Basa Hagkah

Saka Wikipédia Jawa, bauwarna mardika basa Jawa
Loncat ke navigasi Loncat ke pencarian

Basa Hagkah utawa basa Kek (Aksara Kan: 客家話) yaiku klumpukan basa Cina kang dipocapake dening wong Hagkah ing Cina Kidul, Taywan, Hongkong, Makaw, lan sajroning laladan pêpêncaring wong Cina ana ing Asiyah Wetan, Asiyah Kidul Wetan, lan sapanunggalane.

Amarga pingguna utamane ing laladan dhedhewe kang kapêncar kang kandhawarane kawatês ing laladan sakiwatêngêne wae, basa Hagkah banjur ngêmbangake carabasa-carabasa ing saperangan propinsi kaya ta Kwangtung, Kwangsyi, Haynan, Fujyen, Sêcwan, Hunan, Cyangsyi, lan Kwicow uga ing Hongkong, Taywan, Singgapur, Malaysiyah, lan Indhonesiyah. Basa Hagkah ora dipadhamangreteni karo basa Ywe, basa Wu, basa Min Kidul, basa Mandharin, utawa basa Cina liyane lan dheweke uga nduwe saperangan jinis carabasa kang ora madhamangreti. Basa iki paling cedhak karo basa Kan lan kadhang kala kalebokake dadi jinis carabasaning Kan kanthi carabasa Hagkah Lor bisa saparo madhamagreti karo carabasa Kan Kidul. Ananging, ana kabokmanawan uga yen papadhamangreti mau mung saka 'fitur' laladan kang diduweni babarengan.

Taywan sing nduwe pamocap wiwitan basa Hagkah kanthi sithik uga dumadi tetengahing wiyata lan panguri-uri basa iki. Carapocap kang beda ana antaraning carabasa Hagkah Taywan lan carabasa Hagkah Cina Dharatan. Malah, ing Taywan uga ana rong carabasa Hagkah utama.

Carabasa Moyyen ing Kwangtung Lor Wetan uga dumadi carabasa Hagkah baku ing Ganagara Babrayan Cina (Ind: RRC). Dhepartemen Wiyata Propinsi Kwangtung gawe caralatin parijawat (Ind: romanisasi resmi) kanggo carabasa Moyyen ing taun 1960 lan dumadi salah sawiji saka patang basa kang nduwe dedeg kahanan iki ing Kwangtung.