temanten kalihan ingkang pamengku karsa pinaringan pangayoman saha sageda angayomi.
  10. Pengaron isi kembang setaman kapapanaken ing sacaketing tetuwuhan murih temanten pinaringan raos suka ing manah kados sekar ing taman.
  11. Janur (jarwa dhosok: sejatinging nur utawi Gusti) mugi calon temanten pikantuk wewarah saha pitedah saking Gusti ingkang Mahamirah.

Pasang tuwuhan menika minangka salah satunggaling lampah tata cara awal mantu ing adat Jawi.

Pratelan Waosan[besut | besut sumber]

Pringgawidagda. Suwarna. 1998. Gita Wicara Jawi. Yogyakarta: Penerbit Kanisius.