Surtanah

Surtanah utawa bedhah bumi iku upacara kang diselenggaraake sak bubare acara nyarèkaké layon (jenazah). Tujuané kanggo ngirim donga supaya arwah utawa roh wong kang séda iku éntuk pangapura déning Ingkang Maha Kuwasa.

Upacara surtanah iki karantam kanthi prasaja. Sing teka racaké sadulur, tangga teparo, uga ulama. Sak liyané dedonga uga bisa dibacutake nganggo acara tahlilan kang lan ngaji bebarengan.

Ora ana uleman utawa undangan mirunggan kanggo acara iki nanging racaké tangga teparo lan sanak kadang teka sinambi nggawa bahan-bahan pangan, kaya ta beras, endhog, bahan kanggo njangan, gula, kopi utawa dhuwit lan liyané. Kaya mangkono mau minangka pambiyantu lan ngentengake bot repote kulawarga kang nembé nandang sungkawa utawa kesripahan.

Ndonga

Inti acara surtanah lan upacara adat kesripahan liyané ya iku ndedonga, mligi kang ndonga ya iku anak-anaké kang séda, sanak kadang, kanca, tangga teparo, utawa sapa baé kang gelem mèlu ndonga. Ora ana acara kendhurèn, yèn ana pasugatan kang disuguhaké iku mung sak anané. Bisa uga yèn kulawarga kang kesripahan péngin sodaqoh upamané nggawé panganan kang rada akèh utawa nyiapaké bèsèk kanggo diaturake kang pada rawuh, nanging bab besekan iku mau ora wajib. Sing apik lan kaprayogakaké malah wong liya (tangga, kanca lan liyané) nggawa bantuan kanggo kulawarga kang kesripahan.

Uga delengen

• Nelung dina
• Pitung dina
• Patangpuluh dina
• Nyatus dina
• Nyèwu