Masjid Muhammad Cheng Ho

Saka Wikipédia Jawa, bauwarna mardika basa Jawa
Menyang navigasi Menyang panggolèkan
Gambar masjid Muhamad Cheng Ho

Masjid Muhammad Cheng Hoo ya iku masjid kang diyasa déning muslim tionghoa sing kagabung marang Persatuan Islam Tionghoa Indonésia (PITI) Jawa Wétan.[1] Manggon ing Jl. Gading No. 2 Surabaya lan sanggup nampung 200 jamaah.[1] Wewangunan kanthi arsitèktur Tiongkok iku saklebatan luwih memper klentheng tinimbang masjid.[1] Sinaput rupa abang getih lan kubah modhèl trap-trapan tumpuk telu, Masjid Muhammad Cheng Hoo pancen ngemba yasan-yasan kas Tiongkok kuna.[1] Nadyan cakrike artistik, nanging ora pati gedhé kanggo ukuran sawijining papan ngibadah.[1] Wewangunan intine mung ukuran 11 x 9 mèter.[2] Nanging yèn dielokake karo teras sisih kiwa tengen, ambané masjid mau dadi 21 x 11 mèter.[2] Pérangan dhuwur wewangunan inti mau dumadi saka 8 sisih.[2] Angka-angka mau duwé teges dhéwé-dhéwé.[2] Angka 11 minangka ukuran ka’bah rikala mentas diyasa déning Nabi Ibrahim, 9 minangka lambang anané Wali Sanga, déné 8 mengku teges pat kwa (kejayaan utawa kabegjan ing basa Tiongkok).[2] Replika kapal layar duwéke Laksamana Cheng Hoo ngrenggani pérangan sisih tengene masjid.[2] Relief kang nggambaraké aksi heroike Laksamana Cheng Hoo ing segara tinatah ing témbok.[2] Laksamana Cheng Hoo minangka panglima perang segara sing ngrasuk agama Islam.[2] modhel masjid kanthi cangkrik Tiongkok kuna mau diilhami déning masjid Niu Jie ing Beijing, Cina.[2]

Cathetan suku[besut | besut sumber]

  1. a b c d e "Masjid Muhammad Cheng Ho".Panjebar Semangat.edisi 41:2007 kaca:29
  2. a b c d e f g h i "Masjid Muhammad Cheng Ho".Panjebar Semangat.edisi 41:2007 kaca:30