Wong Arwaniti

Saka Wikipédia Jawa, bauwarna bébas abasa Jawa
Wong Arwaniti
Gunggung cacah jiwa
Diwetara ana 50.000–200.000
Tlatah mawa cacah jiwa akèh
Attica, Peloponnese, Boeotia, Épirus (Yunani)
Basa
basa Arwanitika, basa Yunani
Agama
Ortodoks Yunani
Golongan ètnik magepokan
wong Albania, wong Yunani, wong Arbëreshë (ing Itali)

Wong Arwaniti, utawa Arvanites (Yunani: Αρβανίτες, Arvanitika: Arbëreshë / Αρbε̰ρεσ̈ε̰ or Arbërorë) ya iku golongan cacah jiwa dwibasa[1] ing Yunani sing asliné nyaturaké basa Arwanitika, sawijining dhialèk basa Albania bebarengan karo basa Yunani. Wong-wong iki ndunungi Yunani sasuwéné pungkasaning Jaman Tengahan lan minangka cacah jiwa dhominan ing sawenèh wewengkoning Peloponnese lan Attika nganti abad angka 19.[2] Para Arwaniti ing wektu saiki nganggep awaké dhéwé minangka wong Yunani[3][4][5] minangka asil saka prosès asimilasi, lan ora nganggep dhèwèké minangka wong Albania utawa péranganing bangsa Albania.[6] Wong-wong iki ngarani awaké dhéwé para Arwaniti utawa Arvanites (ing Yunani) lan Arbëror (ing basané dhéwé). Brayan-brayané para Arwaniti ing Yunani Lor-Kulon diarani Shqiptar (istilah sing pada dianggo wong-wong Albania ing Albania).[4] Nalika abad angka 20, basa Arwanitikia mono sangsaya suda panganggoné lumantar ananing kahanan alihan basa menyang basa Yunani lan migrasi internal gedhé-gedhénan menyang kutha-kutha gedhé sing njalari aworing wong-wong.

Démografis[besut | besut sumber]

Wewengkon kanthi ananing pangayunan tradhisional saka para Arwaniti tinemu mliginé ing papan papan sing padhet ing Yunani Kidul-Wétan, ya iku ing Attika (Mliginé ing Attika Wétan), Boeotia Kidul, Lor-Wétané Peloponnese, sakiduling pulo Euboea, saloring pulo Andros, lan sawenèh pulo ing Teluk Saronik kalebu Salamis. Ing péranganing wewengkon iki, wong-wong mau mbentuk cacah jiwa mayoritas sing padhet nganti watara taun 1900. Sajeroning Attika, pérangan kutha krajan Aténa lan wewengkon sapinggiring kutha, ana para Arwanitik nganti pungkasaning abad angka 19.[7] Uga ana sawenèh pamukiman ing sawenèh pérangan liyané Peloponnese, lan ing Phthiotis (désa Livanates, Malesina, Martino).

Ora ana jumlah sing pesthi ngenani cacah jiwaning para Arwaniti ing Yunani ing wektu iki (ora ana data resmi bab étnisitas ing Yunani). Sawijining sumber saka Venesia ing tengahaning abad angka 15 metara yèn ana 30.000 wong Albania sing urip ana ing Peloponnese ing wektu semana.[8] Ing tengahaning abad angka 19, Johann Georg von Hahn metara jumlahé ing Yunani antaraning 173.000 lan 200.000.[9] Sènsus resmi sing pungkasan saka taun 1951. Awit kuwi, jumlahé wong Arwaniti watara 25.000 tekan 200.000. Ing ngisor iki tingkesaning pangira-ira bab jumlah sing manéka warna (Botsi 2003: 97):

