Ènzim

Modhèl komputer enzim nukleosida purin fosforilase

Enzim iku siji utawa sapérangan gugus polipeptida (protein) kang duwé fungsi minangka katalis (senyawa kang nyepetaké prosès réaksi tanpa entèk ngréaksi) ing sawijining réaksi kimia. Carané kerja enzim yaiku nèmpèl ing sanjaban molekul dat-dat kang lagi réaksi lan kanthi mangkono nambah cepeting prosès réaksi. Panyepetan dumadi amargi enzim ngedhunaké energi pangaktifan kang banjur nggampangaké dumadiné réaksi. Sabagéyan gedhé enzim kerja kanthi cara khas, kang ateges saben jinis enzim mung bisa kerja ing samacem senyawa utawa réaksi kimia. Iki amarga bédaning struktur kimia saben enzim sing sifaté tetep. Minangka conto, enzim α-amilase mung bisa dipigunaaké ing prosès pangrombakan pathi dadi glukosa.

Perkara sing gegandhèngan karo enzim disinaoni ing enzimologi. Ing donya pendhidhikan dhuwur, enzimologi ora disinaoni dhéwé minangka sajurusan dhéwé nanging sagunggungan program studi maringaké mata kuliah iki. Enzimologi utamané disinaoni ing kadhokteran, èlmu pangan, tèknologi pangolahan pangan, lan cawang-cawang èlmu tetanèn.

Kerja enzim dipangaruhi déning sapérangan faktor, utamané yaiku substrat, suhu, kaasaman, kofaktor lan inhibitor. Saben enzim merlokaké suhu lan pH (tingkat kaasaman) optimum kang béda-béda amarga enzim iku protèin, kang bisa ngalami owah-owahan wangun yèn suhu lan kaasamané owah. Ing sanjabaning suhu utawa pH sing selaras, enzim ora bisa kerja sacara optimal utawa strukturé bakal ngalami karusakan. Iki bakal njalari enzim kèlangan fungsiné babar pisan. Kerja enzim uga dipangaruhi déning kofaktor lan inhibitor.

Saiki, enzim iku senyawa sing umum dipigunaaké ing prosès prodhuksi. Enzim kang dipigunaaké umumé asalé saka enzim sing diisolasi saka bakteri. Panggunaan enzim ing prosès prodhuksi bisa ningkataké èfisiènsi sing bakal ningkataké cacahing prodhuksi.