Alkimiya

Saka Wikipédia Jawa, bauwarna bébas abasa Jawa
Kimiya-yi sa'ādat (Alkimiya Kabagyan) – tulisan ngenani filsafat Islam lan alkimiya spiritual déning Al-Ghazali (1058-1111).

Alkimiya (cara Inggris: alchemy) iku tradhisi purwakawruh lan filosofis sing diayahi ing saindenging Éropah, Mesir, lan Asiah. Tradhisi iki ancasé ngeningaké, matengaké, lan nyampurnakaké sawenèh barang.[1][2][c 1] Ancasé sing lumrah ya iku (1) krisopéa, ya iku transmutasi "métal dhasar'' (contoné: tembaga) dadi "métal mulya" (mliginé emas); (2) kanggo gawé usada amerta; (3) nyipta panakéa sing bisa nambani samubarang lelara; lan (4) pangembanging alkahèsi utawa palarut universal.[3] Sampurnané angga lan sukmané manungsa dianggep bisa dumadi krana magnum opus alkimiya lan, ing tradhisi Kulonan lan Yunani, awit antuking genosis.[2] Ing Éropah, ciptaning watu kramat asring digayutaké karo pangudi-pangudi iki.  

Ing basa Inggris, istilah alchemy asring mung winates nglimputi tradhisi alkimiya ing Éropah, masiya tradhisi sing padha uga ana ing Wétan Adoh, Indhia, lan jagat Muslim. Ing Éropah sawisé Rénaisans abad ping 12, nalika karya-karya abasa Arab ing babagan sains lan Temu Balining Aristotèles akèh dipertal, juru alkimiya mono wigati ing babagan sains modhèren wiwitan[4] (mliginé ing babagan kimiya lan usada). Juru alkimiya Islam lan Éropah ngembangaké strukturing tèknik-tèknik, ancangan, terminologi, mètodhe èkspèrimèn laboratorium dhasar sing sawenèhé isih kanggo ing jaman saiki. Ananging, para juru alkimiya iki isih percaya bab patang unsur satemah njaga garapané sarana sandi lan simbolisme sinandi. Garapané iku manut paugeran Hèrmètis sing gegayutan karo klenik, mitologi, lan agama.[5]

Ing wektu iki, rembugan babagan alkimiya lumrahé kapérang ing paniti tumrap (1) cak-cakan praktis tur èksotèrisé lan (2) aspèk ésotèrisé, masiya ana panemu saka sujana kaya ta Homyard[6] lan von Franz[7] yèn kaloroné mono kudu dicandhak minangka palengkap. Cak-cakan praktis tur èksotèris iku diluru déning sujarawan èlmu fisika sing nlitèni subyèk iku kanthi sebutan purwakimiya, usada, lan klenik-klenikan. Aspèk ésotèrisé dadi kawigatèné para sujarawan ésotèrisisme, psikolog, lan sawenèh filsuf lan spiritualis. Subyèk iki terus-terusan mrabawani sastra lan seni. Masiya ana pamérang iki, sing diyakini von Franz wis ana kawit mulabukané tradhisi Kulonan sing nyarub filsafat Yunani karo tèknologi Mesir lan Mésopotamia,[7] manéka sumber nandhesaké integrasi panyandhak ésotèris lan èksotèris tumrap alkimiya. Sumber sing paling lawas ya iku buku abad ping telu asesirah Perkara Fisik lan Mistik (cara Yunani: Physika kai Mystika) karyané Bolus saka Mèndhès.[8]

Pratélan tetembungan[besut | besut sumber]

Cathetan[besut | besut sumber]

  1. ^ Kanggo katerangan rinci bab perkara ing marna alkimiya, waca Linden 1996, pp. 6–36

Rujukan[besut | besut sumber]

Sitiran[besut | besut sumber]

  1. ^ Malouin, Paul-Jacques (1751), "Alchimie [Alchemy]", Encyclopédie ou Dictionnaire Raisonné des Sciences, des Arts, et des Métiers, Vol. I, Paris: translated by Lauren Yoder in 2003 for Michigan Publishing's The Encyclopedia of Diderot & d'Alembert Collaborative Translation Project .
  2. ^ a b Linden (1996), pp. 7 & 11.
  3. ^ "Alchemy", Dictionary.com .
  4. ^ Chemical Knowledge in the Early Modern World, Chicago: University of Chicago Press, 2014 .
  5. ^ Wouter J. Hanegraaff (Cambridge University Press: 2012), Alchemy between Science and Religion, Esotericism and the Academy: Rejected Knowledge in Western Culture
  6. ^ Holmyard 1957, p. 16
  7. ^ a b von Franz (1997).
  8. ^ Antoine Faivre, Wouter J. Hanegraaff. Western esotericism and the science of religion. 1995. p.96

Bibliografi[besut | besut sumber]