  • Sénsus 1928: 18.773 warga sing nganggep awaké minangka "Albanophone" ing Yunani.
  • Sènsus 1951: 22.736 "Albanophones".
  • Furikis (1934): metara ana 70.000 Arwaniti ing Attika.
  • Trudgill/Tzavaras (1976/77): metara ana 140.000 ing Attika lan Boeotia.
  • Sasse (1991): ana watara 50.000 panutur basa Arwanitika ing Yunani.
  • Étnolog, 2000: 150.000 Arwaniti, ndunungi 300 désa.
  • Pasarékatan Fédheral Bangsa-bangsa ing Éropah, 1991: 95.000 "wong Albania ing Yunani" (MRG 1991: 189)
  • Golongan Hak-hak Minoritas Internasional, 1997: 200.000 wong Arwaniti ing Yunani.[10]
  • Jan Markusse (2001): 25.000 Arwaniti ing Yunani[11]

Kaya cacah jiwané Yunani sing liya, para Arwaniti uga uwis ngalami émigrasi saka désa-désané menyang kutha, mliginé menyang kutha krajan Aténa. Iki nyebabaké pituna ing bab basa tumrap anak putu turun-temuruné.

Panganggoning basa lan kapahamaning basa[besut | besut sumber]

Ayat pambukaning geguritan sing digarap ing basa Arwanitika, kanthi pertalan ing basa Yunani, saperlu ngajèni ningkahé Aleksandra lan Gran Duke Paul saka Russia ing taun 1889.

Sanajan basa Arwanitika lumrahé karan basa Albania ing Yunani nganti abad angka 20, pangajabing wong Arwaniti kanggo mahyakaké jati dhirining étnisé minangka wong Yunani uga nyebabaké panulakan marang jati dhiriné basa Albania.[12] Akir-akir iki, para Arwaniti amung nduwé pamikiran sing keliru ngenani gegayutané basané dhèwè marang basa Albania.[13] Awit Arwanitikia iku mligi minangka basa caturan, wong Arwaniti uga ora rumangsa duwé basa Albania Baku sing dianggo ing Albania, katon saka ora kanggoné basa Albania Baku ing basa tulis lan ing médhiané wong Arwaniti. Pitakonan ngenani celetan ing bab basa utawa adoh cedhaké antaraning basa Arwanitika lan basa Albania uwis ana mliginé awit kawitané taun 1990-an, nalika para imigran saka Albania kanthi cacah sing akèh wiwit mlebu Yunani lan kontak karo brayan-brayan Arwaniti lokal.[14]

Wiwit taun 1980-an, uwis ana pangiguh saperlu nglestarékaké pituwah ing bab basa lan budaya saka para Arwaniti. Pakumpulan gedhé dhéwé sing ngupadi kanggo promosi basa Arwanitika ya iku "Arvanitic League of Greece" (Αρβανίτικος σύλλογος Ελλάδος).[15]

Rujukan[besut | besut sumber]

  1. ^ D Tsitsipis, L., 2004.
  2. ^ Hall, Jonathan M. Ethnic Identity in Greek Antiquity.
  3. ^ Botsi (2003: 90); Lawrence (2007: 22; 156).
  4. ^ a b GHM (1995).
  5. ^ Hart, Laurie Kain (1999). "Culture, Civilization, and Demarcation at the Northwest Borders of Greece". American Ethnologist 26: 196. doi:10.1525/ae.1999.26.1.196. 
  6. ^ Trudgill/Tzavaras (1977).
  7. ^ Travellers in the 19th century were unanimous in identifying Plaka as a heavily "Albanian" quarter of Athens.
  8. ^ Era Vranoussi, Deux documents byzantins inedits sur la presence des Albanais dans le Peloponnese au XVe siecle in The Medieval Albanians, NHRF, Institute for Byzantine Research, p. 294
  9. ^ von Hahn, Johann Georg (1854). Albanesische Studien. kk. 14, 32. 
  10. ^ Anderson, Bridget; Minority Rights Group (1997). World directory of minorities. Minority Rights Group International. k. 155. ISBN 1-873194-36-6. 
  11. ^ Markusse Jan, Territoriality in national minority arrangements: European-wide legal standards and practices, in Gertjan Dijkink & Hans Knippenberg (eds.
  12. ^ GHM 1995
  13. ^ Breu (1985: 424) and Tsitsipis (1983).
  14. ^ Botsi (2003), Athanassopoulou (2005).
  15. ^ Arvanitic League of Greece