Trap Barrier System
Trap Barrier System (TBS) ya iku salah siji cara ngendhalèkaké populasi tikus ana ing sawah mligi kang ditanduri pari. TBS ya iku wujud tèknologi nyekel tikus mawa wuwu lan tuwuhan pancingan. Tèknologi iki wus nyata bisa nyekel tikus sawah kanthi cacah akèh lan terus-terusan saka wiwit tandur nganti tekané panèn. TBS mempan digunakaké ing papan èndhèmik tikus kanthi cacah populasi kang dhuwur.[1]
TBS ora migunakaké racun, nanging migunakaké sipat tikus kang tansah pindah saka rong/susuhe ing galengan/tegalan menyang sawah kang dadi jujugané golèk pangan.
Saliyané ing Indonésia, TBS uga wis kasil ditrapaké ing Filipin[2], India[3] lan Ostrali[4].
Pangecaké TBS[besut | besut sumber]
TBS bisa dipasang kanthi pirang-pirang cara. Sing paling wigati, kabèh kadang tani ing sawijining bulak mangertèni lan nyengkuyung cara kang dipilih.
1. TBS kanthi tuwuhan pancingan ditandur luwih dhisik.
Sapérangan sawah ditanduri pari luwih dhisik tinimbang sakiwa tengené watara 3 minggu, ambané udakara 25x25 mèter utawa luwih. Tujuwané supaya tikus marani sawah kang luwih dhisik ditanduri. Sawah mau dikupengi déning TBS kanggo nyekel tikus kang mara. Cara iki bisa ngundang tikus udakara 200 mèter saka kono.
2. TBS pinihan
TBS dipasang ngupengi sawah kang minangka pinihan.
3. TBS kanthi tuwuhan pancingan ditandur kèri.
Kayadéné TBS kanthi tuwuhan kang ditandur dhisik, tuwuhan pancingan uga bisa ditandur kèri. Iki migunakaké serangan tikus kang lumrahé tumuju marang sawah kang tanduré ora bebarengan.
Piranti kang dibutuhaké[besut | besut sumber]
TBS migunakaké cara kang prasaja, ya iku pager plastik lan wuwu. Saubenging sawah kang dijaga, digawé kalènan lan dilep banyu, banjur dipageri mubeng lan rapet nganggo lembaran plastik. Kanggo njaga supaya tetep jejeg, saben sakmèter lembaran plastik disangga nganggo placek saka pring utawa kayu. Lembaran plastik kudu kaclup ana ing banyu, kanggo nyegah tikus mbolong pager plastik. Saben watara 20 mèter, pager dibolong lan dipasangi wuwu kanggo nyekel tikus kang lumebu ing bolongan. Saben ésuk wuwu dipriksa, lan manawa ana kéwan liya (kadhal, ula, kodhok, lsp) diculaké. Manawa ana tikus kang kecekel banjur dipatèni kanthi nglelepaké wuwu ing banyu udakara 1 menit.
Linear Trap Barrier System (LTBS)[besut | besut sumber]
TBS uga bisa dipasang ing turut pinggir bulak, ya iku ing kikising sawah karo papan kang disenengi tikus kanggo ndelik lan gawé rong, ya iku ing désa/kampung, tanggul lan galengan. TBS dipasang sadawané pinggir sawah, dawané paling ora 100 mèter, déné wuwu dipasang selang-seling arah lumebu lan metu saka sawah. Miturut panalitèn, TBS luwih kasil manawa dipasang ing pinggir sawah kang cedhak papan susuhé tikus.[5]
Rujukan[besut | besut sumber]
- ↑ "TBS & LTBS, Teknik efektif mengatasi hama tikus". Diarsip saka sing asli ing 2017-06-02.
- ↑ "Let's manage rats through community trap barrier system [2004]".[pranala mati permanèn]
- ↑ Srinivasa, Rao N (2010-10-21). "Evaluation of Trap Barrier System for the Management of Lesser Bandicoot Rat, Bandicota bengalensis in Irrigated Rice". Indian Journal of Plant Protection. 38: 193.
- ↑ "Non-chemical Control of Rodents in Lowland Irrigated Rice Crops" (PDF). Diarsip saka sing asli (PDF) ing 2012-04-03.
- ↑ Herlina, Novialita (2016-01-01). "Efektivitas Trap Barrier System Dalam Menangkap Tikus Sawah". UNS-F. Pertanian Jur. Agroteknologi-H.0712140-2016.