Louis IV saking Prancis

Saka Wikipédia Jawa, bauwarna mardika basa Jawa
Louis IV
Louis IV saking Prancis
Rajanipun kaum Frank
Panjenengan936 – 954
LeluhurRaoul saking Prancis
PanerusLothair saking Prancis
Lair10 September 920
Surud30 Sèptèmber 954(954-09-30) (umur 34)
Reims
AstanaCompiègne Abbey, Saint-Corneille, Prancis
GarwaGerberga saking Saksoni
BapaCharles ingkang Prasaja
IbuEadgifu saking Inggris

Louis IV (10 Séptember 920 – 30 Séptember 954), asring sinebat d'Outremer utawi Transmarinus (kekalihipun gadhah teges "saking mancanegari"[1]), inggih punika raja saking Prancis Kilèn, utawi raja Prancis ingkang miyos tanggal 5 September 920 ing London.[2] Louis IV kalebet trah kulawargi dhinasti Carolingian, putranipun Charles ingkang Prasaja lan Eadgifu saking Inggris, putrinipun Raja Edward ingkang Langkung Sepuh.[3][4] Louis IV palakrami kaliyan Gerberga von Sachsen (913-969).[2] Panjenenganipun punika gadhah trah saking Prancis, Bèlgia, lan Jerman.[2] Louis IV maréntah Prancis awit taun 936-954[5] lan nelasaken sapérangan ageng saking wekdal kakuaosanipun kanggé nglawan Hugh ingkang Agung.[6]

Mangsa Alit[besut | besut sumber]

Wekdal Louis IV taksih alit, wonten kadadosan inggih punika ramanipun ingkang namanipun Charles III dipunkunjara déning para bangsawan.[7] Charles dipunkunjara watawis taun 923.[8] Louis IV kaliyan ibunipun ingkang asma Eadgifu saking Inggris lajeng dipunasingaken dhateng Inggris.[9] Louis nelasaken mangsa alit lan mudha ing Inggris.[10] Ing Inggris Louis IV pidalem ing pura Raja Wessex Æthelstan.[11] Louis IV kondur dhateng Prancis sasampunipun Raja Raoul tilar donya ing taun 936.[11]

Jumeneng Nata dados Raja Prancis[besut | besut sumber]

Nalika Rudolph ingkang ngrebat kakuaosanipun Charles tilar donya, Ralph saking Burgundi, Hugh ingkang Agung lan para bangsawan milih Louis IV kanggé dados raja.[8] Louis IV kondur saking Inggris taun 936 lan jumenengan (dipundadosaken raja) ing Laon nalika tanggal 19 Juni 936.[8] Louis IV dipunsahaken minangka raja Prancis déning Artand, Biskop Agung Reims, dinten Ahad 19 Juni 936.[6] Biskop Artand punika kalebet panjurung utami Louis IV mengsah Hugh ingkang Agung.[8]

gegambaran Jumeneng natanipun Louis IV déning para biskop

Flodoard, satunggaling ahli sajarah sampun nyerat prastawa konduripun Louis IV, makaten isinipun:

"Para Bretons kondur saking wewengkon sebrang sagara kanthi panjurung Raja Athelstan, kondur dhateng nagaranipun piyambak.[12] Duke Hugh dipunkintun ngliwati sagara kanggé nimbali Louis, putra Charles, ingkang badhé dipuntampi minangka raja, lan Raja Athelstan, paklikipun, Ingkang kapisan mendhet sumpah saking utusan kaum Frank, ngirim utusan kasebat dhateng karajan Frank kaliyan para biskop, lan pandhérék Hugh sanèsipun lan bangsawan sanès saking Frank tindak saperlu manggihi Louis IV lan gadhah komitmen dhateng Louis.[12] Énggal-énggal panjenenganipun mandhap ing Boulogne, kados ingkang sapun dipunsarujuki sesarengan bilih jumenengan raja badhé katindakaken ing Laon ingkang dipunberkahi kanthi berkah karajan.[12] Louis IV dipun-urapi lan dipunparingi makutha déning Biskop Agung Artold, ing sangajengipun para pangarsaning praja lan kalih dasa biskop."[12]

Cecongkrahan Pulitik[besut | besut sumber]

