Ombak

Saka Wikipédia, Bauwarna Mardika abasa Jawa / Saking Wikipédia, Bauwarna Mardika abasa Jawi
Langsung menyang: pandhu arah, pados
Ombak

Ombak yaiku prastawa munggah mudhuné partikel-partikel banyu.[1] Ombak ugabisa ditegesi obahé banyu segara sing munggah mudhun utawa nggulung-nggulung.[2] Ana telung faktor kang njalari dadiné ombak, yaiku pasang-surut (swell), angin panté (local wind), lan mudhun-munggahé massa watu ing dhasar samodra.[1] Pasang-surut banyu segara iki amarga ana gaya gravitasi bulan.[1] Nalika bulan ing posisi celak karo permukaan bumi, banyu segara ing dhaérah iku ketarik dèning gaya gravitasi bulan lan njalari banyu segara pasang.[1] Déné ing dhaérah bumi liya kang adoh saka posisi bulan, banyu segara surut. Obahé banyu segara iki kanthi bentuk ombak.[1]

Angin kang obah nerjang permukaan segara, sithik mbaka sithik mbentuk obahé ombak kang nggulung.[1] Saya kenceng angin kang nerjang permukaan segara, saya gedhé uga ombak kang dikasilaké.[1] Marga dhasar ombak kena dharatan nalika menyang panté, ombak ngalon amarga ana gèsèkan.[1] Nalika kuwi, puncak ombak tetep mlaku banjur wutah.[1] Yèn ing segara kadadéyan gelombang ombak kang gedhé banget, ing panté bakal kawentuk puncak ombak kang dhuwur lan wutahan kang gedhé.[1]

Obahé massa watu ing dhasar samodra uga njalari ombak.[1] Ombak sing kaya iki uga diwastani tsunami.[1] Nalika ana obah-obahan watu-watu ing dhasar segara, ombak kuwi bakal nyebabaké jundhulan ing permukaan segara ing dhuwuré.[1] Ombak iki ndarbèni energi kang gedhé, saéngga bisa njalari karusakan kang uga gedhé.[1] Ombak tsunami ngasilaké rong jinis bentuk gelombang, yaiku gelombang positif lan gelombang negatif.[1] Gelombang positif kadadèn nalika banyu segara ora surut kanthi amba ing dhaérah panté.[1] Déné gelombang negatif kadadèn yèn banyu segara surut kanthi amba.[1]

Jinis Ombak[sunting | sunting sumber]

  • Miturut sifaté
  1. Ombak pembangun utawa pambentuk panté (Constructive wave), kang ndarbèni ciri endhèk lan kecepatan rambaté uga cendhak.[3] Saéngga nalika ombak kasebut pecah ing panté bakal ngangkut sedimen (material panté).[3] Material panté bakal kèri ing panté nalika ili balik saka ombak pecah lan nresep ing pasir utawa alon-alon mili mbalik menyang segara.[3]
  2. Ombak pangrusak panté (destructive wave), padatan ndarbèni kadhuwuran lan kecepatan rambat kang gedhé.[3] Banyu kang mbalik muter ndarbèni wektu luwih cepet kanggo nresep ing jero pasir.[3] Nalika ombak teka manèh ngantem panté bakal ana akèh banyu kang ngumpul lan ngangkut material panté tumuju tengah segara utawa papan liya.[3]
  • Miturut cara pecahé
  1. Spilling, padatan kadadèn yèn ombak miring tumuju panté kang dhatar (miringé sithik). Ombak pecah ing jarak kang adoh saka panté lan sithik-sithik.[3]
  2. Plunging, yèn miringé ombak lan dhasar nambah ombak bakal pecah lan puncak gelombang bakal muter. Sabagéyan bakal mentul menyang segara.[3]
  3. Surging, ombak kadadèn ing panté kanthi miring banget, kayata kang kadadéyan ing panté kang ana watu karangé.[3]

Kagunan lan mupangat ombak[sunting | sunting sumber]

  1. Njaga stabilé suhu saka iklim donya [3]
  2. Liwat permukaan ombak, kadadèn ijolan gas [3]
  3. Ningkataké kemampuan adaptasi lan kekuwatan saka makluk urip [3]
  4. Ningkataké keanekaragaman hayati [3]
  5. Mbantu anané gegayutan simbisosis mutualisme [3]
  6. Mbantu nggawé utawa mbentuk panté [3]


Cathetan suku[sunting | sunting sumber]

  1. ^ a b c d e f g h i j k l m n o p q (id)Ombak(diundhuh 14 Desember 2012)
  2. ^ (id)Arti Kata Ombak(diundhuh 14 Desember 2012)
  3. ^ a b c d e f g h i j k l m n o (id)Gelombang laut(diundhuh 14 Desember 2012)
Sumber artikel punika saking kaca situs web: "http://jv.wikipedia.org/w/index.php?title=Ombak&oldid=837729"