Misha Defonseca

Misha Defonseca (lair ing Etterbeek, Bèlgia, 12 Mèi utawa 2 September 1937) iku sawijining penulis buku Amérikah Sarékat asal Bèlgi. Dhèwèké nulis buku ajudhul Misha: A Mémoire of the Holocaust Years, kang jaréné minangka mémoaré nalika jaman Perang Donya II. Buku iki diterbitaké ing taun 1997. Vèrsiné ing basa Prancis didadèkaké filem mawa judhul Survivre avec les loups ("Awèt urip karo sregala"). Nanging tanggal 29 Fèbruari 2008, Defonseca liwat pengacarané ngaku yèn karyané iki namung fiksi waé kamangka sadurungé dikandhakaké karyané iki dhedhasar kisah nyata.

Babad slira

Misha Defonseca kang jeneng asliné iku Monique de Wael, lair ing taun 1937 ing Etterbeek, cedhak Brussel, Bèlgi minangka putriné Robert De Wael lan Josephine Donvil. Kulawargané dudu kulawarga Yahudi, kaya ditulis otobiografiné, nanging kulawarga Katulik. Wong tuwané dadi laskar kang mbaléla lan ngraman kaum Jerman Nazi lan mulané dipatèni wong Jerman kang kala iku njajah Bèlgi. Defonseca lan garwané, Maurice, pindhah menyang Amérikah Sarékat saka Paris ing taun 1988 lan tuku omah ing Millis, Massachusetts. Maurice nganggur nganti tengahan taun 1990-an. Misha banjur miwiti carita marang kanca-kancané carita nalika dhèwèké isih enom; kudu lelana nglintasi bawana Éropah, kamangka umuré lagi enem taun sawisé wong tuwané didéportasi ing taun 1941 lan direksa déning grombolan sregala kang awèh pitulung, matèni sawijining prajurit Jerman amarga béla dhiri, lumebu metu Ghetto Warsawa, lan wusanané bisa mulih menyang omah sawisé perang. Jane Daniel, sawijining penerbit buku, ngakon Defonseca nulis mémoir prakara mangsa ciliké sawisé krungu Defonseca carita bab iki ing sawijining sinagoga ing Massachusetts.

Sadurungé tinemu yèn carita iki tibakné palsu, buku iki wis ngasilaké sengkéta pengadilan antara Defonseca, Daniel lan penerbit bukuné ing Amérika. Daniel lan Defonseca garejegan prakara bathi buku iki kang laris banget. Ing 2005, pengadilan ing Boston ngakon Daniel mbayar Defonseca lan "penulis hantuné" Vera Lee $22,5 yuta. Para pengacara Defonseca kandha yèn Daniel durung mbayar dhuwité iki. Sanadyan akèh kang seneng, buku iki uga ana kang ngritik amarga ana sawatara fragmèn kang ora logis utawa ora mungkin kadadéan kanthi historis. Salah sijiné kritikus kang ragu iku Henryk M. Broder, kang nulis sawijining biografiné Defonseca ing taun 1996 kanggo koran Jerman der Spiegel.

Ing sasi Fèbruari 2008, sawijining surat baptis saka sawijining gréja ing Brussel kanggo Monique De Wael lan pratélan ing sawijining SD cedhak omahé De Wael nudhuhaké yèn dhèwèké lumebu sekolah ing September 1943, rong taun sawisé Misha jaré lunga saka Brussel.

Ing tanggal 29 Fèbruari 2008, Defonseca pungkasané ngaku yèn dhèwèké namung gawé-gawé waé lan caritané iku namung fiksi waé lan dudu kisah nyata.

Pranala njaba

• (ing basa Prancis) Witness of Misha Defonseca telling her true life