Konflik utawi cecongkrahan pulitik Raja Louis IV lan Hugh narik kawigatén Raja Otto ingkang Agung saking Jerman kanggé nyerang Prancis.[9] Amargi ngadhepi mengsah ingkang sami, Louis IV lan Hugh sarujuk manunggal kanggé ngicalaken serangan saking Otto.[9] Wekdal samanten Hugh dipuncepeng Artaud, penasihatipun Raja Otto lan Hugh dipunkunjara.[9] Déné Raja Louis IV ugi saged dipuncepeng déning Normandia, sadèrèngipun dipunculaken malih.[9]

Cecongkrahan kaliyan Hugh[besut | besut sumber]

Sasampunipun dipunsahaken minangka raja Louis IV "d'Outremer".[11] Louis IV nandhesaken otonomi wewengkonipun saking Hugh ingkang Agung, ingkang sampun paring dhawuh supados Louis IV lan ibunipun maréntah ing Laon nalika taun 937.[11] Louis kabukti boten dados "bonékah" raja Hugh, Louis IV ngantos mbebelani pindhah saking Paris dhateng Laon kanggé nyegah prabawa Hugh.[8] Nalika Hugh lan Hebert nyerbu wewengkon Laon ing taun 940, Louis IV kanthi ajiwa sinatriya mbebelani kuthanipun, nanging amargi Hugh dipunbiyantu raja Jerman, Otto I, pungkasanipun Louis IV kawon ing taun 941.[8] Louis IV kaliyan Otto salajengipun nindakaken prajanjen damé ing wulan Novémber 942.[8] Kekalihipun sarujuk rerukunan malih sasampunipun Herbert, panjurung utami Hugh tilar donya ing taun 943.[8]

Sanajan gadhah namung kedhaulatan de facto ingkang winates ing kutha Laon kémawon lan sapérangan wewengkon ing Prancis sisih lèr, Louis IV gadhah grengseng ingkang ageng kanggé mbrastha para pamberontak.[7] Ing wekdal kawitanipun pamaréntahan, Louis IV nyerang wewengkon Burgundi lan Aquitaine ing taun 937.[7]

Cecongkrahan kaliyan Otto[besut | besut sumber]

Ségel kanthi asma Otto ingkang Agung

Taun 939 Louis IV boten akur kaliyan Kaisar Otto ingkang Agung, ingkang ndamel kekalihipun ngawontenaken paprangan.[7] Para bangsawan ingkang wonten ing wewengkon-wewengkon Prancis nyatakaken béla setya dhateng raja Prancis Louis IV.[7] Sanajan Louis IV palakrami kaliyan Gerbega saking Prancis, rayinipun Otto ingkang Agung.[7] Palakrami Louis IV kaliyan Gerbega punika boten pikantuk idin saking Otto.[11] Kanggé sawatawis wekdal wontenipun palakrami punika saged ndadosaken Louis IV kaliyan Otto rukun lan boten mengsahan.[7] Nanging paprangan lajeng dipunterasaken, Otto ingkang Agung nyengkuyung panguwaos saking golongan pamberontak saking karajan Prancis.[7] Ngantos dumugi warsa 942 dèrèng wonten predaméan antawisipun pihak kalih kalawau, sanajan sampun ngawontenaken prajanjén Visé-sur-Meuse.[7]

Sédanipun William Longsword, pangarsa wewengkon Normandia, ingkang nemahi pati déning Arnulf ing wulan Dhésèmber 942, ndamel Louis IV ngupadi kanggé pikantuk hak ngopéni Richard, laré enèm calon pawaris tahta Louis IV.[7] Sasampunipun boten saged nguwaosi wewengkon Normandia, wewengkon ingkang sadèrèngipun dados kakuaosanipun Louis IV sami uwal lan dipunrebat déning mengsah-mengsahipun.[7]

Arta rècèh mawi asma Louis IV

Palakrami lan Putra-putranipun[besut | besut sumber]

Louis IV palakrami kaliyan Ratu Gerbega lan patutan:

  • Lothaire, raja saking Prancis;[13] Lothaire dipunpilih nggantosaken Louis IV nalika tanggal 12 Nopémber 954 lan kangungan asma énggal Lothaire Raja kaum Frank.[11]
  • Putri Mathilde saking Prancis, utawi putri Gerbega[11] miyos taun 943 ing Laon, tilar donya 27 Januari 981;[14]
  • Putri Hildegarde saking Prancis, miyos taun 944 ing Laon;[15]
  • Putri Carloman saking Prancis, miyos taun 945 ing Laon;[15]
  • Pangéran Louis saking Prancis, miyos taun 948 ing Laon, tilar donya 10 September 954 ing Laon;[15]
  • Pangéran Charles saking Prancis, miyos taun 953 ing Laon;[14]
  • Pangéran Hénri saking Prancis, miyos taun 953 ing Laon;[15]
  • Pangéran Alâerade saking Prancis, miyos taun 953 ing Laon.[15]

Garis trah[16][besut | besut sumber]

Tilar Donya[besut | besut sumber]

Ing pungkasaning pamaréntahan, Louis IV kathah nemahi gangguan kados paprangan kaliyan Hugh ingkang Agung,[8] ugi wonten serbuan saking Honggari dhateng wewengkon Prancis sisih kidul.[8] Louis IV tilar donya ing tanggal 10 Séptember 954.[8] Wonten pamanggih sanès bilih panjenenganipun tilar donya 25 Séptember 954 ing Reims, Prancis kanthi sebab ingkang boten saged dipuntemtokaken.[2] Pamanggih sanèsipun ngéngingi sabab tilar donyanipun Louis IV punika amargi dhawah saking turangga.[17] Salajengipun pamaréntahan Prancis dipunpasrahaken dhateng putranipun ingkang namanipun Lothaire.[8]


Kang sadurungé
Rudolph
Raja Francis Kilèn
936–954
Kang sawisé
Lothair


Cathetan suku[besut | besut sumber]

  1. (ing basa Prancis)http://his.nicolas.free.fr. "Louis IV". his.nicolas.free.fr. Dibukak ing 31 Maret 2013. {{cite web}}: External link in |author= (pitulung)
  2. a b c d (ing basa Prancis)Robin Patterson. "Louis IV (c920-954), "Louis IV Carolingian from Overseas"". Familypedia. Dibukak ing 25 Maret 2013.
  3. a b c d CC-BY-SA. "Louis IV of France". Princeton. Dibukak ing 27 Maret 2013.
  4. oldbooks.incognitaterra.org. "Les Carlovingiens-Louis IV". oldbooks.incognitaterra.org. Dibukak ing 31 Maret 2013.
  5. europeanhistory.about.com. "The Rulers of France: From 840 Until 2000". europeanhistory.about.com. Dibukak ing 31 Maret 2013.
  6. a b Encyclopædia Britannica, Inc. "Louis IV d'outremer Roi de France". Encyclopædia Britannica, Inc. Dibukak ing 31 Maret 2013.
  7. a b c d e f g h i j k LDS. "Louis IV". nndb. Dibukak ing 25 Maret 2013.
  8. a b c d e f g h i j k l Anne M Berge. "Louis IV 'd'Outremer' de France, Roi de Francie Occidentale". Geni. Dibukak ing 27 Maret 2013.
  9. a b c d e roisdefrance.no-ip.org. "Louis IV d'Outremer". roisdefrance.no-ip.org. Dibukak ing 31 Maret 2013.
  10. infoplease.com. "Louis IV". infoplease.com. Dibukak ing 31 Maret 2013.
  11. a b c d e f g fmg.ac. "LOUIS IV 936-954". fmg.ac. Dibukak ing 31 Maret 2013.
  12. a b c d familypedia.wikia.com. "Louis IV (c920-954)". familypedia.wikia.com. Dibukak ing 18 April 2013.
  13. LDS. "Louis IV MAP". NNDB MAP. Dibukak ing 27 Maret 2013.
  14. a b american-pictures.com. "Louis IV "Transmarinus" King of France". american-pictures.com. Dibukak ing 3 April 2013.
  15. a b c d e LDS. "Louis IV "Transmarinus" King of France". Mathematical. Dibukak ing 27 Maret 2013.
  16. geni.com. "Louis IV 'd'Outremer' de France, Roi de Francie Occidentale". geni.com. Dibukak ing 18 April 2013.
  17. Lutetia. "King Louis IV". findagrave.com. Dibukak ing 15 April 2013.

Pranala njawi[besut | besut sumber]