Pablo Picasso

Saka Wikipédia, Bauwarna Mardika abasa Jawa / Saking Wikipédia, Bauwarna Mardika abasa Jawi
Langsung menyang: pandhu arah, pados
Pablo Picasso
Pablo picasso 1.jpg
Pablo Picasso 1962
Asma lair Pablo Diego José Francisco de Paula Juan Nepomuceno María de los Remedios Cipriano de la Santísima Trinidad Ruiz y Picasso[1]
Lair 25 Oktober 1881
Málaga, Spain
Séda 8 April 1973 (umur 91)
Mougins, France
Warga nagara Spanish
Bidang Painting, Drawing, Sculpture, Printmaking, Ceramics
Palatihan Jose Ruíz (father), Academy of Arts, Madrid
Aliran Cubism
Karya misuwur Les Demoiselles d'Avignon (1907)
Guernica (1937)
The Weeping Woman (1937)
Signatur Pablo Picasso

Pablo Ruiz Picasso (25 Oktober 18818 April 1973) punika seniman ingkang misuwur ing aliran kubisme lan dipunkenal dados pelukis revolusioner ing abad kaping 20. Jénius seni ingkang pinter ndamel patung, grafis, keramik, kostum penari balét ngantos tata panggung. Miyos ing Malaga, Spanyol 25 Oktober 1881 kanthi asma lengkap Pablo (or El Pablito) Diego José Santiago Francisco de Paula Juan Nepomuceno Crispín Crispiniano de los Remedios Cipriano de la Santísima Trinidad Ruiz Blasco y Picasso López. Ramanipun Josse Ruiz Blasco, setunggaling profésor seni lan ibunipun Maria Picasso Lopez.

Pendidikan[sunting | sunting sumber]

Picasso kagungan sifat adreng ngangsu kawruh. Bèntening kitha utawi nagari mboten dados alangan kanggé pikantuk manéka warna èlmu. Ing yuswa 14 taun, panjenenganipun lulus ujian mlebet School of Fine Arts ing Barcelona lan kalih taun pindhah dhateng Madrid kanggé ngangsu kawruh ing Royal Academy. Mboten lami salajengipun panjenenganipun kundur malih ing Barcelona lan tumut ing Els Quatre Gats, papanipun para penyair, artis lan kritikus kanggé lintu-lintunan gagasan ingkang dipunpikantuk saking luar Spanyol. Ing yuswa 23 taun, Picasso pindah dhateng Paris, kitha pusat seni donya ing wekdal punika.

Pakaryan[sunting | sunting sumber]

Demoiselles d'Avignon

Picasso ngasilaken 20.000 karya ing gesangipun. Ingkang mranani, Picasso asring gantos gaya lukisan. Piniki saged kedadosan amargi Picasso kagungan kathah réncang. Kados saking gaya lukisan biru lan jambon (amargi lukisan dipundhominasi warna biru lan jambon) éwah drastis dhateng gaya kubisme, amargi pangaruh reréncanganipun kaliyan Georges Braque.

Gaya kubisme puniki ingkang ndamel kagéting donya seni, amargi ngéwahi persépsi tiyang tumrap kaéndahan seni. Yèn sadèrèngipun lukisan wanita gampil dipunkenali pasuryan modhélipun, déning Picasso dipundamel drastis saéngga wangun lukisanipun awrat dipunkenali malih, kados ingkang panjenenganipun tuangaken ing karya Demoiselles d'Avignon. Puniki mboten lajeng Picasso sembarangan mawon ndamel lukisan. Panjenenganipun sadèrèngipun sampun nyinaoni karya pamatung Iberia lan patung-patung Afrika sanès (patung primitif) ingkang biasa wangunipun mlengkung lan mboten proporsional.

Kambotensembarangan Picasso ugi dipunbuktèaken kanthi sapérangan éksperimén ingkang asring dipunlampahi, utaminipun ing perspektif lan distorsi ingkang wonten ing setunggaling lukisan. Saéngga gaya kubisme panggihan Picasso puniki ngéwahi wawasan donya dhumateng panilaian setunggaling lukisan. Lukisan mboten namung kaéndahan seni, nanging arupi asil panlitén lan éksperimén.

Inspirasi saking Kasunyatan Gesang[sunting | sunting sumber]

Picasso punika seniman ingkang melankolis, kagungan kapribadian kiyat, égois lan gesangipun bébas sanget. Mboten ngéramaken, karya karyanipun kathah neyerminaken kapribadianipun punika. Kapribadianipun ingkang kiyat, égois lan bébas, kathah ketingal saking karya seninipun ingkang kagungan kesan kontrovérsial lan èksprésif sanget, bénten saking ingkang naté wonten sadèrèngipun. Ing sisih sanès, kamelankolisan Picasso katon saking sifatipun ingkang sénsitif sanget sarta rinci salebeting mbiji satunggaling kasunyatan gesang. Panjenenganipun saged ndamel kasunyatan gesang punika dados sumber inspirasi karyanipun. Umpaminipun lukisan Mesra Cinta (periode biru) ingkang suasananipun muram lan pesimis, nyerminaken mangsa-mangsa awrat Picasso ing tengah situasi ingkang kompetitif. Lukisan Guernica ingkang dados pusat paningal ing Museum Reina Sofia (Madrid) punika gorésan tangan saking asil péngetaning tragedi berdarah awal taun 1930-an ing dhaérah Basque, Guernica dumados nalika perang sipil lan dhawahipun atusan bom. Salajengipun burung merpati, simbol perdamaian donya, nyatanipun ugi arupi rancanganipun. Picasso ngrampungaken seni grafis punika sasampunipun terisnpirasi déning burung Melanesia, paringanipun Henri Matisse.

Langkung unik malih, Picasso ugi ndadosaken wanita sumber inspirasi. Kocap, saben wanita maringi inspirasi bénten dhumateng piyambakipun. Umpaminipun saking pacanganipun, Marie-Terese Walter, panjenenganipun ngasilaken karya La Reve (impén) ingkang dipunsadé 48.402.500 dolar AS. Saking pacangan sanèsipun, Eva Gouel, kawiyosaken lukisan Femme Assise Dans Un Fauteuil, ingkang lumebet salah satunggiling adikarya gaya kubistis. Mboten éram yèn Picasso ngantos dipunjuluki Don Juan (playboy). Picasso asring gonti-ganti pacangan. Panjenenganipun ugi sampun palakrama makaping-kaping, antawisipun kaliyan Fernande Olivier, Marchelle Thumbert, Olga Kohklova lan Jaqueline Roque.

Rujukan[sunting | sunting sumber]

Weblinks[sunting | sunting sumber]

Sumber artikel punika saking kaca situs web: "http://jv.wikipedia.org/w/index.php?title=Pablo_Picasso&oldid=853966"